खोज

दाङ,१९ पुस । घोराही उपमहानगरपालिका वडा न –६ का ७१ वर्षीय चुमादेबी अधिकारी प्रेसर र मधुमेहको मात्रा कति छ ? स्वास्थ्य अवस्था के कस्तो छ भनेर घोराही –६मा रहेको हेल्थ फाउन्डेसन नेपालले संचालन गरेको नि:शुल्क स्वास्थ्य शिबिरमा गइन् । उनलाई कुनै रोग नभएको डाक्टरको भनाइ थियो । ‘घर नजिकै हेल्थ फाउन्डेसन उपचार केन्द्र खुलेको छ । नियमित स्वास्थ्य परिक्षण गराउन पाइएको छ, खानपिनमा पनि ख्याल गरेको छु त्यही भएर होला अहिलेसम्म ठूलो रोग लागेको छैन’उनले भनिन् ।
सोही ठाउँका ३६वर्षीय जगत आचार्य पनि हेल्थ फाउन्डेसन नेपालले संचालन गरेको निशुल्क स्वास्थ्य शिबिरमा स्वास्थ्य परिक्षण गर्न आएको भेटिए । प्रेसर र सुगरको मात्रा शरिरमा कति छ भनेर परिक्षण गर्न आएको बताए । सुगरको मात्रा ठिकै देखियो प्रेसर हुनुपर्ने भन्दा धेरै रहेको उनको भनाइ छ । घर नजिकै स्वास्थ्य शिबिर हुँदा सहजै सेवा लिन पाएकोमा उनी खुशी भएका छन् ।
कार्यक्रम संयोजक प्रयास गौतमले बिरामीलाई कसरी उपचार गर्ने, कसरी स्वस्थ्य रहने विषयमा नागरिकलाई सचेतना दिने गरेको बताए । नागरिकलाई रोग लाग्नु भन्दा पहिले नै सचेत गराउने र रोग लागेकालाई समय मै उपचार गर्ने गरिएको बताए । उपचारमा आउने सम्पूर्ण बिरामीलाई निशुल्क औषधि दिने गरेको उनले बताए ।
घोराही उपमहानगरपालिका –६ जजरागाँउमा बबई खोलाको किनारमा रहेको ६ कट्ठा जमिनमा सुबिधा सम्पन्न स्वास्थ्य केन्द्रको घर बनेको छ । सुगर, पे्रसर, हाइपोटनको उपचार हुने गर्दछ । सो केन्द्रमा बरिस्ठ फिजिसियन एक जना, मेसिकल अफिसर ३ जना, नर्स २ जना , जन स्वास्थ अधिकृत ३जना मनोसामाजिक बिमर्सकर्ता २ जना , म्यानजेर १ र फाइनान्स १ , अप्रेसन यसोसेट एक र एक जना कार्यालय सहयोगीले सेवा दिइरहेका छन् ।
। अमेरिका र नेपालमा विभिन्न स्वास्थ्यसम्बन्धी गतिविधि सञ्चालन गर्दै आएको हेल्थ फाउन्डेसन नेपालले कोभिड १९ सम्बन्धी सरसल्लाह र उपचारका लागि निशुल्क हटलाइन सेवा सुरु गरेको थियो । हटलाइनमा चिकित्सक, नर्स र अन्य स्वास्थ्यकर्मीले सेवाग्राहीका प्रश्नहरुको उत्तर दिने गरिएको थियो ।
हेल्थ फाउन्डेसन नेपाल अमेरिका र नेपालका स्वास्थ्यकर्मीहरु मिलेर खोलेको संस्था हो । यसले बालबालिकाको कुपोषण घटाउन, सुत्केरी महिलाको स्वास्थ्य प्रबर्धन गर्न, मानसिक रोग लागेकालाई सामाजिक पुनस्र्थापना गर्न, दीर्घरोग सम्बन्धी अनुसन्धान र उपचार गर्न तथा बालबालिकालाई कम्पुटर सम्बन्धी शिक्षा प्रदान गर्न कार्यक्रमहरु गरिरहेको छ । दाङमा हेल्थ फाउन्डेसन नेपालले निर्माण गर्न लागेको मानसिक रोग निवारण केन्द्रका लागि ६० लाख बराबरको आर्थिक सहयोग गर्ने निर्णय भएको छ ।