खोज

बामदेव ज्ञवाली
शिक्षा शाखा, रुरु गाउँपालिका, गुल्मी
रुरु गाउँपालिका गुल्मीमा ४३ सामुदायिक र ३ संस्थागत गरि ४६ विद्यालय छन् । वि.स. १९६८ मा स्थापना भएको रिडीको संस्कृत पाठशाला समेत यस गाउँपालिकामा पर्दछ । २००७ सालको प्रजातन्त्रको आगमन संगै रिडी हाइस्कुल, थोर्गा मिडिल स्कुल, चौतारा प्राइमरि स्कुलहरु खुलेको र त्यसपछि क्रमस गाउँँहरुमा स्कुल खुलेको शैक्षिक इतिहास भेटिन्छ । साबिकका रुरु, थानपति, ग्वादी, बलेटक्सार, बम्घा र रिमुवा गरि ६ वटा गा.वि.स. हरु मिलेर रुरु गाउँपालिका बनेको हो । गाउँपालिकाका शिक्षा शाखाका स्रोत व्यक्ति बामदेव ज्ञवालीसँग बुटवल टुडेले गरेको कुराकानीका आधारमा गाउँपालिकाले गरेका शिक्षा सम्बन्धी ५ मुख्य कामलाई यहाँ प्रस्तुत गरिएको छ ।
१) शिक्षक अबकास प्रोत्साहनः
पुराना र पेन्सनका लागि अबधि पूरा भएका शिक्षकका लागि शिक्षक अबकास प्रोत्साहन कार्यक्रम ल्याएको छ । पुराना शिक्षकहरुको सट्टा नयाँ पुस्तालाई शिक्षण पेशामा प्रवेश गराउनका लागि यस्तो नीति लिइएको हो । त्यस्ता शिक्षक पेन्सन निस्कदा एक शिक्षक बराबर ६० हजार गाउँपालिकाको तर्फबाट थप गरिदिने नीति लिएको छ । गाउँपालिकाले चालु आर्थिक बर्षका लागि ३ लाख ६० हजार बजेट छुट्याएको छ । यसको कार्यान्वयनका लागि गाउँपालिकाले कार्यविधि तयार गरिरहेको छ । कार्यबिधिमा ५२ बर्ष पुगेको ५८ बर्ष ननाघेको शिक्षकलाई अवकास प्रोत्साहन दिने प्रस्ताव गरिएको छ ।
२) एक वडा एक नमूना कक्षाकोठाः
गाउँपालिकाले एक वडा एक नमूना कक्षाकोठा कार्यक्रमलाई अगाडी सारेको छ । एक कक्षाकोठा सुधार गर्दै विद्यालय नै सुधार गर्नका लागि गाउँपालिकाले यसो गरेको हो । गाउँपालिकामा ६ वटा वडाहरु रहेका छन् । एक कक्षा कोठा व्यवस्थापनका लागि गाउँपालिकाबाट ३० हजारको दरले उपलब्ध गराउने र विद्यालयले साझेदारी स्वरुप रकम थप गरी काम गर्नुपर्नेछ । त्यसका लागि गाउँपालिकाले १ लाख ८० हजार बजेट व्यवस्था गरेको छ ।
३) अन्तर तह अतिरिक्त क्रियाकलापः
गाउँपालिकाले गाउँपालिका भित्रका विद्यालयहरुमा तहगत अतिरिक्त क्रियाकलाप संचालन गर्ने गरी शैक्षिक कार्यक्रम योजना गरेको छ । आधारततह १–५, आधारभूत तह ६–८ र माध्यमिक तह ९–१० का बालबालिका बीच गाउँपालिका स्तरमा प्रतियोगिता आयोजना हुेछ । यसका लागि एक अतिरिक्त क्रियाकलाप बराबर ३० हजारको दरले १ लाख ८० हजार बजेटको व्यवस्था छ ।
४) नीजि स्रोत शिक्षकका लागि तलबः
गाउँपालिकाले नीजि स्रोतका शिक्षकको तलबका लागि बजेट विनियोजन गरेको छ । तलब शिर्षकमा ४७ लाख बजेट व्यवस्था गरेको गाउँपालिकाले विद्यालयले संचालन गरेको कक्षा र शिक्षक दरबन्दीको आधारमा बजेट दिने आधार बनाएको छ । कक्षा १–३ संचालन भएको विद्यालयलाई ८० हजार, १–५ कक्षा संचालन भएको विद्यालयलाई १ लाख २० हजार, १–८ संचालन विद्यालयलाई १ लाख ६० हजार र १–१२ संचालन भएको विद्यालयलाई २ लाख देखि ४ लाखसम्म बजेट दिएको छ ।
५) उत्कृष्ट शिक्षकलाई सम्मानः
गाउँपालिकामा रहेका शिक्षकहरुमध्ये मापदण्ड बनाई गाउँपालिकाले १० जना शिक्षकलाई पुरस्कृत गरेको छ । काम गर्ने शिक्षकहरुको मनोबल बढाउन र काम गरे सम्मान पाइन्छ भन्ने सन्देश दिनका लागि उत्कृष्ट सम्मान कार्यक्रम राखिएको हो । बिषयगत सिकाई उपलब्धि, नियमितता, इमान्दारिता, शिक्षण कला कौशल जस्ता बिषयलाई प्रोत्साहनको मापदण्ड बनाइएको थियो ।