खोज

डायलसन अधिकारी
बुटवल, ३० असार । सरकारले देशभरी निर्माण गर्न लागेका औद्यागिक क्षेत्रमा उद्योग राख्न इच्छुक उद्योगिहरुबाट आशयपत्र माग गरेको छ ।
सरकारले रुपन्देहीको मोतपुर, बाकेको नौवस्ता सहितका औद्योगिक क्षेत्रमा उद्योग राख्न चाहने इच्छुक उद्योगिहरुलाई एक महिना भित्र आशय पत्र पेश गर्न आग्रह गरेको छ ।
सरकारबाट औद्योगिक क्षेत्रको निर्माण तथा अध्ययनको जिम्मेवारी पाएको नेपाल औद्योगिक क्षेत्र व्यवस्थापन लिमिटेडले असार २० गते सुचना प्रकाशित गरी एक महिना भित्र इच्छुक उद्योगिहरुलाई लिमिटेड मातहतका औद्योगिक क्षेत्र व्यवस्थापन कार्यालय मार्फत वा सोझै इमेल मार्फत आशय पत्र पेश गर्न उद्योगिलाई समय दिएको छ ।
व्यवस्थापन लिमिटेडले सुचना जारी गरेपछी देशभरी निर्माण गर्ने भनिएका औद्योगिक क्षेत्रमा उद्योग राख्न इच्छुक उद्योगिहरुले व्यापक रुचिका साथ फोन गर्ने गरेको र बिभिन्न स्थानबाट मेल समेत आइरहेको लिमिटेडका ईञ्जिनीयर अमृत शाहीले जानकारी दिएका छन ।
मोतिपुर सहित केही औद्योगिक क्षेत्रको बिस्तृत अध्ययन प्रतिवेदन तयार भएपनि अधिकांशको बनाउन बाकि रहेकाले ती क्षेत्रमा प्रतिवेदनका लागि पनि आशय पत्रले सहयोग गर्ने उनले बताए । लगानी कर्ताले कस्ता उद्योग स्थापना गर्न खोजिरहेका छन, कस्ता उद्योगको सम्भावना छ र उद्योगको माग कस्तो छ भन्ने कुराबाट आशय पत्रबाट स्पष्ट हुने शाहीले बताए ।
रुपन्देहीमा बुटवल उद्योग वाणिज्य संघ, रुपन्देही उद्योग संघ, घरेलु तथा साना उद्योग महासंघ लगायतका सस्थाले पनि इच्छुक उद्योगिका आशय पत्र संकलन गर्ने गरेका छन । उद्योग वाणिज्य संघ र उद्योग संघले छुट्टाछुट्टै सुचना निकाली उद्योगिहरुलाई उद्योग स्थापनाका लागि आशय पत्र पेश गर्न आग्रह गरेका छन । यि दुबै सस्थामा अहिले दैनिक बुझन २०।२५ जना र आशय पत्र पेश गर्न ८।१० जना उद्योगि व्यवसायी आउन लागेका छन ।
बुटवल उद्योग वाणिज्य संघबाट शुक्रवारसम्म १ सय ४० वटाले आशय पत्र लगेको र २५ वटाले भरेर बुझाएको संघका अध्यक्ष खिम बहादुर हमालले बताए ।
त्यस्तै रुपन्देही उद्योग संघबाट डेढ सय जतिले आशय पत्र लगेको र १९ जनाले बझाईसकेको अध्यक्ष गणेश अधिकारीले बताए ।
रुपन्देहीमा जग्गा महंगो भएकाले मेसिन तथा उपकरण र भवनमा भन्दा जग्गामा बढी लगानी लाग्ने भएकाले औद्योगिक क्षेत्रमा सरोकारवालाको बढी आकर्षण देखिन्छ । मोतिपुर औद्योगिक क्षेत्रको समेत फोकल प्रशनका रुपमा काम गरीरहेका बुटवल औद्योगिक क्षेत्रका प्रवन्धक तुल बहादुर रानाले उद्योग गर्न चाहने उद्योगिहरुले औद्योगिक क्षेत्रको बुटवल कार्यालय र केन्द्रमा समेत सोझै इमेल मार्फत आशयपत्र पेश गर्न सक्ने बताए ।उनले दैनिक १२। १५ उद्योगिले फोन मार्फत आफुसंग दिनहु जानकारी लिइरहेको समेत बताए ।
औद्योगिक क्षेत्र व्यवस्थापन लिमिटेडका महाप्रवन्धक तथा कार्यकारी अध्यक्ष नन्द किशोर बस्नेतले पनि अन्यत्रको तुलनामा मोतिपुरबाट प्रारम्भमा धेरै आशयपत्र आईरहेको र माग पनि बढी भएको बताए । उनले वातावरणीय प्रभाव मुल्यांकन गर्दा सम्वन्धित क्षेत्रमा कस्ता उद्योग स्थापना हुन्छन र तिनको प्रभाव कस्तो हुनछ भन्ने अध्ययन गर्न पनि आशय पत्र सहयोगि हुने बताए ।
औद्योगीक क्षेत्रमा २ करोड लगानी
मोतिपुरमा औद्योगिक क्षेत्र स्थापना गर्दा प्रति हेक्टर साढे २ करोड लगानी लाग्ने भएको छ ।
औद्योगिक क्षेत्रको बिस्तृत अध्ययन प्रतिवेदनले औद्योगिक क्षेत्र भित्र आवश्यक सबै भोतिक पुर्वाधार तयार गर्दा प्रतिहेक्टर साढे २ करोड रुपैया लगानी लाग्ने देखाएको हो ।
प्रतिवेदनमा ५ सय ५० दशमलव ४९ हेक्टर क्षेत्रफल देखिएको मोतिपुरमा सडक, ढल निकास,बगैचा, बिद्युत, पानी, प्रशासनिक भवन लगायतका क्षेत्रलाई छुट्याएर २ सय ६२ उद्योग राख्न सकिने उल्लेख भएको लिमिटेडका ईञ्जिनीयर अमृत शाहीले जानकारी दिए । उनका अनुसार सरदर एउटा उद्योगलाई ५ रोपनी जग्गा छुट्याइने छ ।
मोतिपुर औद्योगिक क्षेत्रमा एउटा ४ लैण्डको सडक र दुई वटा दुई लैण्डको सडक, ३० मेघावाट बिद्युत, २० लाख लिटर क्षमताको खानेपानी ट्यांकी सहित आधुनिक औद्योगिक क्षेत्रका लागि आवश्यक पुर्वाधार तयार गरीने छ ।
बिस्तृत अध्ययन प्रतिवेदनले मोतिपुरमा खाद्यान्न, डेरी, आयुर्वेदीक औषधि, सोलार, मेटल, फर्निचर, आईटी सफ्टवेयर, केवल तथा टान्सफर्मर, प्याकेजिगं उद्योगको सम्भावना बढी रहेको देखाएको छ ।