खोज

बुटवल, १० पुस । राष्ट्रिय युगकवि स्वर्गिय भूपि शेरचनलाई युवा कविहरुले कवितामार्फत सम्झना गरिएको छ । शेरचनको ८८ औ स्मृति जन्मजयन्तीको अवसरमा आयोजना गरिएको जिल्लास्तरीय कविता प्रतियोगितामा सहभागी युवा कबिहरुले भूपिको बारेमा कविता सुनाए ।
लुम्बिनी बोर्डिङकी जिविका बश्यालले युवाहरुलाई देशभक्त बन्न बलिदानीको सुनौलो अक्षर कोरेका भूपिलाई सम्झिईन । भूपिको पालामा देशको अवस्था र वर्तमानमा कुनै परिवर्तन नआएको स्मरण गर्दै भूपि जस्तै नया युवाहरु जगाउने कविता कोर्न आग्रह गरिन ।

भूपि शेरचन स्मृति प्रतिष्ठानको आयोजनामा मंगलबार बुटवलमा भएको जिल्लास्तरीय कविता प्रतियोगितामा दुर्गा शैक्षिक गृहका निमान्सु बश्याल प्रथम हुँदै १० हजार, प्रमाणपत्रबाट पुरस्कृत भईन । यसैगरि लुम्बिनी बोर्डिङ स्कुलकी जिविका बश्याल दोस्रो हुँदै ७ हजार रुपैया, प्रमाणपत्र तथा एभरेष्ट बोर्डिङ स्कुलका अस्मित खनाल तृतिय हुँदै ५ हजार रुपैया, प्रमाणपत्रबाट पुरस्कृत भए । प्रतियोगितामा अक्सफोर्ड बोर्डिङ स्कुलका स्रिमिका थापा, एभरेष्ट बोर्डिङ स्कुलका जेनिसा श्रेष्ठ र दीप बोर्डिङ स्कुलकि सचिना पुरी सान्त्वना हुदै नगद २–२ हजार रुपैयाबाट पुरस्कृत गरिएको छ । गतवर्षको विजेता प्रियन्सु पौडेलले समेत कविता वाचन गरेकी थिइन । यसैगरि प्रतियोगितामा कविता वाचन गर्ने लुम्बिनी बोर्डिङ जिविका बस्याल, अन्नपूर्ण स्कुलकि रितिका राय, अक्सफोर्ड बोर्डिङ स्कुल स्रिमिका थापालाई भूपिका परिवारबाट पुरस्कार वितरण गरिएको थियो ।

कार्यक्रमको एक समारोहका बिच प्रतियोगिताको स्वर्गिय भूपि शेरचनकी धर्मपत्नी कान्ति शेरचन र सुपुत्र भुपेसमान शेरचनले विजेता, उपविजेता बिद्यार्थीहरुलाई पुरस्कार वितरण गर्दै निक्कै उत्कृष्ट कार्यक्रम भएको बताए । अन्य सबै विषयको विकासभन्दा अघि साहित्यको उद्गगम भएको भन्दै साहित्य हरेक विषयसंग सम्बन्ध जोडिने हुदा पनि यसको महत्व बढि हुने बताए ।

कार्यक्रममा भुपि शेरचन स्मृति प्रतिष्ठानका अध्यक्ष क्या शिवप्रसाद शेरचनले बुटवल शाखा फरक पहिचान बनाउन सफल भएको बताए । २१ वटा शाखामध्ये बुटवलमा गुम्बा, पुस्तकालय स्थापना गरि सामाजिक गतिविधिलाई टेवा दिने गरि काम गरेको दाबी गरे । युवा पुस्तालाई पुस्तालय स्थापना गरि पठनशैली विकास गर्दै ज्ञान सिकाउन खोजेको उनले बताए । निकट भविष्यमा नै ई–लाईब्रेरीको लक्ष्य रहेको उनले बताए । आफुहरु २१ लाख ६१ हजार रुपैया अक्षयकोष स्थापना गर्न सफल भएको भन्दै यसैबाट शिक्षा, स्वस्थ्यमा कमजोर परिवारलाई आर्थिक सहयोग गर्न सफल भएको बताए ।

यसैबिच प्रतिष्ठानले पत्रकार स्वर्गीय टेक मास्के रानाको छोरी एन्जिला मास्के रानालाई नगद १० हजार रुपैया सहयोग रकम हस्तान्तरण गरेको छ ।

प्रतियोगिताका निर्णायक डा मुरारी पराजुलीले देशको भाषालाई उच्च स्थानमा लग्न योगदान दिएका कारण भूपि शेरचनको स्मरण गरिदै आएको बताए । भूपि धनी परिवार पृष्ठभूमि हेर्दा निक्कै बलिया थिए । लगातार ३ छोरापछि उनी चौथो सन्तान उनी थिए । छोरीको आश गरेका परिवार छोरा नै भएपछि पाच महिनासम्म बुबाले उनको मुख हेरेका थिएनन। बनारस अध्ययन गर्न गएका उनी पुष्पलालको पार्टीमा आवद्घ भएर भूपि शेरचन सर्वाहारा नाम लेखाउथे। परिवर्तन नाटक बनारसमा मंचन गरेका थिए । झ्याउरे गितमार्फत गरिब जनताको पक्षमा कुरा उठाएका थिए । उनको कबिताले मान्छेको चेतना उठाउने, विद्रोहको आवाज उठाउने काम गरे । निर्णायकहरु डा मुरारी पराजुली, रमेश समर्थन र राजु भुषालले प्रतियोगितामा विजेता घोषणा गर्दै उत्कृष्ट कविताहरु बनेको बताए ।

कार्यक्रममा थकाली समाज समिति नेपालका अध्यक्ष गजेन्द्र तुलाचन, समितिका अध्यक्ष लाल बहादुर गौचन, थकाली सेवा समाज भैरहवा शाखाका शंकर भट्टचन, आर्दशनगर टोल विकास समितिका अध्यक्ष गिता पन्तले भूपिको भौतिक शरीर नभएपनि उनको साहित्यिक शब्दावली ख्याती कमाउन सफल भएको बताए । कार्यक्रममा धौलागिरी साहित्यिक प्रतिष्ठानका काजी रोशनले सानोसानो रकम जुटाएर भूपि शेरचन पुरस्कार स्थापनाको स्मरण गरे । प्रतियोगितामा जिल्लाका विभिन्न १५ विद्यालयका प्रतियोगीहरुले प्रतिस्पर्धा गरेका थिए ।
यसैगरि स्वर्गीय शेरचनका धर्मपत्नी कान्ति शेरचनले प्रत्येक सहभागीहरुलाई नगद १५ सय रुपैया सहयोग गरेको घोषणा गरिन ।