खोज

बुटवल, २९ मंसिर ।

बुटवल उप महानगरपालिका वडा नम्बर १० का वडा सचिव रामप्रसाद पौडेलको बिदाई र नयाँ सचिव गणेश न्यौपानेलाई एक समारोहका बीच स्वागत गरिएको छ ।

त्यस अवसरमा बोल्दै वडाअध्यक्ष बलबहादुर पुनले वडा सचिव पौडेलले वडामा कार्यरत रहँदा निर्वाह गरेको भूमिका र कार्यकुशलताप्रति प्रशंसा गर्दै आगामी कार्यभारका लागि समेत शुभकामना दिए ।

त्यस्तै उनले नयाँ आगन्तुक वडा सचिव गणेश न्यौपानेलाई स्वागत गर्दै वडाको कार्यसञ्चालनमा सामूहिक भावनाका साथ अघि बढ्ने बताए । जनताका काममा आपसमा हातेमालो गरेर अघि बढ्ने प्रतिवद्धता पनि उनले व्यक्त गरे ।

त्यस अवसरमा उनले स्वास्थ्य बिमा कार्यक्रमका बारेमा पनि जानकारी गराएका थिए । कार्यक्रममा बुटवल उपमहानगरपालिकाका स्वास्थ्यकर्मी पुजन ज्ञवालीले प्रजनन् स्वास्थ्यका बारेमा जानकारी गराएका थिए ।

कार्यक्रममा महिला स्वास्थ्य स्वयंसेविका शारदा पौडेल, माया बराल, डिल्लीराज अर्याल, नेपाली काँग्रेस वडा नम्बर १० का सभापति किसनबहादुर थापा, कला केसी, समाजसेवी हुमप्रसाद अधिकारी, जनमुक्ति पार्टीका केशर बहादुर गुरुङ, नेकपा माओवादी केन्द्रका दिलिप सुनार, रामबहादुर कार्की, समाजसेवी दुर्गाप्रसाद, वडा कार्यालयका उर्मिला श्रेष्ठ, यमुना काउचालगायतले वडाको विकास निर्माणदेखि लिएर वडालाई सुन्दर बनाउने काममा सचिवको महत्वपूर्ण भूमिका रहने बताएका थिए ।

यसैबीच कार्यक्रमकै अवसरमा मानवसेवा आश्रम दाङ जिल्लाका सयोंजक हिरु जोसीले पुस ९ गते मानवताका लागि सांगेतिक यात्रा नेपथ्य लाइभ कन्सर्ट हुन लागेको भन्दै त्यसमा एकहजार रुपियाँको टिकट किनेर सहयोग गरिदिन आग्रह गरेका थिए । उक्त रकमबाट मानवसेवा आश्रमको निर्माणाधीन भवनलाई पूर्णता दिइने उनले बताए ।