खोज

जिल्लाको कालिगण्डकी किनारमा रहेको रानी महलमा इको पार्क बन्ने भएको छ । प्रदेश ५ को सरकार र तानसेन नगरपालिका पहलबाट इकोपार्क बन्ने भएको हो । प्रदेशको पर्यटन, उद्योग, वन तथा वातावरण मन्त्रालयले २० लाख रूपैयाँ बजेट उपलब्ध गराउने बताएको छ । यसअघि समय संघीय सरकारले रानी महल तानसेन सरकारलाई हस्तान्तरण गरेको थियो ।
पर्यटन, उद्योग, वन तथा वातावरण मन्त्री लीला गिरीका अनुसार पार्कको निर्माण यसै भित्र गरिने लक्ष्य छ । रानीमहललाई प्रदेश ५ कै प्रमुख पर्यटकीय स्थल बनाइने लक्ष्यअनुसार पहिलो चरणमा इको पार्क बनाउन लागिएको मन्त्रालयको भनाई छ । मन्त्रालयका अनुसार नीति तथा कार्यक्रम र बजेटमा प्राथमिकता दिई रानीमहललाई आकर्षक पर्यटकीय गन्तव्य बनाइनेछ ।
रानीमहल क्षेत्रको पर्यटकीय सम्भाव्यता र सडक पूर्वाधारबारे मन्त्री गिरीसहित भौतिक पूर्वाधार विकास मन्त्री बैजनाथ चौधरी, प्रदेश सभा अन्तर्गतको उद्योग पर्यटन विकास समिति सभापति दधिराम न्यौपाने लगायतको टोलीले स्थलगत अवलोकन गरेको थियो ।
पाल्पामा रहेको डिभिजन बन कार्यालयलाई अख्तियारी पाठइसकेको मन्त्रालयका शाखा अधिकृत रुद्र ज्ञवालीले बताए । उनका अनुसार डिभिजन कार्यालयले नगरपालिका र सरोकारवालाहरूको समन्वयमा सल्लाहमा इको निर्माण कार्य अगाडि बढाउने छ । जनरल खड्ग शमशेरले आफ्नी प्यारी रानी तेजकुमारीको सम्झनामा रानीमहल बनाएको इतिहासमा उल्लेख छ । दरबारको एकातर्फ बुर्जाको जग काली गण्डकी नदीमा नै रहेको र महलभित्र पानीपोखरी, मन्दिर, बगैंचा क्षेत्र छन् । ५६ फिट चौडाई, ११२ फिट उचाइ भएको चारतले भवन १९५० मा शिलान्यास भई चार वर्षमा दरबार, मन्दिर र पाटीपौवासहितको निर्माण कार्य पूरा भएको थियो ।
बेवारिसे रूपमा रहेको रानीमहल पुनर्निर्माणपछि आकर्षक बढेको छ । पाल्पाको साविकको बौघागुम्बा गाविस वडा नं २ मा अवस्थित रानीमहल दरबार नेपालकै ताजमहलका रूपमा कालीगण्डकी नदीको उत्तरतर्फ बग्ने मोडमा रहेको विशाल चट्टानमाथि छ । पाल्पाको सदरमुकाम तानसेनबाट उत्तरपश्चिम करिब तीन घण्टा पैदल यात्राबाट रानीमहल पुग्न सकिन्छ । १९६० मा खड्ग शमशेरले श्री ३ को पदसहित शासनसत्ताको बागडोर आफूले सञ्चालन गर्न खोज्यो भन्ने षड्यन्त्रको छनक पाएपछि चन्द्र शमशेरले पाल्पामा थप सेना पठाइ तैनाथी आफनो हातमा लिएका थिए ।
पाल्पा सदरमुकाम तानसेनबाट करिब १४ किलोमिटर दूरीमा पर्दछ । रानीमहललाई स्याङ्जासँग जोड्ने पक्की पुलको पाल्पातर्फको काम पनि पूरा भएपछि यसमा अझै चहलपहल आउने देखिएको छ ।