खोज

बुटवल, ७ फागुन ।  लुम्बिनी प्रदेश सरकारका स्वास्थ्य मन्त्री विष्णु पन्थीले निजी क्षेत्रबाट सञ्चालित शैक्षिक संस्था र अस्पतालले गरेको योगदानलाई सरकारले बाइपास गर्न नसक्ने बताएका छन् । बुटवल –३, चिडियाखोलास्थित लुम्बिनी बोर्डिङ स्कुलको २९ औ वार्षिकोत्सव समारोह उद्घाटन गर्दै उनले निजी क्षेत्रबाट सञ्चालित विद्यालय,कलेज र अस्पतालहरुको उत्कृष्ट गुणस्तरका कारण सरकारी विद्यालय ,क्याम्पस र अस्पतालको गुणस्तर सुधारमा दवाव पुगेको स्पष्ट पारे ।
‘सरकारी शिक्षा र स्वास्थ्य सेवाको गुणस्तर सुधारमा निजी क्षेत्रको गुणस्तर र व्यवस्थापनले सरकारलाई प्रेसर दिएको सत्य हो’– मन्त्री पन्थीले भने–‘निजी क्षेत्रको शिक्षा र स्वास्थ्यमा अर्बौं लगानी भएको छ, त्यसको संरक्षण र सम्मान सरकारले गनुृपर्छ ।’
देशको अर्थतन्त्र कमजोर भएकाले अहिले सरकारले शिक्षा र स्वास्थ्यमा पर्याप्त लगानी गर्ने अवस्था नभएकाले सरकारले निजी क्षेत्रसंग सहकार्य गर्न अपरिहार्य रहेको उनले बताए । सरकारले निजी क्षेत्रलाई आवश्यक मार्गदर्शन र नियमन गर्न भने जरुरी रहेको मन्त्री पन्थीले बताए ।
मन्त्री पन्थीले बालबालिकाहरु ५ वर्ष पुगेपछि मात्रै विद्यालय भर्ना गर्नुपर्ने र नेपाली भाषालाई पहिलो प्राथमिकता दिनुपर्ने सुझाव दिए । सानो कक्षाका बालबालिकालाई किताबको भारी धेरै बोकाउन नहुने र सिर्जनात्मक पढाई गर्नुपर्ने उनले बताए ।
विद्यालयका अध्यक्ष एवं प्याब्सन लुम्बिनी प्रदेश सचिव लालहरि पाण्डेयले विद्यालयले विद्यार्थीको सर्वाङगीण विकासका लागि विद्यार्थी केन्द्रीत सिकाईलाई प्राथमिकता दिएको बताए । सो अवसरमा विद्यालय व्यवस्थापन समितिका उपाध्यक्ष गजेन्द्रबहादुर बस्नेत, अभिभावक संघ लु्म्बिनी प्रदेशका अध्यक्ष हेम थापा,पुस्तक तथा स्टेसनेरी महासंघ, रुपन्देहीका अध्यक्ष रामकृष्ण चापागाई, सल्लाहकार शालिकराम पौडेल, सदस्य अमरेन्द्र सिंह, डा. मनोज कुमार सिन्हा, सञ्चालक सदस्य तथा लेखा संयोजक नारायण शर्मा, सञ्चालन सदस्य दयाराम बस्याल, विद्यालयका कोर्डिनेटर सुदिप बस्याल, प्राइमरी इन्र्चाज लता प्रधान लगायतले सरकारले निजी विद्यालयमा पढ्ने विद्यार्थीलाई उच्च शिक्षा अध्ययनको छात्रवृत्तिमा पक्षपात र विभेद गर्दा विदेश पलायन बढेको बताए । वार्षिकोत्सवमा कक्षा नर्सरी देखि कक्षा १० अध्ययपन विद्यार्थीहरुले लोक नृत्य, स्वदेश गान, नृत्य, प्रत्यक्ष गीत, कविता, नाटक लगायत आफ्ना प्रतिभाहरु प्रस्तुत गरेका थिए ।

यसै गरी विद्यालय तर्फबाट नगरस्तरीय, जिल्लास्तरीय र राष्ट्रिय स्तरमा समेत विभिन्न प्रतियोगितामा सहभागी भई विद्यालयको गरिमा उच्च राख्ने सोही प्रतिभावान विद्यार्थीहरु पनि उक्त समारोहमा सम्मानित भएका थिए ।
शैक्षिक सत्र २०७८ मा उत्कृष्ट नर्सरीदेखि कक्षा एस.ई. ई. सम्म नतिजा ल्याउन सफल विद्यार्थीलाई पनि विद्यालयद्वारा पुरस्कृत गर्दै सम्मान गरिएको विद्यालयका सह प्राचार्य कौशलराज बस्यालले जानकारी दिए ।