खोज

बुटवल, ५ मंसिर । होटल तथा रेष्टुरेन्ट ब्यवसायी संघ रुपन्देही शाखाले सिरुवारी होमस्टे अध्ययन, अवलोकन भ्रमण गरेको छ । आन्तरिक पर्यटन प्रवद्र्धनको उदेश्यका साथ होटल तथा रेष्टुरेन्ट ब्यवसायी संघ रुपन्देहीले नेपालकै पहिलो, उत्कृष्ट गन्त्ब्य र होमस्टेको पाठशालाका रुपमा परिचित सरुवारी होमस्टे अध्ययन भ्रमण गरेको हो ।

स्याङ्जा सिरुबारीमा २५ वर्षअघि गाउँ पर्यटनको अवधारणामा ‘होमस्टे’ को उद्गमका रुपमा सिरुबारीलाई लिईन्छ । भ्रमण अथवा यात्राक्रममा ग्रामीण भेगका घरमा बास बस्ने, स्थानीय खाना परिकार, रहन सहनसहित घरघरमा खाने अर्थमा होमस्टेले जनाउछन । बेलायती र भारतीय सेनामा जागिर भएका र रिटायर्डको बस्ती सिरुबारीमा घरबास पर्यटनका अभियन्ता पूर्वसांसद क्याप्टेन रुद्रमान गुरुङको विशेष पहलमा २०५४ सालमा ‘होमस्टे’ गाउँ सञ्चालनमा ल्याइएको थियो । चिटिक्क मिलेको बस्तीलाई स्थानीयले गुरुङ जीवनशैलीको जीवन्त चित्रणका साथै मौलिक संस्कृतिका माध्यमबाट पर्यटकलाई न्यानो आतिथ्य प्रदान गर्ने गरेका छन । गाउँ सिरानबाट देखिने सूर्योदयका साथै सूर्यास्तका मनमोहक दृश्य सिरुवारी पुग्ने पर्यटकले हेर्न पाएका छन् ।

गुरुङ समुदायको बहुल क्षेत्र सिरुबारी नेपालकै पहिलो ग्रामीण पर्यटकीय क्षेत्र हो । यो क्षेत्र समुन्द्री सतहदेखि झण्डै दुई हजार फिट उचाईमा पर्छ । स्थानीयस्तरमा उत्पादित कृषिजन्य वस्तु प्रयोगबाट तयार गरिएका खानाले सिरुबारी पुग्ने पर्यटकलाई स्वागत र जैविक घरबास अर्थात् ‘होमस्टे’ले स्वागत गरिन्छ ।

पर्यटन ब्यवसायमा रहेका ब्यवसायीहरुलाई आन्तरिक पर्यटन प्रवद्र्धनसंगै सिकाइ हुने गरि भ्रमण योजना बनाएको होटल तथा रेष्टुरेन्ट ब्यवसायी संघ रुपन्देहीका अध्यक्ष लेखनाथ भण्डारीले बताए । सिरुबारीमा ‘होमस्टे’ पाठशालाका रूपमा स्थापित भएको उनले बताए । दुई दिने भ्रमणको क्रममा गाउँले व्यवहार, सरसफाइ एवं स्थानीय अर्गानिक परिकारको स्वाद तथा संस्कृति ‘होमस्टे’ ब्यवसायीहरुलाई धेरै सिकाई भएको उनले बताए ।

भ्रमण संयोजक पर्यटन उपाध्यक्ष रोमाकान्त पाण्डेले संघको वार्षिक कार्ययोजना अनुसार समय ब्यवस्थापन गरि अध्ययन भ्रमण कार्यक्रम गरिएको बताए । बाँजागाजासाथ फूलमालाबाट आमा समूह, युवा क्लब तथा पर्यटन समिति पदाधिकारीले गरेको स्वागत, खानेबस्ने व्यवस्था निक्कै उत्कृष्ट रहेको उनले बताए । सांस्कृतिक कार्यक्रममार्फत मनोरञ्जनलाई अन्य क्षेत्रमा समेत चलाउनु सकिने सम्भावना जगाएको उनले बताए ।

भ्रमण टोलीमा पूर्व अध्यक्ष प्रेम पाण्डे, सल्लाहकार कुलचन्द्र पाण्डे, बाबुराम श्रेष्ठ, पूर्व वरिष्ठ उपाध्यक्ष जिवन कुमार श्रेष्ठसहित ४२ जना रहेका थिए । स्याङ्जा सिरुबारी गुरुङ बस्तीका ३९ मध्ये २७ घरमा ‘होमस्टे’ सुविधा छ । यहाँबाट हिमाल हेर्न डाँडामा चढ्नुपर्दछ । गाउँमाथि देउरालीबाट धौलागिरि, अन्नपूर्ण, माछापुच्छे«देखि लमजुङ हिमालको लामो लर्कन देख्न सकिन्छ ।