खोज

दसंै अघि टरीगाउँ एयरपोर्टमा जहाज चल्ने सँस्कृति, पर्यटन तथा नागरिक उड्डयन मन्त्री रविन्द्र अधिकारीले बताएका छन् । तुलसीपुर उप महानगरपालिकाले टरिगाउँ एयरपोर्ट सञ्चालनका वारेमा राखेको अन्तक्र्रिया कार्यक्रममा बोल्दै मन्त्री अधिकारीले यस्तो बताएका हुन् । टरीगाउँ विमानस्थलको बस्तुस्थीति बुझ्नको लागि आफू दाङ आएको बताउँदै उनले दाङ जहाज कसरी चलाउने भनेर आतुर रहेको बताए । ठूलो जहाज सञ्चालन हुन नसक्ने भन्दै मन्त्री अधिकारीले दसंै अगाडि नै निजी कम्पनीसंग सम्झौता गरेर दाङ काठमाडौँ तथा दाङ भैरहवा काठमाडांै कसरी हुन्छ सेवा सञ्चालनको प्रयास गर्ने आश्वासन समेत दिएका छन् । विमानस्थलका बिषयमा स्थानीयले राखेको चासो उपयुक्त भएको बताउँदै मन्त्री अधिकारीले एयरपोर्टको अध्ययन गरेर मात्रै काम अघि बढाउनका लागी आफू दाङ आएको उनले बताए । आफू मन्त्री भएपछि बन्द अवस्थामा रहेका ३ वटा विमानस्थलहरू सुचारु गराएको चर्चा गर्दै मन्त्री अधिकारीले टरीगाउँ विमानस्थललाई अहिलेकै अवस्थामा सञ्चालन हुनेमा ढुक्क रहन दंगाली आग्रह गरे । “म मन्त्री भएपछि कर्णाली प्रदेशको राजधानी सुर्खेतमा विमान नियमित भएको छ” मन्त्री अधिकारीले भने । उनले टरीगाँउ एयरपोर्टको धावन मार्ग तथा त्यसलाई बढाउनको लागि आवश्यक पर्ने ठाँउको समेत अनुगमन गरेका छन् । अनुगमन पश्चात उनले यसलाई वढाउनु भन्दा अहिले सम्म चलेको ट्वीनिटर विमान लाई नियमित गराउन उपर्युक्त हुने प्रतिक्रृया दिएका छन् ।
कार्यक्रममा नेपाल वायुसेवा प्राधिकरणका महानिर्देशक सञ्जीप गौतमले जिल्लामा ईन्धन डिपो तथा अन्य भौतिक पूर्बाधारको बिकासमा ध्यान दिन आग्रह गरे । टरिगाउँ बिमानस्थलको भौतिक पूर्वाधार बिकास गर्न नसकिने भन्दै उनले बैकल्पिक बिमानस्थल सञ्चालन नहुदासम्म टरिगाउँ बिमानस्थलमा विमान सञ्चालन गर्न आवश्यक रहेको बताएका थिए ।
यस भन्दा अगाडि गरीएको सर्वेक्षण प्रतिवेदन अनुसार टरीगाँउ विमानस्थलको धावन मार्ग विस्तार गर्दा लाग्ने खर्चमै अन्तर्राष्ट्रिय स्तरको विमानस्थल बन्न सक्ने भएकोले त्यसको पनि अध्ययन गरीने गौतमको भनाइ छ । जिल्लामा अन्तर्राष्ट्रियस्तरको बैकल्पिक बिमानस्थल निर्माणको तयारी थालिएको भन्दै त्यसको बिकासका लागि एकजुट हुन नेपाल कम्युनिष्ट पार्टी नेकपाकी सचेतक शान्ता चौधरीले आग्रह गरेकी छिन् । विमानस्थल दाङ जिल्ला भित्र जहाँ वनेपनी दाङवासीहरू खुशि हुनुपर्ने भन्दै चौधरीले नयाँ नबन्दा सम्म टरिगाउँ विमानस्थलमा जहाज ल्याउनुपर्ने बताइन् । त्यसैगरी पुर्व मन्त्री तथा सांसद रेखा शर्माले पटक पटक सञ्चालन हँुदै बन्द हुदै गरेको टरीगाँउमा अब अर्को विमानस्थल नबन्दा सम्मका लागि उडान भर्न विमान कम्पनीहरूसँग सल्लाह गर्नुपर्ने बताइन् । तुलसीपुर उप महानगरपालीका तथा तुलसीपुर उद्योग वाणिज्य संघले टरीगाँउ विमानस्थलमा जहाजलाई नियमित गराउन धेरै मेहनत गरेको बताउँदै सांसद शर्माले अहिलेपनि त्यस्तै सकृयताको खाँचो रहेको बताईन् ।
तुलसीपुरको कार्यक्रमपछि मन्त्री अधिकारी सहित जिल्लाका सम्पूर्ण सांसदहरूले चर्चामा रहेको नारायणपुरमा बन्ने विमानस्थलको अवलोकन गरेका छन् । अवलोकन पश्चात मन्त्री अधिकारीले उक्त क्षेत्रको सम्भाव्यता अध्ययन गरेर काम अघि बढाईने बताए । कम लागतमा अन्तर्राष्ट्रिय स्तरको विमानस्थल बन्न सक्ने सम्भावना बोकेको नारायणपुर क्षेत्रमा अध्ययनको लागि छिट्टै टोली खटाइने उनको भनाइ छ ।