खोज

गुल्मीको धार्मिक क्षेत्र रेसुंगामा मंगलवारदेखि एक महिनाभर साउने मेला शुरु भएको छ । विगतका वर्षहरु जस्तै यस पटक पनि रेसुंगा संरक्षण समितिको आयोजनामा मेला शुरु भएको हो । उमेरले पाका बनेका वृद्धवृद्धा र भर्खरका वालवालीका र युवायुवतीदेखि धर्मकर्ममा आस्था राख्ने धेरै मानिसहरु साउन महिनामा रेसुंगामा जान गर्दछन् ।
साउन महिनाको पहिलो दिन मंगलवार विहानैदेखि धर्मकर्मका लागि रेसुंगामा जाने मानिसहरुको संख्या विगतमा जस्तै बाक्लो देखिएको छ । रेसुंका क्षेत्रमा जाने श्रद्धालुहरुकोे यो पटक देखिएको सहभागिताले यस क्षेत्रको महत्व र प्रचारप्रसारका लागि समेत ठूलो टेवा पुग्ने बताईएको छ । विगत वर्षहरुको तुलनामा यो पटक विहानैदेखि नै साउन महिनामा रेसुङ्गा स्थीत पोखरीमा नुहाउन र पोखरी माथि रहेको यज्ञशाला मन्दिरमा पुजाआजा गर्नेहरुको भीडभाड बढेको छ । विशेष गरि साउन महिनाभर रेसुंगा संरक्षण समितिले यस क्षेत्रमा एक महिने धार्मिक मेला समेत संचालन गर्ने भएको हुनाले मानिसहरु टाढाटाढादेखि यस क्षेत्रमा आउने गर्दछन् । जसका कारण साउन महिनाभर धेरै मानिसहरुको रेसुंगा क्षेत्रमा बाक्लो उपस्थिति हुने गर्दछ ।
साउन महिनाभर रेसुङ्गामा विशेष पुजाआजा गर्ने र धार्मिक मेला लाग्ने भएका कारण यस अवशरमा रेसुङ्गा क्षेत्रमा रहेको पोखरीको पानीले स्नान गर्ने र पोखरीमा स्नान गरेपछि त्यस नजिकै रहेको यज्ञशाला मन्दिरमा पुगेर पुजाआजा गर्ने प्रचलन छ । यही प्रचलनका कारण यस क्षेत्रमा पुगेपछि चारधाम जान नपर्ने र आफुले अन्जानमा गरेका संम्पुर्ण पापहरु नष्ट भई संवृद्धि प्राप्त हुने धार्मिक विश्वास समेत रहिआएको छ ।
यही विश्वासका आधारमा रेसुंगा क्षेत्रमा आउने धार्मिक पर्यटकहरुको संख्यामा समेत वृद्धि हुँदै गएको छ । ‘त्रेता युगदेखि यस क्षेत्रको महत्व हालसम्म पनि कायम रहेको हुँदा यस क्षेत्रमा एक पटक टेकेर फर्केपनि आफुले चिताएको मनोकामना पुराहुँने भएका कारण यसको महत्व अझ बढ्दै गएको रेसुङ्गा संरक्षण समितिका अध्यक्ष शुरेसचन्द्र भुसालले बताए ।
सोही आस्थाका कारण यस क्षेत्रमा गुल्मी लगायत पाल्पा, वाग्लुङ्ग, अर्घाखाँची, स्वाङ्जा, रुपन्देही, नवलपरासी, कपिलवस्तु, दाङ लगायतका जिल्लाहरुवाट समेत श्रद्धालुहरुको वर्षेनी घुँईचो लाग्ने गर्दछ । साउन महिनाभर रेसुङ्गा संरक्षण समितिले रेसुङ्गा स्थीत यज्ञशाला मन्दिरमा दिनहु यज्ञशालामा होमन गर्ने, रुद्रि, गिता, चण्डी पाठ गर्ने, रातभर भजन किर्तन गरेर वस्ने भएका कारण कतिपय मानिसहरु रातभर यज्ञशालामा वसेर किर्तनमा रमाउने गर्दछन् ।
साउन महिनाभर संचालन गरिने एक महिने धार्मिक मेलाले रेसुङ्गा क्षेत्रमा धेरै भन्दा धेरै आन्तरिक एवं वाह्य धार्मिक पर्यटकहरुलाई भित्राउने लक्ष्य राखिएको संरक्षण समितिले जनाएको छ ।