खोज

साउन कृष्ण औंशी देखि भाद्र कृष्ण नवमीसम्म लगभग एक महिना रुकुम पश्चिमको सदरमुकाम मुसिकोट खलंगा बजारमा नाचिने सांस्कृतिक पर्ब लाखे जात्रा मंगलबार खुलामञ्च बराहटाकुारमा सोमबार धुमधामका साथ समापन गरिएको छ ।
बिभिन्न बजागाजाहरूको साथमा सदरमुकाम खलंगाको बजार क्षेत्रमा रहेका घरको आँगनमा जाने र नाच्दै रमाउने यो जात्राले आपसी सद्भाव र सहिष्णुता कायम गर्न सहयोग गरेको र यो नाच २०४० सालदेखी हरेक बर्ष नाच्दै आएको बताउँछन् स्थानीय टेकबहादुर नेपाली । ‘हाम्रो आफ्नो सांस्कृतिक पहिचान हो लाखे जात्रा’ नेपाली भन्छन्, ‘यसले सास्कृतिक सद्भाव कायम गरी आपसी सहिष्णुता निर्माण गर्न सहयोग पुगेको छ ।’
श्रीमदभागवतको कथालाई अधार बनाई कृष्ण चरित्रमा आधारित यो नाचको मुख्य भुमिकामा लाखे संस्कृतीमा आधारित एकजना लाखे, एकजना स्वाके र एकजना छोटामारोरी गरी तिन जनाको नृत्य समुहका साथमा यो नाच महिनाभरी नाचिन्छ । खेत–खल्यानको काम सकेर उम्किएपछी त्यो बेलाको धुलो, मैलो पखाल्नेगरी साउने झरी पर्ने र त्यो झरीले कुनैपनि हानी नोक्सानी नगरोस् भन्ने कामना गर्दै बर्खायामको समयलाई रमाईलो गरी व्यतित गर्न यो नाच महिनाभरी नाचिने गरेको रुकुम लाखे जात्रा व्यवस्थापन समूहका अध्यक्ष चुडामणी नेपालीले बताए ।
भाद्र कृष्ण अष्टमीका दिन मथुराको कारगारमा माता देवकीको आठौ गर्भबाट श्रीकृष्ण भगुवानको जन्म भएपछि र उक्त खुसीमा नाचगान गर्दै रमाउदै कृष्ण जन्माष्टमीलाई उत्सबको रूपमा बनाउने र कृष्ण जन्माष्टमीको भोलिपल्ट भगुवान कृष्णले आफुलाई मार्न खोज्ने आफ्नै मामा कंशको अन्याय र अत्याचारलाई अन्त्य गर्दै कंशको हत्या गरेको दृष्यलाई लाखे जात्रा समापनको दिन कलाकारहरूले निकै कलात्मक तरिकाबाट प्रस्तुत गर्ने गरेका छन् । समापनको दिन यो जात्रा हेर्न सदरमुकाम खलंगामा जिल्लाका बिभिन्न स्थानबाट सर्बसाधारण आउने र उक्त दिन सदरमुकाममा लाखे मेला पनि लाग्ने गरेको छ ।