खोज

बुटवल,१६ फागुन । श्रीकृष्ण नेत्रालय फेको सेन्टर भैरहवाले ८७ जनाको मोतियाबिन्दुको निशुल्क शल्यक्रिया गरिदिएको छ । इम्प्रुभिङ लाइफ इन नेपालले नवलपरासीको सुस्ता गाउंपालिका वडा नं १ रुपौलियामा गरेको आंखा शिविरमा चेकजांज गराउंदा मोतियाबिन्दुमा समसया देखिएका ८७ जनाको नेत्रालयले निःशुल्क शल्यक्रिया गरिदिएको हो । अस्पतालका नेत्र रोग विशेषज्ञहरु डा. सल्मा केसी र डा. रासिजा खनालले मोतियाबिन्दुको शल्यक्रिया गरेका हुन् ।

रुपन्देहीमा आंखा उपचारको क्षेत्रमा पुरानो अस्पताल श्रीकृष्ण नेत्रालयले सामाजिक उत्तरदायित्व अन्तर्गत कमजोर आथिृक अवस्था भएका सर्वसाधारणको आंखाको मोतियाबिन्दुको निःशुल्क शल्यक्रिया गरिदिने गरेको अस्पतालका व्यवस्थापक अमोद सिंहले बताए । मोतियाबिन्दुको शल्यक्रिया गर्दा न्युनतम ७ हजार ५ सयदेखि मेसिनबाट गर्दा १२ हजार ५ सय देखि ५० हजार सम्म शुल्क लाग्ने गर्छ । आंखा शिविरमा अस्पतालका इन्चार्ज मलाउ गुप्ताको नेतृत्वमा अप्टोमेट्रिस सौरभ सरकार,ओएहरु प्रिति शर्मा,गीता जीसी,एन्जिला भण्डारी,बबिता पालले आंखा चेकजांच गरेका थिए ।

शिविरको उद्घाटन गर्दै सुस्ता गाउंपालिका वडा नं १ का अध्यक्ष अशोककुमार चौधरीले सरकारी अस्पतालले गर्ने काम निजी क्षेत्रको अस्पताल श्रीकृष्ण नेत्रालयले गरेको भन्दै यसबाट अरुले सिक्नुपर्ने बताए । निशुल्क शल्यक्रियाको सुविधा पाउंदा गाउंका गरीब सर्वसाधारणले ठूलो राहतको महसुस गर्ने वडाध्यक्ष चौधरीले बताए ।

आंखाका विरामीको सुविधालाई मध्यनजर गरी अस्पतालले बुटवलको पुष्पलालपार्कमा पनि सेवा विस्तार गरेको व्यवस्थापक सिंहले जानकारी दिए ।