खोज

बुटवल,८ फागुन । नेपाली कांग्रेसका केन्द्रीय सदस्य एवं सांसद विनोद चौधरीले राजनीतिमा दूरदर्शी नेताको खाँचो औँल्याएका छन् । राजनीतिले समग्र परिवर्तन ल्याउन सक्ने भएकाले दूरदर्शी नेताको खांचो रहेको उनले बताए । नवलपरासी १ बाट प्रतिनिधिसभा सदस्यमा निर्वाचित उनले दूरगामी भिजनसहितको राजनीतिले मात्रै देश विकास सम्भव हुने बताए । सोमबार तेस्रो रामपुर महोत्सवको समापन कार्यक्रमलाई सम्बोधन गर्दै चौधरीले राजनीतिबाट मात्रै विकास सम्भव भएको बताए । उनले राजनीति विकास केन्द्रित हुनुपर्छ भन्ने मान्यता रहेको बताए । राजनीतिको कुर्सीमा सही व्यक्ति आयो भने एउटा हस्ताक्षरले ५० वटा बुढानीलकण्ठ स्कुल , ५० वटा उद्योग ग्राम र ५० वटा शास्वतधाम बन्न सक्ने उदाहरण दिए ।
उनले ५० वर्षअघि राजपरिवारका सदस्यको अध्ययनका लागि बुढानीलकण्ठ स्कुल खुले पनि त्यसपछि अर्को बुढानीलकण्ठ स्कुल स्थापना गर्न नसक्नु सरकारको कमजोरी भएको बताए ।
राजनीतिमा लामो सङ्घर्ष गरेका र योगदान दिएका व्यक्तिहरूको सम्मान हुनुपर्नेमा उल्लेख गर्दै सांसद चौधरीले यसका साथै विकास र समृद्धिका बारेमा बुझेकाहरूलाई राजनीतिमा स्थान दिनुपर्ने बताए । एउटा उद्यमीको प्रयासबाट मात्रै विकास सम्भव नभएकाले आफू राजनीतिमा आएको प्रस्ट पारे ।
चौधरिले रामपुर क्षेत्र उद्योग व्यावसायका लागि धेरै सम्भावना बोकेको उल्लेख गरे ।