खोज

बुटवल,२१ जेठ । आगामी आर्थिक वर्षको लागि तिलोत्तमा नगरपालिकाले संघीय सरकारबाट रुपन्देहीका १६ पालिकामध्ये सबैभन्दा धेरै वजेट ल्याउन सफल भएको भन्दै केही दिन यता सामाजिक सञ्जाल फेसबुकमा नगर प्रमुख रामकृष्ण खांणलाई बधाई दिनेको लहर चलेको छ । संघीय सरकारले रुपन्देहीका पालिकाहरुलाई दिएको वजेटको सूचिमा तिलोत्तमा नगरपालिकाले १ अर्ब १७ करोड ८० लाख रुपैंयाँ संघीय अनुदान प्राप्त गरेको छ ।

तर यो कूल वजेटमा अघिल्लो कार्यकालका जनप्रतिनिधिको पहलमा प्रारम्भ गरिएका विश्व बैंकको सहयोगमा निर्माणको क्रममा रहेको मंगलापुर—कान्छीबजार सडकको लागि आएको ४६ करोड ५ लाख वजेट पनि जोडिएर आएकोले संघीय अनुदानको रकम बढी देखिएको हो । मंगलापुर कान्छिबजार सडकका लागि विश्व बैंकको अनुदान ४६ करोड ५ लाख वाहेक संघीय सरकारले दिएको अनुदान ७१ करोड ७५ लाख हुन आउंछ ।

विश्व  बैंकको अनुदान घटाउंदा रुपन्देहीमा सबैभन्दा बढी अनुदान पाउनेमा बुटवल उपमहानगरपालिका देखिन्छ । बुटवलले ८० करोड ८९ लाख रुपैयां अनुदान पाएको छ ।
मंगलापुर कान्छिबजार सडकको योजना छनोटदेखि वजेटका लागि विश्व बैंकसंगको वजेट सम्झौता लगायत सबै प्रकृया यसअघिका मेयर बासुदेव घिमिरे नेतृत्वको कार्यपालिकाले गरेको थियो । यो वर्ष कुनै व्यक्ति विशेषको पहलले तिलोत्तमाले बढी अनुदान प्राप्त नगरेको एक पुर्व जनप्रतिनिधिले  प्रष्ट पारेका छन् ।

‘विगतमा पनि तिलोत्तमाले अन्य नगरपालिकाको तुलनामा बढी वजेट प्राप्त गर्दै आएको थियो, यसैले तिलोत्तमाले प्राप्त गरेको संघीय अनुदानको भोलुमलाई लिएर कुनै व्यक्ति विशेषलाई देवत्वकरण गर्न जरुरी छैन ‘ उनले भने — ‘बरु धन्यवाद दिऊँ अघिल्लो कार्यकालका जनप्रतिनिधिहरुलाई, जस्ले निरन्तर पहल गरेर नगरपालिकामा विकास साझेदार भित्राउन योगदान गरे ।’

यस्तै एशियाली विकास बैंकको सहयोगमा बन्न थालेका ड्राईभरटोल—शिवपुर सडक, पत्थरडाँडा—तिनाउ सडक, मधवलिया—गंगोलिया सडक र शीतभण्डार निर्माणको लागि २३ करोड रुपैंयाँ पनि आएको छ । निर्माण कार्य प्रारम्भ भएपछि एशियाली विकास बैंकको सहयोगमा बन्ने योजनाका लागि थप रकम आउने छ  ।