खोज

भैरहवा, २६ कार्तिक ।

सिद्धार्थ उद्योग बाणिज्य संघ, रूपन्देहीको आयोजनामा आउँदो मंसिर २० गतेदेखि भैरहवामा ‘नवौं लुम्बिनी राष्ट्रिय महोत्सव–२०८१’ हुने भएको छ । ‘पर्यटन, उद्योग, कृषि र व्यापार, राष्ट्रिय समृद्धिको आधार’ भन्ने मूल नाराका साथ पुस १ गतेसम्म संचालन हुने उक्त महोत्सवमा विभिन्न सेवा तथा बस्तुका ३ सय वटासम्म स्टल रहने सिद्धार्थ उद्योग बाणिज्य संघले जनाएको छ ।
संघका अध्यक्ष तथा महोत्सव मूल आयोजक समितिका संयोजक ठाकुरकुमार श्रेष्ठले आर्थिक अवस्था दयनीय भएकाले मेला–महोत्सवको आयोजना गर्नका लागि अहिलेको परिस्थिति अनुकुल नभएको भए पनि स्थानीय व्यवसाय प्रबद्र्धनका लागि यो महोत्सवको आयोजना गरिएको बताए । उनले महोत्सवमा स्वदेशी उत्पादनलाई महत्त्व दिएको समेत जानकारी दिए । महोत्सवमा मर्चवारको काउली देखि मुस्ताङको स्याउसम्म राखेर स्थानीय उत्पादनलाई प्रोत्साहन गरि पर्यटन प्रबर्द्धन हुने उनले बताए । ‘यो महोत्सव हामीले नाफा कमाउने उद्देश्यले आयोजना गरेका होइनौं’, श्रेष्ठले भने, ‘स्थानीय व्यवसायको प्रबद्र्धन गर्नका लागि निरन्तरता दिएका हौं ।’ महोत्सव अवधिमा स्थानीय उत्पादन तथा व्यवसाय प्रबद्र्धन गर्नका लागि विभिन्न बिषयगत बिज्ञसहितको अन्तरक्रिया तथा छलफल कार्यक्रम गरेर महोत्सवलाई सार्थक बनाइने दावी उनले गरे ।महोत्सवले स्वदेशी तथा गुणस्तरीय बस्तु तथा सेवाहरूको उपभोगप्रति उपभोक्ताहरूलाई जागरुक बनाइ सीमावर्ती बजारहरूमा पाइने सामानहरूबीचको तुलनात्मक मूल्यका वारेमा जानकारी दिने र स्थानीय स्तरमा उत्पादित घरेलु तथा हस्तकलाका सामाग्रीको बजार प्रबद्र्धन गर्ने बिश्वास लिइएको उनले जनाए ।

रूपन्देहीलाई पर्यटकीय, औद्योगिक तथा व्यापारिक केन्द्रको रूपमा बिस्तार गर्न, यस क्षेत्रको विभिन्न जाती तथा समुदायको कला संस्कृतिको संरक्षण गर्दै बिशेष गरि सिद्धार्थनगर र लुम्बिनीमा देशको आन्तरिक र बाह्य पर्यटन प्रबद्र्धन गर्ने, विभिन्न जिल्लाका मौलिक तथा बिशिष्टता पहिचान भएको बस्तु तथा उत्पादनको प्रदर्शनी तथा प्रबद्र्धन गर्ने मुख्य उद्देश्य यस महोत्सवको रहेको छ ।‘महोत्सवमा उपभोक्ता र उत्पादक एवं किसानहरूको प्रत्येक्ष भेटघाट हुने भएकाले यस भेगमा उत्पादित कृषिजन्य बस्तुहरू माछा, कुटिर तथा घरेलु र राष्ट्रिय स्तरका उद्योगहरूबाट उत्पादित उत्पादनहरूको विशेष प्रस्तुतीकरण गरिनेछ’, अध्यक्ष श्रेष्ठले भने, ‘यसबाट नयाँ उद्यमीहरूको विकास र कृषिको व्यवसायिककरण पनि हुनेछ ।’
संघका बरिष्ठ उपाध्यक्ष नेत्रप्रसाद आचार्यले महोत्सवलाई सफल र सार्थक बनाउन आयोजक सिद्धार्थ उद्योग बाणिज्य संघको मात्र नभएर यस क्षेत्रका पुरै स्थानीयबासीको महत्वपूर्ण भूमिका रहने बताए । महोत्सवको अवलोकन गर्नका लागि उत्साहित बनाउने बतावरण तयार गरि महोत्सवमा भएका गतिबिधिलाई उजागर गरिदिन उनले संचारकर्मीहरूलाई आग्रह गरे ।
महोत्सवमा सिमावर्ती भारतीय सहरबाट पनि सहभागिता रहने भएकाले पर्यटन प्रबद्र्धन तथा आर्थिक गतिबिधि चलायमान हुने बिश्वास लिइएको छ । महोत्सव अवधिमा बुद्ध जन्मस्थल लुम्बिनी र बुद्धसँग सम्बन्धित रहेका तिलौराकोट, देवदह, रामग्राम जस्ता पुरातात्विक तथा पर्यटकीय स्थलहरूमा बिशेष प्याकेज बनाइ भ्रमणको व्यवस्था गराइएको महासचिव कृष्णप्रसाद घिमिरेले जानकारी दिए । महोत्सवमा करिब १० करोड रूपैयाँ बराबरको कारोबार हुने अपेक्षा संघको छ । संघले २०६१ सालदेखि भैरहवामा मेला महोत्सव आयोजना गर्न सुरु गरेको हो । यसअघि आठौपटक सफलतापूर्वक महोत्सव आयोजना गरेको संघले नवौं महोत्सव पनि सफल र भव्य बनाउने जनाएको छ । महोत्सवमा कृषि, पर्यटन, अटो मोबाइल्स, आईटी, घरेलु उत्पादनको विशेष प्रबद्र्धन गरिनेछ । यस्तै, राष्ट्रिय तथा स्थानीय कलाकारको दैनिक प्रस्तुती रहनेछ ।