खोज

प्रदेश नं. ५ का मुख्यमन्त्री शंकर पोखरेलले मेला महोत्सवहरू परिस्कृत हुन जरुरी रहेको बताएका छन् ।
नवलपरासीको बर्दघाटमा शुक्रबारदेखि शुरु भएको औद्योगिक ब्यापार महोत्सवको उद्घाटन गर्दै उनले यस्तो बताएका हुन् । मेलाको उद्घाटन गर्दै मुख्यमन्त्री पोख्रेलले स्थानीयस्तरमा उद्योग कलकारखानाको स्थापना गर्नुपर्ने बताए । उनले अहिले लाग्ने मेला महोत्सव स्थानीयको पुँजीलाई बाहिर पठाउने माध्यम बन्दै गएको र स्थानीयस्तरका उत्पादन तथा स्थानीयस्तरका हरेक क्षेत्रको प्रवद्र्धन हुन नसकेको बताउँदै स्थानीय उत्पादनलाई प्राथमिकतामा राख्न आवश्यक रहेको बताए ।

बर्दघाट नगरपालिकाका नगर प्रमुख धिरज शर्माले बर्दघाट नगरपालिका कृषि, पर्यटनको प्रचुर सम्भावना रहेको र अब उद्योग कलकारखाना स्थापित गरी समृद्ध नगर बनाउनु पर्नेमा जोड दिएका थिए । बर्दघाट उद्योग वाणिज्य संघका अध्यक्ष मिनराज शर्माले जारी मेलाको माध्यमबाट बर्दघाट क्षेत्रमा ब्यवसायिक तथा औद्योगिक विकासमा सहयोग पुग्ने बताउँदै महोत्सवलाई साझा बनाउनु पर्ने बताए । तेस्रो कृषि पर्यटन तथा औद्योगिक ब्यापार मेला मंसिर ११ गतेसम्म जारी रहने छ ।
स्थानीय ब्यापार, पर्यटन, कृषि सहित स्थानीय उत्पादनलाई प्रवद्र्धन गर्ने उद्देश्यले मेलाको आयोजना गरिएको आयोजक बर्दघाट उद्योग वाणिज्य संघले जनाएको छ ।
बर्दघाट नगरपालिका वडा नम्बर २ चिसापानीमा सञ्चालित मेलामा बाल उद्यान, स्थानीय उत्पादन, विभिन्न घरेलु उत्पादनका प्रदर्शनी गरिएका २ सय १४ स्टल रहेको बर्दघाट उद्योग वाणिज्य संघका महासचिव लेखनाथ न्यौपानेले जानकारी दिए । à