खोज

भैरहवा, २२ असोज ।
रूपन्देही जिल्लाको गैँडहवा गाउँपालिकाले गाउँपालिकामा जन्मीएका बालीकाहरुको बालिका बिमा गर्ने भएको छ ।

छोरी बचाउ छोरी पढाउ अभियान अन्तर्गत गैंडहवा गाउँपालिकामा जन्मीएका बालीकाको प्रोत्साहन, छोरीको शैक्षिक विकास, तथा बाल विवाह रोक्नका लागि गाउँपालिका अध्यक्ष बालिका बिमा योजना निर्देशिका २०८१ मा उल्लेख भए बमोजिम गैंडहवा गाउँपालिका र प्रभु महालक्ष्मी लाइफ इन्स्योरेन्स बिचमा सम्झौता भएको छ ।

गैँडहवा गाउँपालिकाका अध्यक्ष सुरेन्द्र पौडेलले बालिका बिमा इटेण्डरबाट खोलेर सम्झौता गरिएको बताउँदै बालिकाका लागि बालिका बिमा गैँडहवा गाउँपालिकामा नयाँ आयाम थपिएको बताए । अध्यक्ष पौडेलले बालिका जन्मीएपछि बालिकालाई प्रोत्साहन होस् भनेर बीमा गरिएको बताए । उनले बालिकालाई शिक्षित बनाउन र बाल विवाह रोक्नका लागि भूमिका खेल्ने बताए ।

प्रभु महालक्ष्मी लाइफ इन्स्योरेन्सका लुम्बिनी प्रदेश उप–प्रमुख कृष्ण प्रसाद पोख्रेलले गैँडहवा गाउँपालिकामा जन्मीएका बालिकाका लागि सरकारको नीतिगत ब्यवस्था तथा यस गाउँपालिका दीर्घकालिन साँेचका लागि बालिका बिमा गाउँपालिका र हाम्रो बिमा कम्पनीका बिचमा सम्झौता भएको बताए ।

बालिका बिमाले यस पालिकामा जन्मीएका बालिकाको अभिभावक वुवा वा आमाको जाखिम बहन हुने गरी एकल भुक्तानीमा बालिका बिमा भएको बताउँदै २० वर्ष भित्र बालिकाको वुवा वा आमा दुर्घटना वा कालगतिबाट मृत्यु भएमा कम्पनीको नियम अनुसार गाउँपालिकाको सिफारिस अनुसार बालिकालाई एक मुष्ठ भुक्तानी गरिने बताए ।

सम्झौता पत्रमा गैँडहवा गाउँपालिका अन्तर्गतका स्वास्थ्य संस्थाहरुमा र निजहरुले रिफर गरेकाहरु मध्ये छोरी जन्मीएकालाई मात्र यस बिमा योजनामा आबद्ध गराउनुपर्ने छ । यस कार्यक्रम अन्तर्गत गैँडहवा गाउँपालिका भित्रका बासिन्दालाई मात्र समाबेश गराउनुपर्ने छ । रु २० हजार रुपैयाँ मात्र एक मुष्ठ एक पटकको लागि मात्र बिमा शुल्क दिइने छ । बालिकाको उमेर २० वर्षसम्म पुग्दा अविवाहित रहेको सम्बन्धीत वडा कार्यालयको प्रमाण सहित गाउँपालिकाको सिफारिसको आधारमा मात्र बिमितलाई भुक्तानी गर्नुपर्ने उल्लेख गरिएको छ ।

कम्पनी र पालिका बिचमा भएको सम्झौता अनुसार बालिकाको एक मुष्ठ २० वर्षका लागि प्रभु महालक्ष्मी लाइफ इन्स्योरेन्स लि.मा गैँडहवा गाउँपालिकाले बिमा गरेको छ । यदि बालिकाको २० वर्ष अगावै विवाह भएमा उक्त रकम गाउँपालिकाकै खातामा जम्मा हुने अर्थात अविवाहितको सिफारिस लिएर आउनुपर्ने सम्झौतामा सर्त राखिएको छ ।

गाउँपालिकाले आर्थिक वर्ष २०८१।८२ को बजेटमा बालिका बिमाका लागि जम्मा २५ लाख बजेट बिनियोजन गरेको गाउँपालिकाले जनाएको छ ।