खोज

तिलोत्तमा प्रिमियर लिग टि–२० प्रतियोगिताको दोस्रो संस्करणको तयारी शुरु भएको छ । पहिलो संस्करण सफलतापूर्वक सम्पन्न गरेको आयोजक तिलोत्तमा क्रिकेट विकास समितिले दोस्रो संकरणको तयारी शुरु गरेको हो ।
वार्षिक क्यालेण्डरमा राखे अनुसार प्रतियोगिता गर्न लागेको समितिका अध्यक्ष अच्युतराज ढुङ्गाना (सुनिल) ले शुक्रबार पत्रकार सम्मेलनमा बताए । दोस्रो संस्करणका लागि खेलाडी छनौटको अक्सन, मैदानको तयारी शुरु भएको आयोजकले जानकारी दिएको हो । क्रिकेट खेलको विकाससंगै स्थानिय खेलाडीहरुलाई ब्यवसायिक बनाउने उद्येश्य पहिलो संस्करणमा सफलता प्राप्त गरेको उनले दाबी गरे । ‘धेरै राष्ट्रिय खेलाडी उत्पादन गरेका छौ ।’– उनले भने । कार्तिक २६ गतेबाट मंसिर ८ गतेसम्म संचालन हुने प्रतियोगिताका लागि तयारी शुरु भएको उनले बताए । प्रतियोगिताको उपाधि विजेताले ट्रफिसहित नगद ३ लाख, मेडल, प्रमाणपत्र प्राप्त गर्ने छ भने उपविजेताले ट्रफिसहित नगद १ लाख ५० हजार, मेडल, प्रमाणपत्र प्राप्त गर्नेछ । पहिलो संस्करणभन्दा यसवर्ष प्रथम पुरस्कार राशी १ लाख र द्धितिय राशीमा ५० हजार वृद्धि गरिएको हो । यसैगरि प्रतियोगितामा एक जना उत्कृष्ट खेलाडीलाई म्यान अफ दी सिरिज, एक जना वेष्ट बलर, वेष्ट ब्याट्सम्यान, एक जना ईमर्जिङ्ग प्लेयर तथा एक जना टिमलाई टिम फेयर प्ले अवार्डबाट पुरस्कृत गरिने उनले बताए । प्रतियोगिता संचालनमा लाग्ने २१ लाख खर्च स्थानिय संघसंस्था, खेलप्रेमीहरुबाट जुट्ने उनले बताए ।
कार्यक्रममा जिल्ला क्रिकेट संघका अध्यक्ष प्रशान्त बिक्रम मल्लले प्रतियोगिता खेलाडीहरुका लागि प्लेटफर्मका रुपमा रहेको बताए । रुपन्देही जिल्लाले राष्ट्रियस्तरमा नै आफनो अलग पहिचान बनाउन सफल भएको दाबी गर्दै उनले अब पूर्वाधार विकासमा लाग्नुपर्ने बताए । वर्षेनी राष्ट्रिय टिमलाई युवा र उर्जावान खेलाडी जिल्लाबाट उत्पादन गर्न सफल भएको उनले दाबी गरे ।
कार्यक्रममा समितिका सिईओ तथा प्रतियोगिताका संयोजक दिपक भु्रतेलले यसपटक जिल्लास्तरमा प्रतियोगितालाई सिमित नगरिने बताए । अन्य जिल्लाका खेलाडीहरुसहित २ टिम थप गरि १० टिमले उपाधि दाबेदारी गर्ने उनले बताए । प्रतियोगितामा नवलपरासी, पाल्पा, गुल्मीका खेलाडीहरु अक्सनमा सहभागि भएर प्रतियोगितामा भाग लिने उनले बताए । यसपटक ‘ए’ र ‘बी’ गरि श्रेणीमा खेलाडीको अक्सन हुने उनले बताए । ‘ए’ श्रेणीमा सबै किसिमको खेलाडी र ‘बी’ श्रेणीमा राष्ट्रिय, क्षेत्रिय र जिल्लास्तरमा प्रतियोगिता खेलेका खेलाडीहरु पर्ने उनले बताए । यसैगरि यसवर्ष कुनै पनि एउटा टिमले आफनो खर्चमा एक जना राष्ट्रिय खेलाडी खेलाउन पाउने ब्यवस्था समेत गरिएको उनले बताए । यसपटक
क्याप्टेन नभई मार्किङ्ग खेलाडी घोषणा गरेर टिम तयार गर्ने समेत बताए । गतवर्ष प्रतियोगिताको एउटा टिममा १४ जना खेलाडी राख्ने ब्यवस्था भएकोमा यसपटक एक जना थप गरि १५ जना गरिएको उनले बताए । जसमा एक जना राष्ट्रिय, एक जना मार्किङ्ग खेलाडी, दुई जना विद्यालय र ११ जना अन्य खेलाडी हुने छन । प्रतियोगिताका लागि साउन ११ गतेदेखि मसान्तसम्मका लागि अक्सन भर्न पाउने ब्यवस्था भएको छ ।
भने असोज २ गते अक्सन हुने छ । प्रतियोगिताका सबै खेलहरु तिलोत्तमा नगरपालिकाको नवजिवन खेलमैदानमा हुने छ ।