खोज

सल्यान, २ चैत ।

चकलेटको लोभ देखाएर ललाईफकाई आठ वर्षमुनिका तीनजना बालिकालाई बलात्कार गरेको आरोपमा सल्यान प्रहरीले एकजना ५८ वर्षीय पुरुषलाई पक्राउ गरेर अनुसन्धान गरिरहेको छ । जिल्लाको कालिमाटी गाउँपालिका–४ का ५८ वर्षीय इन्द्रबहादुर पुनलाई पक्राउ गरेर बालिका बलात्कारको अभियोगमा अनुसन्धान गरिरहेको हो ।

जिल्ला प्रहरी कार्यालय सल्यानका अनुसार गत चैत ९ गते दिउँसो आफ्नै किराना पसलमा सामान लिन आएका ८ वर्षमुनिका तीन बालिकामाथि पुनले चकलेट र बिस्कुट दिएर ललाइफकाइ जबरजस्ती करणी गरेका थिए । उनले बालिकाहरूलाई पसलभित्रै राखेर चक्लेट दिएर ३ बालिकाको गोप्य अंगमा अनुचित ढंगले छोएर जबरजस्ती करणी गरेको भन्ने अभिभावकको जाहेरीका आधारमा पक्राउ गरेर अनुसन्धान गरिरहेको जिल्ला प्रहरी कार्यालय सल्यानका प्रहरी प्रमुख डिएसपी केशर कुमार न्यौपानेले जानकारी दिए ।

बालिकाहरू सुरुमा डरले घरमा केही नभने पनि उनीहरूको व्यवहार अस्वाभाविक देखिन थालेपछि अभिभावकहरूले सोधपुछ गरेका थिए । त्यसपछि घटना खुलेको हो । बालिकाले दिएको बयानका आधारमा पीडित पक्षले प्रहरीमा जाहेरी दिएका थिए । उजुरीपछि प्रहरी टोलीले पुनलाई पक्राउ गरेर अनुसन्धान सुरु गरेको डिएसपी न्यौपानेले जनाए ।

घटना विवरण अनुसार इन्द्र बहादुरको पसलमा तीन जना बालिकाहरुसँगै सामान किन्न गएका थिए । इन्द्रले सुरुमा २ जना बालिकालाई ललाईफकाई चक्लेट र बिस्कुटमा लोभ्याए, अनि बालिकाहरु पनि चक्लेट र बिस्कुटमा लोभिए । त्यसपछि इन्द्रले बालिकाहरुको गोप्य अगंमा हात लिने र जबरजस्ती करणी गर्न थालेपछि तीन जना मध्ये एक जना बालिका भागेकी थिइन् । दुई जना बालिका भने जबरजस्ती करणीको शिकार हुन पुगेको प्रहरीको भनाइ छ । फेरि साँझको ६ बजेतिर ती भागेकी अर्की बालिकामाथि पनि जबरजस्ती करणी भएको देखिएको डिएसपी न्यौपानेको भनाइ छ ।

इन्द्रले सुरुमा दुई जना बालिकामाथि जबरजस्ती करणी गरेको तर अर्की बालिकामाथि त्यसो नगरेको बयान दिएपनि अनुसन्धान गर्दै जाँदा उसले अर्को बालिकामाथि पनि जबरजस्ती करणी गरेको स्वीकारेको प्रहरीले जनाएको छ ।