खोज

काठमान्डौ, २१ मंसिर ।

मधेश प्रदेशका नवनियुक्त मुख्यमन्त्री कृष्णप्रसाद यादवले आज पद तथा गोपनीयताको शपथ ग्रहण गरेका छन् । उनलाई प्रदेश प्रमुख सुरेन्द्र लाभ कर्णले शपथ खुवाएका हुन्। यादव यही मंसिर २४ गते विश्वासको मत लिन तयारीमा छन् ।

कांग्रेस संसदीय दलका नेता यादवलाई मंसिर १९ गते ७ दलका ७७ प्रदेशसभा सदस्यहरूको समर्थनमा मुख्यमन्त्री नियुक्त गरिएको थियो । उनलाई कांग्रेस, जसपा नेपाल, जनमत, तत्कालीन नेकपा माओवादी केन्द्र, लोसपा र तत्कालीन एकीकृत समाजवादीका सांसदहरूले समर्थन गरेका थिए ।

संविधानको धारा १६८ को उपधारा ३ बमोजिम ठूलो दलको हैसियतमा मुख्यमन्त्री बनेका नेकपा एमाले संसदीय दलका नेता सरोजकुमार यादवले मंसिर १७ गते राजीनामा दिएपछि मधेश प्रदेशको सरकारको नेतृत्व कांग्रेस दलका नेता यादवको जिम्मेवारीमा आएको हो ।

गत कार्तिक २३ गते राति संविधानको धारा १६८ को उपधारा ३ अनुसार एमालेका यादव मुख्यमन्त्री नियुक्त हुँदा सातदलीय गठबन्धनले सर्वोच्च अदालतमा रिट दायर गरेको थियो । सर्वोच्च अदालतले २४ घण्टाभित्र विश्वासको मत लिन र मत प्राप्त नगरे अर्को सरकार गठन गर्न आदेश दिएको थियो ।

यादवले प्रदेशसभामा सम्बोधन गर्दै राजीनामा दिएका यादवको सट्टा गठबन्धनका दलहरूले मुख्यमन्त्रीको रूपमा उनलाई चयन गरेका थिए । शपथ ग्रहणसँगै उनले आजै सानो आकारको मन्त्रीमण्डल पनि गठन गर्ने तयारी गरेका छन् ।