खोज

बुटवल, २४ कात्तिक । नेकपा एमालेबाट पाल्पा–२ का प्रतिनिधि सभा सदस्य उम्मेदवार ठाकुर गैरेले जनताले यसपटक पटक पटक अवसर पाएका पुराना नेतालाई नभई नयां नेतालाई रोज्ने बताएका छन् । बुटवलमा पत्रकार सम्मेलन गर्दै गैरेले आफ्ना प्रतिस्पर्धी सोमप्रसाद पाण्डेलाई लक्षित गर्दै पटक पटक चुनाव जितेर पनि उल्लेख्य काम गर्न नसकेका नेतालाई यसपटक विदा गर्नुपर्ने बताए । एमाले विभाजन गरेर विपक्षीलाई सरकारमा पु¥याउने दलका उम्मेदवारलाई जनताले अस्वीकृत गर्ने गेरेको दावी छ ।

नेकपा एकीकृत समाजवादीका उम्मेदवार सोमप्रसाद पाण्डेलाई इंगित गर्दै गैरेले एकलाख ५ हजार मतदाता भएको क्षेत्रमा ४३३ मत भएको पार्टीको उम्मेदवारले चुनाव नजित्ने ठोकुवा गरे । गैरेले भने–‘यसपटक नेताको सम्धीलाई हैन जनताको छोरालाई जिताउंछन् ।’

पाण्डे पार्टी अध्यक्ष माधव नेपालका सम्धी भएकै कारण निकै कमजोर जनमत हुंदा पनि भागबण्डामा यो क्षेत्र नेकपा एकीकृत समाजवादीलाई दिइएको गैरेले बताए । सिद्धबाबामा सुरुङ मार्ग बनाएर सडक यात्रा सुरक्षित बनाउने, पाल्पासंग जोडिएका सडकहरु पीच र स्तरोन्नति गर्ने, कृषिको व्यवसायिकरण र आधुनिकरण तथा पर्यटनमार्फत पाल्पालाई समृद्ध बनाउने, गुणस्तरीय शिक्षा, स्वास्थ्य, खानेपानीमा लगानी बढाउने, रोजगारी सिर्जना गर्दै सुखी पाल्पाली समृद्ध पाल्पा नै आफ्नो चुनावी एजेण्डा रहेको गैरेले बताए । यस्तै मगर,नेवार लगायतका जातिको संस्कृति,भाषा,कला संरक्षण, किसानलाई मल र सिंचाई पनि आफ्नो प्राथमिकतामा रहेको गैरेले बताए ।

पार्टी स्थापना भएको दुई वर्ष नभएको पार्टीका उम्मेदवारले नेकपा एमालेको सरकार र पार्टीको संगठनको आधारमा गरेका कामलाई आफूले गरेको भन्दै डलर खर्चेर फेसबुकमा प्रचार गर्नु अराजनीतिक काम भएको गैरेको टिप्पणी छ । ‘पाल्पामा जे जति काम भएका छन् तयो एमालेको सरकार हुंदा पार्टीले गरेको हो, व्यक्तिले हैन’ – गैरेले भने । आफूले युवा पुस्ताको भावना र आकांक्षा बुझेर काम गर्ने गैरेको वाचा छ ।

अखिलको अध्यक्ष हुंदा विद्यार्थीलाई बस भाडामा ४५ प्रतिशत छुटको व्यवस्था गराउन सरकारसंग सहमति गराई भूमिका खेलेको,राष्ट्रियताको पक्ष र संविधानसभाको लागि भएका आन्दोलनमा अग्रपंक्तिमा खटेको र संसदीय चुनावमा पहिलोपटक उम्मेदवार भएकाले मतदाताबाट सकारात्मक प्रतिक्रियाले उत्साहित बनाएको गैरेले बताए । गत वैशाखमा भएको स्थानीय तह निर्वाचनमा एमालेले ३० हजार ५३६ मत,कांग्रेसले २९ हजार ३९, माओवादीले ४ हजार ३१३ र एकीकृत समाजवादीले ४३३ मत पाएका थिए ।