खोज

देशकै नमुना कहलिएको रुपन्देहीको सामूहिक विकास सहकारी संस्थाको कारोबार बैंककै हाराहारीमा पुगेको छ । कारोबारसँगै मुनाफा समेत उल्लेख्य वृद्धि भएपछि सहकारीले २० प्रतिशतसम्म कर तिरेको छ ।
तिलोत्तमा नगरपालिका वडा नम्बर ३ मा रहेको सामूहिक विकास सहकारी कारोबार र सदस्य संख्याको आधारमा प्रदेश ५, ६ र ७ मै सबैभन्दा ठूलो सहकारी हो । २०५० सालमा स्थापित यो सहकारीले १ अर्व ४७ करोड ६२ लाख ३१ हजार ५ सय ११ रुपैयाँ कर्जा लगानी गरेको छ ।
२६ जना शेयर सदस्यले २६ सय शेयर पुँजी जम्मा गरी सहकारी स्थापना गरेका थिए । अहिले सदस्य संख्या ६ हजार ३ सय ५५ पुगेको छ । जसमध्ये ३ हजार ५ सय ८५ जना महिला छन् । सहकारीका अध्यक्ष चुडामणि खरेलका अनुसार सहकारीको सम्पत्ति २ अर्ब पुगेको छ । १६ करोड ८३ लाख २७ हजार शेयर पुँजी रहेको सहकारीले १ अर्ब ४० करोड ४४ लाख ७ हजार ६ सय २५ रुपैयाँ बचत संकलन गरेको छ । गएको वर्ष सहकारीले ३ करोड ८५ लाख रुपैयाँ मुनाफा आर्जन गरेको छ ।
“सहकारी संस्थामा आकर्षण बढ्दै जाँदा निक्षेप संकलन र लगानीको दायरासमेत बढ्दै गएको छ”–अध्यक्ष खरेलले भने । “कारोबार ठूलो भए पनि अहिलेसम्म खराव क्रृणि पाइएको छैन, बचतकर्ताहरू नै अहिले सचेत बन्न थालिसकेका छन्”–उनले भने ।
२०७० सालमा राष्ट्रिय सहकारी संघवाट यो सहकारी उत्कृष्ट सहकारी व्यवसाय पुरस्कारबाट सम्मानित भएको थियो । अध्यक्ष खरेलले सहकारीले ६० प्रतिशत कर्जा व्यावसायिक क्षेत्रमा लगानी गरेको बताए । सामाजिक, शैक्षिक र उद्यमशीलतामा पनि सहकारीले लगानी गरेको उनले जानकारी दिए । उनका अनुसार हाल सहकारीबाट २१ सय जनाले कर्जा लिएका छन् ।
उनले सहकारी धेरै कुरामा नमूना रहेको दावी गरे । उनका अनुसार राष्ट्रिय सहकारी बैंकमा सरकारको १ करोड लगानी रहँदा सामूहिकका लगानी २ करोड ५१ लाख छ । सहकारी बैंक लिमिटेडबाट ५ नम्बर प्रदेशमा २०७३ सालमा उत्कृष्ट सहकारी पुरस्कार समेत सामूहिकले पाएको थियो ।
सहकारीले रजत जयन्तीको अवसरमा एटिएम सेवा समेत सञ्चालन गर्ने योजना बनाएको छ । रजत जयन्तीका कार्यक्रम पत्रकार सम्मेलनमार्फत शनिबार सार्वजनिक गर्दै सहकारीले राष्ट्रबैंकको अनुमति लिएर एटिएम सेवा सञ्चालन गर्ने बताएको छ ।
रजत जयन्तीका अवसरमा साउन १२ गते शंकरनगर सामुदायिक वनमा वृक्षारोपण, भदौ ९ गते वृद्धाश्रम र स्वास्थ्यसंस्थामा जिन्सी सामग्री हस्तान्तरण, असोज ६ गते स्वास्थ्य शिविर तथा रक्तदान, कात्तिक १६ गते प्रदेशस्तरीय सहकारी गोष्ठी, मंसिर १५ गते जिल्लास्तरीय कविता गोष्ठी, मंसिर २२ गते साधारणसभा गरिने छ । त्यस्तै पुस ७ गते अन्तर मावि जिल्लास्तरीय वक्तृत्वकला प्रतियोगिता, पुस १४ गते हाफ म्याराथुन दौड प्रतियोगिता र माघ १७ गते मूल समारोह गरिने अध्यक्ष खरेलले बताए ।
कार्यक्रममा सहकारीका उपाध्यक्ष रुद्रप्रसाद श्रेष्ठ र सञ्चालक विष्णु पौड्यालले सहकारीले ३६५ दिन नै आर्थिक कारोबार गर्ने गरेको जानकारी दिंदै सहकारीबाट धेरै क्रृणिको आर्थिक जीवनस्तर उकासिएको बताएका थिए ।