खोज

भैरहवा, ३ कात्तिक ।

मूख्य निर्वाचन अधिकृतको कार्यालय रुपन्देहीले आचारसंहिता पूर्ण पालना गर्न राजनीतिक दलहरुलाई सचेत गराएको छ । बिहीबार भैरहवामा बसेको उम्मेदवार, राजनैतिक दल, पत्रकार, सुरक्षाकर्मी लगायतको संयुक्त बैठकमा मुख्य निर्वाचन अधिकृतको कार्यालयले विशेषगरी यसमा राजनीतिक दल र उम्मेदवार विशेष चनाखो रहनुपर्ने बताएको हो ।

कार्यालयले तीनै तहका सरकार, सञ्चार क्षेत्र, सुरक्षा निकाय, कर्मचारी सबैलाई आचारसंहिता विपरितका कुनै पनि कार्य नगर्न आग्रह गरेको छ । रुपन्देहीमा निर्वाचन प्रचार प्रसारका क्रममा हुन सक्ने आचारसंहिता उल्लंघनलाई लिएर मूख्य निर्वाचन अधिकृतको कार्यालयले सचेत गराएको हो । बिशेष गरी भारतीय गाडीको प्रयोग र उम्मेदवारले प्रयोग गर्ने सवारीको बिषयलाई लिएर सतर्कता अपनाउन आग्रह गरिएको थियो ।

रुपन्देहीका प्रमुख जिल्ला अधिकारी भरतमणि पाण्डेले आचारसंहिता उल्लंघन गर्नेलाई निर्वाचन पछि पनि निर्वाचन आयोगले कार्यवाही गर्न सक्ने बताए । आचारसंहिता उल्लंघन भए नभएकोबारे लिखित रुपमा उजुरी दिन पनि उनले सबैलाई आग्रह गरे ।

गृहमन्त्री बालकृष्ण खाणले सुरक्षाकर्मी परिचालन गरी प्रचार प्रसार गरेको गुनासो बारे बोल्दै प्रजिअ पाण्डेले ब्यक्तिलाई नभई पदलाई नियमानुसार सुरक्षा प्रदान गरेको बताए । “उहाँ उम्मेदवार मात्र नभई देशको गृहमन्त्री पनि हो, गृहमन्त्रीलाई नियमानुसार सुरक्षा दिनुपर्ने हुन्छ”–पाण्डेले भने–“अहिले उहाँ उम्मदेवार भएर निजी सवारीमा हिडिरहनुभएको छ । हामी गृहमन्त्रीलाई सुरक्षा दिइरहेका छौं ।”
त्यस अवसरमा मुख्य निर्वाचन अधिकृतको कार्यालयले यसपटक जिल्लाका पाँचवटै निर्वाचन क्षेत्रमा मतगणना हुने जानकारी गराएको थियो । २०७४ सालको निर्वाचनको मतगणना भैरहवाको दुईवटा स्थानमा गरिएपनि यसपटक क्षेत्रगत रुपमा गरिने सहायक निर्वाचन अधिकृत शोभाकर खरेलले जानकारी दिए ।

उनका अनुसार यसको लागि मतगणना स्थल समेत तोकिएको छ । रुपन्देही निर्वाचन क्षेत्र नम्बर १ को लागि देवदह नगरपालिकाको शितलनगरमा रहेको देवदह बहुमुखी क्याम्पसलाई मतगणना स्थल तोकिएको छ । क्षेत्र नम्बर २ को लागि बुटवल उप–महानगर पालिकाको कार्यालय, क्षेत्र नम्बर ३ को लागि भैरहवा नमूना माध्यमिक बिद्यालयलाई मतगणना स्थल तोकिएको छ । यस्तै क्षेत्र नम्बर ४ को लागि कोटहीमाई गाउँपालिका, गाउँ कार्यपालिकाको कार्यालय र क्षेत्र नम्बर ५ को लागि गैडहवा गाउँपालिका, गाउँ कार्यपालिकाको कार्यालयलाई तोकिएको सहायक निर्वाचन अधिकृत खरेलले जानकारी दिए ।

मतगणनामा सहजता ल्याउन अहिले पाँचवटै निर्वाचन क्षेत्रमा गणनाको ब्यवस्था गरिएको मूख्य निर्वाचन अधिकृत कृष्णराम कोईरालाले बताए । “एउटै क्षेत्रका मतगणनाको लागि करिब ६ वटा कोठा चाहिन्छ”–उनले भने–“सदरमुकाम ल्याउदा चाप बढने कारणले पनि सम्बन्धित निर्वाचन क्षेत्रमै मतगणनाको ब्यवस्था मिलाईएको छ ””

उनले मतपेटिकको संख्या धेरै हुने र प्रतिनिधि सभा तथा प्रदेश सभाको अलग अलग गणना हुने ब्यवस्था मिलाईएको बताए । कम्तिमा ३ वटा कोठा मतपेटिका राख्न, एक कोठामा प्रतिनिधि सभा, एउटामा प्रदेश सभा १ र अर्कोमा प्रदेश सभा २ गरी कम्तिमा पनि ६ कोठा आवश्यक रहेको उनको भनाई छ ।