खोज

किसानले उत्पादन गरेको धान निजी राईस मिल, सहकारी संस्थाहरूले उचित मूल्य नदिँदा मर्कामा परेका बुटवल उपमानगरपालिका भित्रका किसानहरूलाई उनीहरूले उत्पादन गरेको धान धितोमा राखेर कृषि ऋण प्रदान गर्ने नयाँ कार्ययोजना ल्याएको छ ।
किसानले उत्पादन गरेको कृषिजन्य उत्पादनले उचित बजार नपाएकोमा किसानहरूबाट जनगुनासो आएपछि कृषि विकास महाशाखले यस्तो प्रक्रिया अगाडि बढाएको छ ।
बुटवल उपमहानगरपालिकाका कृषि विकास महाशाखा प्रमुख भिमनाथ शर्माले किसानहरूले उत्पादन गरेको धानलाई सहकारीले खरिद गरी उक्त धान बराबरको अनुदान बुटवल उपमहानगरपालिकाले दिने गरी कार्यक्रम अगाडि बढाइएको जानकारी दिए । जसको लागि किसानलाई अनुदान प्रदान गर्नको लागि यस बर्ष २ लाख ५० हजार रूपैयाँ छुट्टाइएको छ । किसानले उत्पादन गरेको धान खरिद गर्ने सोही अनुपातको ऋण प्रदान गर्नको लागि सहकारी मार्फत सूचना प्रकाशन गरेर कार्य अगाडि बढाइएको प्रमुख बरिष्ठ कृषि विकास अधिकृत शर्माको भनाइ रहेको छ ।
कटानी गरेको धान किसानले आफ्नो घरमा भन्डारण अभावले निकै कम मूल्यमा बिक्री गर्नुपर्ने बाध्यता रहेकोले यसलाई निराकरण गर्नको लागि योजना अगाडि बढाइएको हो । जसको कार्यविधि समेत तयार गरी सहकारी संस्थाहरूबाट प्रस्ताव समेत माग गरिएको जनाइएको छ ।
बुटवल विषादीरहीत खाद्य पदार्थ उपलब्ध हुने उपमहानगरका रूपमा पहिचान गराउने तेस्रो नगरसभाबाट पारित नीति बमोजिम बुटवल–६ मा रहेको विषादी अवशेष प्रयोगशाला (केन्द्रीयस्तर) को स्तरीरकरणमा सहयोग गर्ने साथै सो प्रयोगशाला नगरपालिकाको सहकार्यमा संचालन गर्ने जनाएको छ । सहकार्य हुन नसकेमा नपाबाट विनियोजित बजेटबाट आवश्यक कार्य गरिने नगरपालिकाले जनाएको छ ।
बुटवल उपमहानगरपालिका कृषि विकास शाखाले पछिल्लो समयमा ग्रीन हाउस निर्माणलाई प्राथमिकतामा राखेको छ । गत बर्ष बुटवलको सेमलार १५ र १६ मा गरी १५ बाई ८५ बर्ग मिटरका १० वटा ग्रिन हाउस निर्माण गरी तरकारी खेती गर्नका लागि ८ जना किसानसँग सहकार्य गरेकोमा जसले राम्रो उत्पादन दिए यो आर्थिक बर्षमा पनि सोही प्रकृतिको कार्य गर्न लागिएको जानएको छ । बुटवल उपमानगरपालिका कृषि विकास शाखा प्रमुख भिम नाथ शर्माले गत बर्ष परिक्षणको रूपमा गरिएको ग्रिन हाउस खेतीबाट राम्रो उत्पादन भएपछि यस बर्ष थप ५ वटा ५० प्रतिशत लगानीमा सहकार्य गरिने जानकारी दिए । बाहिरी वातावरण अनुकूल नभएको बेला टनेल भित्र उपयुक्त वातावरण सृजना गरी खेती गरिन्छ । जसले गर्दा कृषिमा राम्रो उत्पादन बढ्ने तर्क बुटवल उपमहानगरपालिका कृषि विकास शाखाको भनाई रहेको छ ।
उत्पादनका आधारमा अनुदान दिने गरी घाँसको बीउको मूल्यमा अनुदान दिनका लागि निबेदन संकलन गरिएकोमा ४०० निबेदन संकलन भएका र मापदण्ड पुरा भएका किसानहरूलाई अनुदान वितरण गरिने योजना नगरपालिकाले बनाएको छ । कृत्रिम गर्भाधानका लागि आवश्यक पर्ने विषेश उपकरणः रेफ्री, एआइ गन लगायत एसेसरीज खरिद समेत गरिएकोले यसमा आगामी दिनमा कुनै पनि समस्या नआउने नगरपालिकाले जनाएको छ । à