खोज

लमही, २० कात्तिक ।

मंसिर ४ गते हुने आम निर्वाचनको चटारो नेताहरुलाई जति छ, किसानलाई पनि धान भित्र्याउने र भित्र्याएको धान बिक्री गर्ने चटारो उत्तिकै छ । नेताहरु भोट माग्दै घरदैलोमा पुगे पनि ‘मानो रोपेर मुरी’ भित्र्याउन लागेका किसान भने धानको उचित मूल्य नपाउँदा चिन्तित देखिएका छन् ।

एकाविहानैदेखि साँझ अबेरसम्म नेताहरु भोट माग्न खेत खेतमै दौडधुपमा छन्, किसान पनि खेतबारीमै धान काट्ने , भित्र्याउन देखि धान विक्री सम्मको काममै व्यस्त छन् ।

किसान काममै व्यस्त रहँदा उम्मेदवार बनेका नेताहरु भने खेतबारीमै पुगेर आफ्नो पक्षमा भोट मागिरहेका छन् । उम्मेदवारहरु खेतबारीमै पुगेपनि असारमा धान रोप्ने समयमा मलसँगै पानीको हाहाकार बेहोरेका किसानलाई यस वेला धानको उचित मूल्य नपाउँदा भने ‘हर्ष न बिस्मात’ जस्तै छ ।

आफ्ना उम्मेदवार काम गर्ने ठाउँमै आएकोमा किसानहरु न खुशी व्यक्त गर्न सकेका छन्, न खुलेरै दुःख व्यक्त गर्न सकेका छन् । ‘नेताले के गर्छन् र उनीहरुको कुरा किन सुन्नु प¥यो ?,’ लमही नगरपालिका–४ कि खिमा कुमालले प्रश्न गरिन् । निर्वाचनको मितिसमेत थाहा नपाएकी उनले नेताले भनेको के नै हुन्छ र जस्तो लाग्ने गरेको बताइन् । दशैंमा परेको अविरल वर्षाले सबै धान डुबेपछि चिन्तामा रहेकी कुमालले आफूहरुको दुःख हिजोजस्तै आज पनि उस्तै रहेको बताइन् ।

‘नेताहरु त आउँछन्, भाषण गरेर जान्छन्, उनीहरुले केही गर्दैनन्,’ उनी भन्छिन्, ‘यहाँ पहिले पनि डुवान हुन्थ्यो आज पनि डुवान हुन्छ । के पाएका छौँ र हामीले ?’
उनले समयमै मल पाउन नसकेको भन्दै अहिले भारतीय बजारबाट मल ल्याएर धान फलाएको तर मेहेनत अनुसारको मूल्य नभएको गुनासो गरिन् ।

कुमालको गुनासो जस्तै सोही वडाकै अर्का किसान छोटेलाल चौधरीले आफ्नो धान डुवानमा पर्दा नोक्सान भएको पीडा सुनाए । नेताहरुले अघिल्लो निर्वाचनमा डुवानको समस्या समाधान गर्ने बताएको भए पनि केही नगरेको उनको गुनासो छ । ‘नेताहरुको कामसाम केही होइन, कुरामा मात्रै गर्छन,’ उनले भने । चौधरीले भोट माग्न नेताहरु आएमा सरकारले धान खरिद गरिदिन र डुवानको समस्याका बारेमा फेरि जानकारी माग राख्ने बताए ।

किसान आफूहरुले जिताएर पठाएका नेताहरुले केही गरेनन् भन्दै गर्दा मंसिर ४ गतेको आम निर्वाचनका लागि उम्मेदवार भएका नेताहरु भने जनतालाई रिझाउन खेतबारीमै पुगेका हुन् । उनीहरु धान काट्न सघाउने सम्मको गतिविधि गर्न भ्याएका छन् । देउखुरी धान उत्पादनको हिसावले निक्कै अगाडि छ । उत्पादन गरेको धान सहज रुपमा उचित मूल्यमा बिक्री नभएको किसान वताउँछन् । अहिले देउखुरीमा मसिनो धान प्रति क्वीन्टल २७ सय र मोटा धान २३ सय रुपैयाँ क्वीन्टलमा बिक्री भइरहेको किसानहरु बताउँछन् ।

क्षेत्र नम्बर–१ मा गठबन्धनबाट नेकपा एसका सहरी विकास मन्त्री मेटमणि चौधरी उम्मेदवार छन् । एमालेबाट शान्ता चौधरी उम्मेदवार छिन् । उनीहरुको चुनावी प्रचारप्रसार पनि आक्रामक छ । क्षेत्र नम्बर–२ बाट गठबन्धनबाट माओवादी केन्द्रकी नेतृ रेखा शर्मा र एमालेबाट पार्टीका महासचिव शंकर पोख्रेल र क्षेत्र नम्वर ३ वाट गठवन्धनबाट दिपक गिरी र एमालेवाट कोमल वली प्रतिस्पर्धामा छन् । उनीहरुको पनि चुनावी गतिविधि तीब्र भइरहेको छ । उम्मेदवारहरु जनताको सेन्टिमेन्ट कसरी क्याच गर्न सकिन्छ भन्नेमै ध्यान केन्द्रित गरेका छन् ।