खोज

शून्यमा झरेको कोरोना सङ्क्रमण फेरी बढ्न थालेसँगै स्वास्थ्य तथा जनसंख्या मन्त्रालयले जनस्वास्थ्यका मापदण्ड अपनाउन आग्रह गरेको छ । केही दिनअघि राजधानी काठमाण्डौं र भारतबाट बाँकेको सिमा बाटो हुँदै नेपाल फर्किदै गरेका नेपालीहरुमा कोरोना संक्रमण पुष्टी भएपछि नेपालमा फेरी कोरोना संक्रमण बढ्ने हो कि भन्ने चिन्ता थपिएको छ । स्वास्थ्य था जनसंख्या मन्त्रालयले अव कोरोनाको जुनसुकै भेरिएन्ट आएपनि सङ्क्रमणको जोखिम कम गर्न जनस्वास्थ्यका मापदण्ड अपनाउन आग्रह गरेको छ । कोरोना फरक फरक भेरिएन्टका साथ आउने गरेकोले अहिले आएको कोरोनाको भेरिएन्ट कत्तिको जोखिमको हो भन्ने अहिले नै पत्ता लागिसकेको छैन तर जोखिमबाट बच्न जनस्वास्थ्यका मापदण्ड पालना गर्नु हामी सवैको कर्तब्य हो । विगतमा कोरोनाबाट हामीले १२ हजार बढी नेपाली गुमायौं । त्यो दुःखद इतिहास अझै ताजै छ । अझैपनि कोरोना पूर्णरुपमा बिदा भैसकेको छैन । हरेक बर्ष कुनै न कुनै भेरिएन्टको नाममा जोखिम निम्त्याउँदै आउँदै गरेको छ । तसर्थ यसबाट बच्ने एउटै उपाय भनेको स्वास्थ्य मापदण्ड पालना गर्ने नै हो । सोमबार १२ सय ६६ जनामा कोरोना परिक्षण गर्दा ६९ जनामा कोरोना पुष्टि भएको छ । यो सँगै नेपालमा संक्रिय संक्रमितको संख्या ६६ पुगेको छ । आइतबार १६, शनिबार तीन, शुक्रबार दुई, बिहीबार १७ जनामा कोरोना पुष्टि भएको थियो । गत बुधबार १३ सय ८७ जनाको कोरोना परीक्षण गर्दा संक्रमणदर शून्य थियो । एक सातामै संक्रमण दर बढेकोले यसबाट सचेत हुनुपर्ने अवको आवश्यकता हो ।

स्वास्थ्य मन्त्रालयले आफू र अरुलाई सुरक्षित राख्न सही तरिकाले मास्क लगाउने, कम्तीमा दुई मिटरको भौतिक दूरी कायम गर्ने, बेलाबेलामा साबुन पानीले हात धुने र स्यानिटाइजर प्रयोग र खोक्दा वा हाच्छुँ गर्दा रुमाल प्रयोग गर्न अनुरोध गरेको छ । निश्चितरुपमा स्वास्थ्य मन्त्रालयको यो अनुरोध हरेक नेपालीका लागि हो । अहिलेपनि मास्कको प्रयोग नगरिएको, स्वास्थ्य सावधानी नअपनाएको र आवश्यक मापदण्ड पालना नगरिएको पाईएको छ । यो गंभीर लापरवाही हो । स्वास्थ्य सावधानीले व्यक्ति आफैलाई फाईदा पुग्छ । तसर्थ स्वास्थ्य मापदण्ड पालनामा कडाई गरौं । त्यसो त नेपालमा कोरोना संक्रमणको करिव तीन बर्षपछि बल्लतल्ल मुलुक तंग्रिन खोजिरहेको छ । ठिक यही बेला कोरोना फेरी देखापर्दैछ । यद्यपि कोरोना संक्रमण भएकाहरु पनि निको भएर घर फर्किएको अवस्था छ । तसर्थ यसलाई हाउगुजी बनाउनु त्यति सान्दर्भिक छैन तर सावधानी अपनाउने कुरामा लापरवाही गरिनु हुँदैन भन्ने विषयमा आम नेपाली सचेत बन्ने अवस्था आएको छ । फेरिपनि यसको जोखिमबाट बच्नका लागि सरकारले दिएको सल्लाह र चिकित्सकले दिएको सुझावलाई आत्मसाथ गर्नु जरुरी छ । अहिले जटिल भन्दा पनि हामी सवैले सहज बाताबरण वनाउनेतर्फ भूमिका निर्वाह गर्नुपर्दछ । कोरोनाको विगतका बर्षहरुले हामी नेपालीलाई धेरै पाठ सिकाएको छ । तसर्थ अव नेपाललाई कोरोनाको हटस्पट बन्न नदिउँ भन्नेतर्फ सजग बनौं । पूर्व तयारीमा लागौं । पूर्व तयारी भनेको विगतमा भारतसँग सीमा जोडिएका अधिकांश जिल्ला कोरोना संक्रमणको ‘हट स्पट’ बनेका थिए । अहिले भारतबाट आउनेहरुलाई सिमा क्षेत्रमै निगरानी र चेकजाँच गरि उनीहरुलाई समेत जोखिमबाट बचाउन पूर्व तयारी गर्नु जरुरी छ । पछिल्लोपटक नेपालमा कोरोना संक्रमण भर्खरमात्र सुरु भएकोले साबधानी अपनाउन सकियो भने पूर्णतः नियन्त्रणमा आउन सक्छ । आशा गरौं हरेक नेपालीले जोखिमबाट हुने मानवीय क्षति रोक्न आ–आफ्नो स्थानबाट प्रयास ग¥यो भने संभव छ । तसर्थ कोरोनालाई हाउगुजी मानेर अत्तालिनुभन्दा वा केही पनि होइन भनेर बेवास्ता गर्नुभन्दा जिम्मेवार ढंगले सावधानीतर्फ ध्यान दिन सकियो भने त्यो हामी सवैका लागि राम्रो पक्ष हो । सरकार पनि कोरोनाबाट सचेत बन्न सवैसंग आग्रह गरिरहेको सन्दर्भमा एकपटक फेरी आम नेपालीले स्वास्थ्यका आवश्यक सर्त पालना गरेर कोरोनालाई नेपालबाटै निमिट्यान्न पार्ने अभियानमा जुट्नु जरुरी छ । त्यसमा हामी सवै नेपालीको सामूहिक प्रयास र सचेतना आवश्यक छ । विगतबाट पाठ सिकेर अघि बढ्नु हामी सवैको कर्तब्य र जिम्मेवारी पनि हो । तसर्थ अहिले देखिएको कोरोना संक्रमण दरलाई कम गर्दै लैजान र फेरीपनि नेपाललाई कोरोना शून्य मुलुक बनाउन जरुरी छ । त्यसमा नेपाल सरकार, स्वास्थ्य क्षेत्र र आम नेपालीको सार्थक प्रयास अपेक्षित छ ।