खोज

भनिन्छ बूढेसकालमा बाबा–आमाको सहारा छोराछोरी नै हुन्छन् ।

आमा–बाबुले पनि आफ्ना सन्तानको पालनपोषणमा रत्तिभर कसर बाँकी राख्दैनन् ।

आफ्नै छोराछोरीले बाबुआमालाई वृद्धाश्रममा पुर्याएका घटना पनि थुप्रै छन् ।

कुनै छोरा यस्ता छन्, जसले छोरीले भन्दा पनि राम्रो स्याहारसुसार गरेर वृद्ध बाबुसँग रमाइरहेका छन् ।

रुपन्देहीको तिलोत्तमा–१५ सखुवानीका गिरिप्रसाद पुनले बाबुको मुख हेर्ने दिन बुधबार बिहानै सामाजिक सञ्जालमा ९२ वर्षिय आफ्ना बाबुलाई खुवाउँदै गरेको तस्वीर पोष्ट गरे । उनलाई आफ्ना वृद्ध बाबुलाई कसरी सधै खुशी राख्ने भन्ने कुराले दिनहुँ पिरोलिरहन्छ । “बुबा मसँग होइन, म बुबासँग बसेको छु, यसैमा पूर्ण खुशी र सन्तुष्ट छु”–उनले भने ।

व्यस्त र आधुनिक जीवनशैलीले छोराहरूले बाबुआमालाई समय दिन सकेका छैनन् । तर गिरिप्रसादले आफ्नो अधिकांश समय बाबुसँगै कटाउने गरेका छन् । जनउत्थान बचत तथा क्रृण सहकारी संस्थाको उपाध्यक्ष र एउटा औषधि पसलमा जागिरे रहेका उनले आफ्नो काम सकेपछि बाबुको स्याहारसम्भारमा दिन बिताउँछन् । “मैली र मेरी श्रीमतीले बुझेको तलब बाबुकै अगाडि लगेर देखाउँछौ, अनि उहाँ पनि खुशी हुनुहुन्छ र पैसा बैंकमा राख्न अह्राउनुहुन्छ, हामी उहाँको आज्ञा अनुसार त्यही गर्छौं”–उनी भन्छन् ।

आफ्ना ६ भाइ छोरामध्ये उनी कान्छा हुन् । तीन दिदीबहिनी पनि रहेका उनले आमाको देहावशानपछि श्रीमतीका साथमा बाबुको रेखदेख गर्दै आएका छन् । “बाबुलाई खुशी राख्नकै लागि बाबुको मुख हेर्ने दिन बिहानै आफैले बनाएर आफ्नै हातले बाबुलाई खाजा खुवाउँदा छुट्टै आनन्द आएको उनी सुनाउँछन् ।

पहिले हजुरबाबुदेखि नाति, पनातिसम्म एउटै चुल्होमा खाना खान्थे । एउटै छाप्रोमा ओत लाग्थे । संयुक्त परिवारको शैली थियो । अहिले क्याम्पस पढ्नका लागि डेरा बस्दादेखि बाबुआमासँग छुट्टिएका छोराछोरी फेरि बाबुआमासँग आएर बिरलै मिसिन्छन् । पढ्न सहरतिर छिरेका छोराहरू गाउँ नफर्किने सर्तमा सहर वा अर्को गाउँकी बुहारी भित्र्याउँछन् । उसैगरी गाउँ नजाने सर्त राखेर छोरीहरूले सहरतिरै ज्वाइँ खोज्छन् । यदाकदा गाउँ फर्किने परिस्थिति आए पनि सासुससुरासँग नबस्ने सर्त गराएर गाउँ फर्किन्छन् ।

बुबाको मुटुमा समस्या भएपछि १० वर्षअघि पेसमेकर राखिएको थियो । त्यसपछि दुईपटकसम्म क्षयरोग भयो । त्यसपछि दम हुँदै अहिले प्यारालाईसिस छ । “अहिले उपचार गरी आफैले खाना खान सक्ने अवस्थामा पु¥याएको छु”–उनी भन्छन् । २०७४ सालमा आमा गुमाएका गिरिप्रसादले बुबालाई आमाले गर्ने मायामा कुनै कमी हुन दिएका छैनन् । “घरको भित्तामा राखिएको आमाको फोटो बुबाले हरिरहँदा उहाँको मायाँमा कमी हुन दिनुहँदैन भन्ने लाग्छ र दिएको पनि छैन”–उनी भन्छन् ।

छोराले गरिरहेको माया र सदभावप्रति उनका बाबु पनि निकै खुशी छन् । बुटवल टुडेसँग प्रतिक्रिया दिंदै गिरिप्रसादका बाबु दलबहादुर भन्छन्–“छोरा बुहारीले दिएको साथ र मायाबाट म खुशी छु ।” भारतीय सेनाका पेन्सनर रहेका उनी सरकारले दोहोरो सुविधा कटौती गर्नेगरी सामाजिक सुरक्षाभत्ता कटौत ीगर्ने निर्णय गरेकोमा भने असन्तुष्ट छन् । “हुन त अहिले सरकार पनि अप्ठेरोमा परेर होला, तर भारतीय सेनाबाट अवकाशप्राप्त हामीहरुको सामाजिक सुरक्षा भत्ता कटौती नगरेको भए हुन्थ्यो”–उनी भन्छन् ।