खोज

क्रिकेट खेलको विकास र नया खेलाडी उत्पादन गर्ने लक्ष्यसहित बुटवलमा सम्पन्न प्रथम तिनाउ नकआउट क्रिकेट कप टि–२० प्रतियोगिता २०७५ को उपाधि आयोजक तिनाउ क्रिकेट क्लबले हात पारेको छ । बुधबार भएको फाईनल खेलमा तिनाउले गोलपार्क क्रिकेट क्लबमाथि ७ विकेटको जित निकाल्दै उपाधि हात पारेको हो । उपाधिसंगै उसले नगद २५ हजार ५ सय ५५, ट्रफी, मेडल, प्रमाणपत्रबाट पुरस्कृत भएको छ । यसैगरि उपविजेतामा चित्त बुझाएको गोलपार्कले नगद १४ हजार ५ सय ५५सहित ट्रफी, मेडल, प्रमाणपत्रबाट पुरस्कृत भएको छ । प्रतियोगितामा उत्कृष्ट ब्याट्सम्यान एम्स कलेजका तुल बहादुर थापा काजी, उत्कृष्ट बलर तिनाउ क्रिकेट क्लबका कुशल भट्टराई, म्यान अफ दी सिरिज आयोजक तिनाउकै सुन्दर बेल्बासे घोषित भएका छन ।
देविनगरस्थित क्रिकेट मैदानमा टस जितेर ब्याटिङ्ग रोजेको गोलपार्क क्रिकेट क्लबले पुरै २० ओभरमा १ सय ६० रनको योगफल तयार गरेको थियो । गोलपार्कका लागि सुभम गमालले ८४ रन र सुगम थापाले ३० रनको योगदान दिएका थिए । खेलमा संजु बोहराले ४ ओभरमा २० रन खर्चेर ३ विकेट तथा कुशल भट्टराईले ४ ओभरमा २८ रन खर्चेर ३ विकेट लिएका थिए । मध्यम लक्ष्य पछयाएको तिनाउका ब्याट्सम्यानहरुले १५ ओभरमा नै विजय लक्ष्य भेटाएका थिए । तिनाउको जीतका लागि सन्जु बोहराले ७३ रन तथा प्रभात न्यौपानेले ३९ रनको योगदान दिएका थिए । गोलपार्कका आकाश पौडेलले २ तथा शुभम गमालले १ विकेट लिएपनि जितका लागि पर्याप्त भएन । खेलमा तिनाउका सन्जु बोहरा म्यान अफ दी म्याचबाट पुरस्कृत भएका थिए ।
तिनाउ क्रिकेट क्लबको आयोजनामा जेठ १८ गतेदेखि शुरु भएको प्रतियोगितामा रुपन्देही, नवलपरासी, कपिलबस्तुका गरि २७ टिमले भाग लिएका थिए । एक कार्यक्रमका बिच विजेता, उपविजेता टिम, उत्कृष्ट खेलाडीहरुलाई बुटवल उपमहानगरपालिकाका वडा सदस्य रणबिर थापा, जिल्ला खेलकुद विकास समितिका उपाध्यक्ष मुक्ति अधिकारी, क्रिकेट खेलप्रेमी रोमित बज्राचार्य, बुटवल क्रिकेट विकास समितिका कोषाध्यक्ष नेत्र पौडेललगायतले पुरस्कार वितरण गरेका थिए ।