खोज

बुटवलको चौराहा–गोलपार्क खण्डको सडक बिस्तार अनिश्चित भएको छ । बुटवल बेलहिया–व्यापारिक मार्ग परियोजना अन्तर्गत निर्माणाधिन–६ लेन सडक बिस्तारको काम सर्वोच्च अदालतको आदेशले अनिश्चित बनाएको हो । सडक सीमामा पर्ने घर टहरा र जग्गा प्राप्त गर्ने कार्य सम्पन्न गरेर मात्र सडक बिस्तार गर्न गत वैशाख १२ गते उच्च अदालत तुलसीपुरको बुटवल इजलासले परमादेश जारी गरेको थियो ।

उक्त परमादेश पुनरावलोकनको माग गर्दै आयोजनाले सर्वोच्चमा निवेदन दिएकोमा सर्वोच्चका न्यायाधीश पुरुषोत्तम भण्डारीको एकल इजलाशले उच्च अदालतकै परमादेशलाई सदर गरेको हो । “न्याय प्रशासन ऐन २०७३ को दफा १२ को उपदफा १ को खण्ड “क” को अवस्था विद्यमान रहेको नदेखिँदा प्रस्तुत मुद्दामा दोहो¥याइ हेर्ने अनुमति प्रदान गर्न मिलेन”–सर्वोच्चको आदेशमा भनिएको छ । बुटवल–बेलहिया व्यापारिक मार्ग आयोजनाले सडक क्षेत्राधिकार ८२ फिटभित्र बनाएका घर टहरा लगायतका भौतिक संरचना हटाउने कार्य जारी राखेकै बेला गत बैशाख १२ गते उच्च अदालतले परमादेश जारी गरेको थियो । सोही परमादेशको पुनरावलोकन गर्नुपर्ने आयोजनाको मागमा सर्वोच्चले पुनरावलोकन गर्न नमिल्ने फैसला सुनाएको हो । सडकको पक्षमा सर्वोच्चको आदेश आउने अनुमान गरेका आयोजनाका अधिकारीहरू भने सर्वोच्चको आदेशले अब सडक बिस्तारको काम नहुने बताएका छन् । “बुटवलको सडक बिस्तार अब नहुने भयो, सर्वोच्चको आदेश आएसँगै अब सडक बिस्तारको काम अघि बढाउन मिलेन”–आयोजनाका इन्जिनियर योगेन्द्र अधिकारीले भने । आयोजनाले बुटवलको सडकमा बिस्तार बाहेकका अरू काम भने जारी राख्ने जनाएको छ । मुख्य सडकमा अझै एउटा लेयर थप्न बाँकी रहेकाले त्यसलाई पूरा गर्ने र खानेपानीसँग समन्वय गरी त्यससँग सम्बन्धित काम पनि सक्ने आयोजना प्रमुख जिवेन्द्र मिश्राले बताए । “सडक बिस्तारको बारेमा अब सरकारले नै पुनरावलोकनमा जाने भनेकाले अव आयोजनाका तर्फबाट सडक विभाग नै फेरि सर्वोच्चमा पुनरावलोकनका लागि जानेछ”–उनले भने । सडक क्षेत्राधिकार मिचेर बनाएका भौतिक संरचना हटाउन गतवर्षको भदौ ५ गते सम्मको म्याद दिँदै सडक कार्यालयले सूचना निकालेपछि प्रभावितले उच्च अदालतमा रिट दायर गरेका थिए । सडक बिस्तारबाट प्रभावितमध्ये नारायणीदेवी प्रधान, चोपनारायण श्रेष्ठ सहित ३८ जनाले उच्च अदालत तुलसीपुर बुटवल इजलासमा सडक कार्यालयले कानूनी प्रक्रिया पूरा नगरी घर भत्काउन लागेको भन्दै रिट दायर गरेका थिए ।

उच्च अदालत तुलसीपुर दाङको बुटवल इजलासले सडक ऐन अनुसार जग्गा प्राप्त गरेर मात्रै विस्तारको काम अगाडि बढाउन परमादेश जारी गरेपछि घर भत्काउने काम रोकिएको थियो । आयोजनाले डोजर लगाएर यस अगाडि नै ७ वटा घर भत्काइसकेको छ । बुटवल बेलहिया व्यापारिक मार्ग परियोजना अन्तर्गत निर्माणाधिन ६ लेन सडक बुटवलको राजमार्ग चौराहदेखि गोलपार्क सम्मको साढे तीन किलोमिटर दुरीमा सडकको ८२ फुटभित्र पर्ने ३ सय ११ घर भत्काउनु पर्नेछ । यो सडक निर्माणको ठेक्का डेढ बर्षअघि नै कंचनजंघा–बिरुवा जेभिले पाएको हो । उसले ३० महिनामा सक्ने भनिएको सडक विस्तारको काम डेढ बर्ष ढिलो भइसकेको छ ।