खोज

भैरहवा, २७ साउन ।

विद्यार्थी र अभिभावकमा सकारात्मक सोंचका लागि अनेरास्ववियु सिद्धार्थनगर नगर कमिटीले सिद्धार्थनगर क्षेत्रका शैक्षिक संस्थाबाट १२ कक्षा उत्तीर्ण गरेका करिव ८ सय जना विद्यार्थीलाई सम्मान गर्ने भएको छ । अनेरास्ववियुले यही साउन ३२ गते भैरहवामा विद्यार्थीलाई सम्मान गर्ने तयारी गरिएको जनाएको छ । यो सम्मान कार्यक्रम अभिभावकमा सकारात्मक सोंच र विद्यार्थीमा मनोबल र आत्मविश्वास बढाउनका लागि आयोजना गरिएको भनाइ आयोजकको छ ।

अनेरास्ववियु लुम्बिनी प्रदेशका उपाध्यक्ष सरोज ठकुरीले बिगतमा ३ दशमलव २ जिपीए देखि उच्च अंक ल्याएर १२ कक्षा उत्तीर्ण गरेका विद्यार्थीलाई सम्मान गर्ने गरिँदा सामान्य उत्तीर्ण गरेका आम विद्यार्थीमा नैराश्यता आउने गरेकाले यसपटक उत्कृष्ट अंक ल्याउनेसहित सामान्य रुपमा उत्तीर्ण गरेका सम्पूर्ण विद्यार्थीलाई सम्मान गर्न लागिएको बताए ।

‘यसरी सम्मान गर्दा सबै विद्यार्थीमा हौसला र आत्मबल बढ्ने भएकाले भविष्यमा असल मार्गमा हिँड्न अभिप्रेरित गर्ने गर्छ’, ठकुरीले भने, ‘अभिभावकको दवावमा विद्यार्थीले आफू अनिच्छुक विषय पढ्नु पर्ने बाध्यताको अन्त्य हुन जरुरी छ ।’ ठकुरीका अनुसार, अभिभावकको दवावका कारण कतिपय विद्यार्थी उच्च शिक्षा अध्ययनमा आफूलाई मन नपरेको विषय बाध्यताले पढ्नु पर्दा असफल हुने गरेका छन् । भने, कतिपय विद्यार्थीले परीक्षामा असफल भएको र उत्कृष्ट अंक नआएका कारणले आत्महत्याको बाटो समेत रोज्ने गरेका छन् ।

‘सम्मान कार्यक्रममा सवै विद्यार्थीलाई हौसला हुने र सही बाटोमा हिँड्न अभिप्रेरित गर्ने खालको प्रशिक्षण समेत दिइने छ’, उनले भने । अनेरास्ववियु सिद्धार्थनगर कमिटिका अध्यक्ष केएल पाण्डेले विद्यार्थी संगठन भन्नासाथ आन्दोलन गर्ने भन्ने आममानिसको मानसपटलमा पर्ने गरेको छविलाई मेटाएर शैक्षिक परिवर्तनको संवाहकको रुपमा स्थापित गर्न अनेरास्ववियु सिद्धार्थनगर कमिटीले नयाँ पहलकदमी गरेको बताए ।

कतिपय विद्यालय तथा शैक्षिक संस्थाले आफ्नो बिद्यालयको बिद्यार्थीलाई उच्च शिक्षा अध्ययनका लागि अन्यत्र लैजाने डरले सम्मानका लागि १२ कक्षा उत्तीर्ण गरेका विद्यार्थीको विवरण माग गर्दा उपलब्ध नगराउने गरेको गुनासो उनले गरे ।