खोज

कृष्ण भुसाल
शिक्षा संयोजक, सियारी गाउँपालिका, रुपन्देही
खेलकूद र बौद्धिक क्रियाकलाप मार्फत विद्यालयको सुधार गर्ने उद्देश्यले रुपन्देहीको सियारी गाउँपालिकाले आजदेखि पाँच दिनसम्म दोश्रो सियारी शैक्षिक महोत्सव २०७५ शुरु भएको छ । महोत्सवमा गाउँपालिकाभित्र रहेका २५ सामुदायिक, १३ संस्थागत र ३ धार्मिक विद्यालयका बालबालिका र विद्यालयका शिक्षकहरुले खेलकूद र बौद्धिक बिधामा भाग लिदै छन् । गाउँपालिकाले गत बर्ष देखि शैक्षिक महोत्सवको आयोजना शुरु गरेको हो । प्रस्तुत छ, शैक्षिक महोत्सवमा केन्द्रित रहेर गाउँपालिकाका शिक्षा संयोजक तथा महोत्सवका संयोजक कृष्ण भुसालसँग बुटवल टुडेले गरेको कुराकानीको सारसंक्षेप ।
गाउँपालिकाले शैक्षिक महोत्सवको आयोजना गर्दैछ, यसको मुख्य उद्देश्य के हो ?
खेलकूद र बौद्धिक क्रियाकलाप मार्फत विद्यालयको सुधार गर्ने उद्देश्यले रुपन्देहीको सियारी गाउँपालिकाले शैक्षिक महोत्सव २०७५ को आयोजना गरेको हो । यसले सामुदायिक र संस्थागत विद्यालय बिचको दूरी कम गरी शिक्षामा रहेको असमानतालाई कम गर्दै जाने पनि विश्वास लिएका छौं । विद्यालयहरुमा अतिरिक्त क्रियाकलापहरु नियमित रुपमा हुने गरेको कुरा सबैलाई जानकारी भएको हो । यसले विद्यालयहरुले विद्यालयमा गरिरहेको क्रियाकलापहरुको अवस्था के छ भन्ने अवस्था पनि देखाउनेछ । साथै बिभिन्न विधामा बालवालिकाहरुको प्रतिभा पहिचान गर्नमा पन सहयोग पुर्याउनेछ ।

शैक्षिक महोत्सवका मुख्य मुख्य क्रियाकलापहरु के के हुन ?
गाउँपालिका भित्र रहेका सामुदायिक, संस्थागत र धार्मिक विद्यालयका बालबालिकाहरुको तहगत रुपमा सहभागीता रहने गरी कार्यक्रमको योजना गरेका छौं । महोत्सवमा हुने खेलकुदतर्फको प्रतियोगितामा विभिन्न दूरीका दौड प्रतियोगिता, लङजम्प, हाइजम्प, त्रिपल जम्प, सटपुट, ज्यावलिङ थ्रो, कबड्डी, भलिबल छन् भने बौद्धिक प्रतियोगितातर्फ नेपाली अग्रेजी वाचन, हिज्जे, कविता, निबन्ध, बादविवाद, चित्रकला, हिसाब दौड, बक्तृत्वकला, हाजिरी जवाफ लगायतका प्रतियोगिताहरु छन् ।
महोत्सवमा हुने विभिन्न विधाका प्रतियोगिताहरुमा करिब १३ सय विद्यार्थीहरु सहभागी हुने सचिवालयको रेकर्डबाट प्राप्त भएको छ । यसैगरी विद्यालयका करिब तीन सय शिक्षक र कर्मचारी सभागिता रहनेछ । शिक्षक बीचको प्रतियोगिताको कुरा गर्दा शिक्षक कर्मचारीको म्याराथुन महिला –महिला र पुरुष– पुरुष बीच हुनेछ । त्यसैगरी शिक्षक कर्मचारी र गाउँपालिकाका जनप्रतिनिधी कर्मचारीबीच मैत्रीपूण फुटबल खेलको पनि आयोजना गरिएको छ ।
महोत्सवमा को को सहभागी हुन्छन् र कसरी ?
तहगत रुपमा विद्यालयका विद्यार्थी, शिक्षक र गाउँपालिकाका जनप्रतिनिधी र कर्मचारीहरुले भाग लिने व्यवस्था गरिएको छ । गाउँपालिकाको छपियामा रहेको पब्लिक माध्यमिक विद्यालयमा सचिवालय खडा गरिएको छ भने महोत्सव पनि उक्त विद्यालयमै संचालनको व्यवस्था गरिएको छ । महोत्सव पुस ३ देखि ७ गतेसम्म ५ दिनसम्म संचालन हुनेछ ।
महोत्सवको आयोजनाको व्यवस्थापन कसरी गर्नुभएको छ ?
महोत्सव संचालनको लागि ७ सदस्यीय मूल आयोजक समिति गठन गरिएको छ । समिति अन्तर्गत उपसमितिहरु रहेका छन् । उपसमितिको माध्यमबाट फरक फरक जिम्मेवारीहरु प्रदान गरी काम अगाडी बढाइएको छ भने संपूर्ण कामको अनुगमन, निरीक्षण र निर्देशन गर्ने काम सियारी गाउँपालिकाद्धा गर्ने व्यवस्था गरिएको छ ।
महोत्सवमा आयोजना हुने प्रतियोगिताहरुको मूल्याकंन गर्नका लागि निर्णायकहरु गाउँपालिका बाहिरका सम्बन्धित क्षेत्रका बिज्ञहरुद्धारा गर्नका लागि निम्त्याइएको छ । यसले प्रतियोगिता निष्पक्ष हुन्छ र विश्वसनियता बढ्छ भन्ने अपेक्षा लिएका छौं ।

गतबर्षको शैक्षिक महोत्सवको अनुभव कस्तो रह्रयो ?
अनुभवको कुरा गर्दा शिक्षक र विद्यार्थीमा क्रियाशिलता थपेको छ । क्रियाशीलता थपेको छ । शिक्षक र विद्यार्थीमा प्रतिस्पर्धात्मक भावनाको विकास भएको पाएका छौं । साथै सिर्जनात्मक शिक्षण प्रक्रियामा पनि गाउँपालिका भित्र रहेका शिक्षकहरुमा जागरुकता देखिएको छ । यसको सकारात्मक परिवर्तनको परिणाम आउने शैक्षिक शत्रको अन्त्यमा हुने नतिजाले देखाउने संकेत देखेको छु ।
अन्त्यमा के भन्न चाहनुहुन्छ ?
गाउँपालिकाले शैक्षिक कार्यक्रम अन्तर्गत बार्षिक कार्य योजनामा समाबेश गरिएको कार्यक्रम हो । हामीले गत बर्षदेखि शुरु गरेको यो महोत्सवले विद्यालय शिक्षामा सकारात्मक परिवर्तन देखाउन शुरु गरेको हुदा सबै विद्यालयहरुलाई सक्रिय भई महोत्सवमा भाग लिन, सहयोग गर्न र उपस्थित भएर महोत्सवको अवलोकन गरि आवश्यक सुझाव सल्लाह दिनका लागि अनुरोध गर्दछु । हामीले विद्यालय शिक्षा सुधारमा गरेको प्रयासमा सबैको सहभागीता रहने विश्वास पनि लिएको छु ।