खोज

रामग्राम नगरपालिकामा विकासको नाँउमा विभिन्न कुलो पुरी सडक बनाउने कार्य हुन थालेका छन् । स्थानिय तह सञ्चालन ऐन विपरित नगरपालिकाको विभिन्न वार्डमा कुलो पुर्ने र सडक बनाउने कार्य भई राख्दा पनि नगरपालिका मौन रहेको छ ।
कानुनको पालना गर्ने र गराउने निकाय नै कानुन मिचिदा मौन छ । स्थानियले भने, अब जनताले कुन सरकारलाई गुहार्ने भन्ने अन्यौलमा छन् । स्थानिय तह सञ्चालन ऐन २०७४ मा सार्वजनिक जग्गा,पोखरी,कुलोको संरक्षण गर्ने उल्लेख छ । कुनै कुनै स्थानीय सरकारले एक गाउँ एक पोखरीको अभियान चलाएका पनि छन् तर यहाँ भने भएका पोखरी समेत पुरिन थालिएको छ । जसको नेतृत्व जनप्रतिनिधि,वार्ड अध्यक्षहरुले गरिरहेका छन् । कुलोलाई सडक बनाउन बजेट हाल्ने र त्यसको वरिपरि जग्गा प्लटिगँ गराउने कार्यलाई बढावा दिन थालेको स्थानीयको आरोप छ । कुलो परिपरिका जग्गावालाबाट आर्थिक प्रलोभनमा परी कुलो संरक्षण भन्दा सडक बनाउने कार्यलाई सहयोग गरेका छन् । कतिपयले कृषि सडकको नाँउमा कुलो पुर्नका लागि बजेट समेत हालेका छन् । यस्तो कार्य अहिले नगरपालिको वार्ड नं.१,३ र १० मा भएको देखिन्छ । कुलो पुर्दा सिचाईका लागि प्रयोग हुने पानीको स्रोत सकिनुका साथै जलनिकास नभएर बाढीको प्रकोप समेत बढाउने सक्ने स्थानियले गुनासो गरेका छन् ।
नगरप्रमुख नरेन्द्र कुमार गुप्ताले कुलो पुरि सडक बनाएको स्वीकार गरेका छन् । आफुले रोक्ने प्रयास गर्दा वार्ड अध्यक्षहरु झगडा गर्नसम्म पनि तम्सिने गरेको उनले सुनाए । वार्ड अध्यक्षले वार्डमा रहेका सार्वजनिक कुलो,पोखरीको संरक्षणको कार्य नगरी गलत कार्य गरेको उनको भनाई छ । यसलाई नगरपालिका रोक्ने प्रयासमा छ, उनले भने, अब नगरक्षेत्र भित्र कुनै पनि नयाँ सडक खोल्दा सडक यातायात योजना बनाई स्वीकृत गराएर मात्र खोल्न पाउने गरि नीति बनाएर एमटिएमपीको आधारमा मात्र सडक बनाउन दिइने कार्य गर्ने छ ।