खोज

तिलोत्तमा, १ कार्तिक । रुपन्देही क्षेत्र नंं १ का प्रतिनिधि सभा उम्मेदवार एवं पुर्व मन्त्री छविलाल विश्वकर्माले विकास,समृद्धि र राष्ट्रियताको रक्षाका लागि एमाले–राप्रपा–जसपा तालमेल भएको बताएका छन् ।
सत्तामा रहेका दलहरु एमालेसंग एक्लै लड्न डराएर गठबन्धन गरेर देशलाई दिशाहीन बनाएपछि मुलुकलाई सही मार्गमा डो¥याउन एमालेले पनि तालमेल गरेको विश्वकर्माको भनाई छ । रुपन्देही क्षेत्र नं १ (२) मा नेकपा एमाले–राप्रपा र जसपाको संयुक्त निर्वाचन प्रसार प्रसार कार्यालय तथा भेला उद्घाटन गर्दै एमाले सचिव समेत रहेका विश्वकर्माले घनश्याम भुसालतर्फ संकेत गर्दै एकपटक टिकट नपाउंदैमा पार्टी छाड्ने र आफनै पार्टीको सरकारलाई गिराउनेसंग सांठगांठ गर्न जानेलाई जनताले चुनावमा उचित जवाफ दिने बताए । सत्ता स्वार्थका लागि आफनै पार्टीको सरकारलाई ढालेर २३ सिटको कांग्रेसलाई सत्ता सुम्पनेहरुबाट देश विकासको आशा गर्न नहुने बताए । उनले रुपन्देही १ मा प्रतिनिधि सभा र प्रदेश सभाका दुबै क्षेत्रमा सत्ता गठबन्धन भन्दा करिब १५ हजार मतले एमाले–राप्रपा र जसपा गठबन्धन अगाडि रहेकाले शानदार जित निकाल्ने बताए ।
रुपन्देही १ (२) का प्रदेशसभा सदस्य उम्मेदवार दधिराम न्यौपानेले जनताको माग अनुसार आफूले अघि सारेका विकासका योजनाहरु पुरा गर्न उम्मेदवार बनेको बताए ।
नेता न्यौपानेले टोलटोलमा पुगेर मतदातालाई सचेत बनाउनुपर्ने बताए । कार्यक्रममा प्रदेश १(१) का उम्मेदवार आशिषकुमार चौधरी, एमालेकी समानुपातिक उम्मेदवार जानकी न्यौपाने,जसपाका ब्यासमुन चौधरी लगायतले सत्ता गठबन्धनलाई चुनावमा परास्त नगरे देश बर्बादीको बाटोमा जाने बताए ।
१५१५ सदस्यीय चुनाव परिचालन कमिटी गठन
तीन दलको संयुक्त भेलाले नेकपा एमाले क्षेत्रीय संयोजक हिमाल पाण्डे संयोजक र राप्रपाका टोफेल पठान सहसंयोजक र सुरेन्द्र श्री सचिव रहेको रहेको १५सय १५ सदस्यीय संयुक्त निर्वाचन परिचालन कमिटी गठन गरेको छ । यस्तै दुर्गाप्रसाद पाण्डेको संयोजकत्वमा आर्थिक,खेमराज गुरुङको संयोजकत्वमा युवा परिचालन,धनेश्वरी चौधरीको संयोजकत्वमा महिला,योगश पराजुलीको संयोजकत्वमा विद्यार्थी परिचालन कमिटी गठन भएको छ । रुपन्देही १ (२) को निर्वाचन प्रचार प्रसार कार्यालय कोटिहवास्थित एमाले पार्टी कार्यालयमा रहने छ ।