खोज

आर्थिक वर्ष २०७५/७६ देखि घोराही उप–महानगरपालिकाले वडा कार्यालयबाटै कर सङ्कलन गर्ने भएको छ । अहिले उप–महानगरवासीहरु घर जग्गा लगायतका विभिन्न कर तिर्न उप–महानगरपालिकाको कार्यालयमा आउन बाध्य थिए ।
कर संकलनलाई व्यवस्थित गर्नका लागि सफ्टवरको निर्माण गरिएको मेयर नरुलाल चौधरीले जानकारी दिए । उनका अनुसार अब कर संकलनको काम वडा कार्यालयबाटै कम्युटर सिष्टमबाट गरिने छ । उप–महानगरपालिकाको १९ वडामा भने नेट र विजुलीको व्यवस्था नभएकाले तत्काल यो कार्यक्रम लागू हुने छैन । “१९ नं वडाका जनतालाई पनि हामीले सामान्य कर तिर्नका लागि उप–महानगरपालिकाको कार्यालयमा आउनुपर्ने बाध्यताको अन्त्य गर्ने छौं तर त्यसका लागि अहिले रसिदबाट भएपनि कर संकलनको काम गरिने छ” चौधरीले भने । वडा कार्यालयबाट कर संकलन हुँदा उप–महानगरवासीहरुलाई निकै सहज हुने उनको भनाई छ । विगतको नगरपालिका र गाविस मिलेर उप–महानगरपालिका बनेकोले भूगोल निकै ठूलो छ । ‘जनतालाई संघीयता कार्यान्वयन पछि झन बढि दुःख भएको अनुभुति भएको छ तर अब जनताले विकासको माग गर्न उप महानगरमै आउनुपर्ने परिपाटीको अन्त्यहुने उनको भनाई छ । उप–महानगरले सबै वडाहरुमा भवन निर्माणको कामलाई समेत उच्च प्राथमिकतामा राखेर काम गरिरहेको छ । अहिले केही वडाहरु मात्रै आफ्नै भवनमा काम गरिरहेकाछन् । केही वडाहरु भाडामा बसेर वडाको कार्यालय सञ्चालन गरिरहेका छन् । यहि कारण वडाहरुको व्ययभार समेत बढेको छ ।
उप–महानगरपालिकाले सबै वडामा स्वास्थ्य क्लिनिक सञ्चालन गर्ने भएको छ । उप–महानगरपालीकावासीलाई सहज स्वास्थ्य सेवा पु¥याउने उद्देश्यले स्वास्थ्य क्लिनिकको अवधारणा ल्याइएको मेयर चौधरीले बताए । “आम सर्वसाधारणले सानो तिनो रोगको उपचार स्वास्थ्य क्लिनिकहरुबाटै पाउन भन्ने हाम्रो उद्देश्य हो, बजार क्षेत्रमा समेत शहरी स्वास्थ्य क्लिनिक सञ्चालन गरिने छ” मेयर चौधरीले भने । घोराही उप–महानगरपालिकाले सबै वडा कार्यालय जोड्ने सडकलाई तत्काल स्तरवृद्धि सहित कालोपत्रे गर्ने भएको छ । सबै वडा कार्यालय जोड्ने सडकको ट्रयाक भने खुलिसकेको उप–महानगरपालिका कार्यालयले जनाएको छ । सबै वडामा समानुपातिक विकास पुगोस भन्ने उद्देश्यले वडा कार्यालयबाट उप–महानगरपालिकाको कार्यालय जोड्ने सडकलाई कालोपत्रे गर्न थालिएको चौधरीले जानकारी दिए । विकासको प्रमुख आधार भनेकै सडक भएकाले सडक कालोपत्रे र स्तरवृद्धिमा उप–महानगरको ध्यान केन्द्रित भएको उनले बताए । सडक सञ्जाल विना उप–महानगरपालिकाले आफ्नो विकासका कामहरु जनताको माझमा लैजान नसक्ने चौधरीको बुझाई छ । आर्थिक वर्ष २०७४÷७५ मा मात्रै घोराही उप–महानगरपालिका क्षेत्रभित्र १४ मिटर सडक खण्डमा कालोपत्रेको काम भएको छ । “अहिले नेपालभरीकै सवै पालीकाको तथ्याङ्क निकाल्नुस कसैले यति धेरै सडक कालो पत्रे गरेका छैनन्” चौधरीले भने ।
शहरी क्षेत्रका भित्री गल्लीहरुपनि धमाधम कालोपत्रे भइरहेका छन् । उप–महानगरले केन्द्रिय अनुदान, सडक बोर्डको सहयोग तथा आन्तरिक लगानीबाट सडक कालोपत्रेको काम गरिरहेको छ । स्थानीय लागत सहभागीतामा पनि सडक कालोपत्रेको काम भइरहेको छ । स्थानीय लागत सहभागितामा सडक कालोपत्रे गर्न उप–महानगरवासीले इच्छुक भएको मेयर चौधरीले बताए ।