खोज

भैरहवा।

रुपन्देहीको भैरहवाका होटल, रेष्टुरेण्ट तथा स्पा सेन्टरमा अनुगमन गरिएको छ । आइतबार सिद्धार्थनगर नगरपालिकाकी उपप्रमुख उमा अधिकारीको नेतृत्वमा अनुगमन गरिएको हो ।

होटल, रेष्टुरेण्ट तथा स्पा सेन्टरको नाममा केही स्थानमा मापदण्डविपरीत कार्य भइरहेको धेरै गुनासो आएपछि अनुगमन गरिएको उपप्रमुख तथा नगरपालिकाको अनुगमन समिति संयोजक अधिकारीले बताइन् । बसपार्क र देवकोटाचोक क्षेत्रमा सञ्चालित केही होटल, रेष्टुरेण्ट तथा स्पा सेन्टरमा अनुगमन गरिएको उनले जानकारी दिइन् ।

‘होटलको नाममा देह व्यापार लगायत अन्य अवैध गतिविधि गर्न पाइँदैन । मापदण्ड र प्रक्रिया पूरा गरेर मात्र होटल सञ्चालन गर्नुपर्छ । अनुगमनको क्रममा होटल, रेष्टुरेण्ट तथा स्पा सेन्टरमा सरसफाईमा ध्यान दिन, यहाँ कार्यरत कर्मचारीलाई पोशाक र परिचयपत्रको अनिवार्य व्यवस्था गर्न सञ्चालकलाई सचेत गराइएको छ । नेपालको कानूनले बर्जित गरेका कुनै पनि कार्य गर्न पाइँदैन । कानूनविपरीत कार्य गर्नेलाई कानूनी दायरामा ल्याउनुपर्छ । सभ्य समाज निर्माण गर्नुपर्छ, ’उनले भनिन् ।

जिल्ला प्रहरी कार्यालय रुपन्देहीकी सूचना अधिकारी तथा प्रहरी नायव उपरीक्षक (डीएसपी) लक्ष्मी खनालले बसपार्क लगायत अन्य क्षेत्रहरुमा सञ्चालित होटलहरुमा अनुगमन गरिएको बताइन् । सिद्धार्थनगर नगरपालिकाको उपप्रमुखसहित प्रहरीको संयुक्त टोलीले होटलहरुमा अनुगमन गर्दा अवैध क्रियाकलाप गरिरहेको अवस्थामा ६ जना महिलालाई नियन्त्रणमा लिइएको जानकारी दिइन् । त्यस्तै २ जना होटल सञ्चालकहरुलाई पनि नियन्त्रणमा लिइएको डीएसपी खनालले जानकारी दिइन् । केही फरार भएको उनले बताइन् ।

होटलहरुमा अवैध किसिमका क्रियाकलाप भइरहेको जनगुनासो आएपछि अनुगमन गरिएको डीएसपी खनालले बताइन् । ‘नियन्त्रणमा लिइएका महिला तथा होटल सञ्चालकलाई सोधपुछ तथा अनुसन्धानकै क्रममा छौं, त्यसपश्चात कानूनी प्रक्रिया अघि बढाउँछौं, ’उनले भनिन् ।