खोज

रुपन्देहीमै सबैभन्दा धेरै सदस्य रहेको सामूहिक विकास सहकारी संस्था शंकरनगर रुपन्देहीले सीपमूलक तालिमबाट महिलाहरुलाई स्वरोजगार उन्मुख बनाएको छ । महिलाको आर्थिक हैसियत उकास्न र आत्मनिर्भर बनाउन सहकारीले रजत जयन्तीको अवसर पारेर सीपमूलक तालिम दिएको हो । यस्तो तालिमबाट पछिल्लोपल्ट ६५ महिला लाभान्वित भएका छन् । कार्तिक ६ गतेदेखि सुरु गरेको पाँच दिने पाउपोस बनाउने तालिमले ती महिला लाभान्वित भएका हुन् ।
अब उनीहरु पाउपोस निर्माण गरी आफै उद्यम सञ्चालन गर्न सक्षम भएको प्रशिक्षक प्रतिमा पन्थले जानकारी दिइन् । सहकारीले यो वर्ष ५० जना लघुउद्यमी तयार गर्ने लक्ष्य लिएको छ । सहकारीले समय समयमा बाख्रा पालन, कुखुरा पालन, व्यवसायिक पशुपालन, च्याउ खेती, फूल, तरकारी तथा फलफूल खेती जस्ता तालिम पनि प्रदान गर्दै आएको छ । बजारोन्मुख क्षेत्रमा सिलाइकटाइ, बुनाइ, कढाइ, गुडीया बनाउने, अचार तथा दालमोठ बनाउने लगायतका तालिमबाट पनि महिलाहरुले आम्दानी गरेका छन् । ऋण लिने दिनेमात्रै नभै सहकारीले महिलाको आर्थिक र सामाजिक हैसियत बढाएको संस्थाका अध्यक्ष चुडामणि खरेल बताउँछन्् । “आर्थिक रुपले सबल नभै महिला अधिकार स्थापना सकिँदैन” अध्यक्ष खरेल भन्छन्–“यसैले सहकारी मार्फत सीपमूलक आयआर्जनका काम र चेतनाका काम सँगसँगै अगाडि बढाएका हौं ।”
महिलाहरुलाई विभिन्न सिपमूलक तालिमको आयोजना गर्दै व्यवसायिकता वृद्धि गर्दै लैजाने क्रममा पाउपोस बनाउने तालिम सञ्चालन गरिएको र यो तालिम अझ फलदायी हुने खरेलले बताए ।
संस्थाको महिला सशक्तिकरण उपसमितिको समन्वयमा पछिल्लोपटक ६५ जना महिलाहरुलाई पाउपोस बनाउने तालिम प्रदान गरिएको हो । तालिममा सहकारीका महिला शेयर सदस्यहरुलाई सहभागी गराइएको थियो । यस्ता तालिमले महिलाहरु स्वरोजगार बन्ने मात्रै नभै उनीहरुको सशक्तिकरणमा पनि टेवा पुग्ने महिला शसक्तिकरण उपसमिति संयोजक माया उपाध्यायले बताइन् ।
तालिममा महिलाहरुले भित्र काम गर्दा लगाउने विभिन्न मखमली, ढाकाका जुत्ता चप्पल वनाउन सिकाइएको थियो । कार्यक्रममा २ जना प्रशिक्षक शुष्मा अर्याल र प्रतिमा पन्थले सहजीकरण गरेका थिए ।
प्रदेश नं. ५ कै ठूलो सहकारी दाबी गरिएको यो सहकारीले आफ्नो स्थापनाको रजत वर्ष मनाइरहेको छ । यसै क्रममा सहकारीले विभिन्न कार्यक्रमको आयोजना गर्दै आएको छ । संस्थाले यसै अवसरमा यस वर्ष कम्तिमा ५० जना लघु उद्यम व्यवसायी निर्माण गर्ने लक्ष्य लिएको संस्थाका वरिष्ठ व्यवस्थापक ईश्वरी मरासिनीले बताए । संस्थामा हाल ६ हजार ५ सय शेयर सदस्य र करिव २ अर्ब सम्पत्ति रहेको छ ।
डिभिजन सहकारी कार्यालय रुपन्देहीबाट ०६३ सालमा उत्कृष्ट सहकारीको रुपमा पुरस्कृत भएको यो सहकारीले राष्ट्रिय सहकारी महासंघबाट २०७० सालमा उत्कृष्ट सहकारी व्यवसाय पुरस्कार पाएको छ । त्यसैगरी ०७२ सालमा सहकारी बैंक लि. बाट ५ नं. प्रदेशमा उत्कृष्ट सहकारीको रुपमा पुरस्कृत भएको थियो ।à