खोज

बुटवल,७ मंसिर ।   लुम्बिनी प्रदेशका २६ वटा प्रतिनिधिसभा सदस्य निर्वाचन क्षेत्र मध्ये २५ वटामा मतगणना जारी छ । प्रारम्भिक नतिजालाई आधार मान्दा लुम्बिनी प्रदेशमा प्रतिनिधि सभा तर्फ नेकपा एमाले नै पहिलो दल बन्ने सम्भावना बलियो देखिएको छ ।

प्रारम्भिक नतिजा अनुसार सत्ता गठबन्धनलाई पछि पार्दै नेकपा एमाले ११ स्थानमा अगाडि छ । राष्ट्रिय प्रजातन्त्र पार्टीका धवलशमशेर राणाले एमालेको समर्थनमा बांके २ मा जित हासिल गरिसकेका छन् भने नवलपरासी पश्चिम २ नंं क्षेत्र पनि राप्रपाका ध्रुवबहादुर प्रधानले जित्ने निश्चित छ ।

एमालेपछि दोस्रोमा रहेको नेपाली काँग्रेसले ६ स्थानमा अग्रता लिएको छ । नेकपा माओवादी केन्द्रले ३ स्थानमा अग्रता लिएको छ । नेकपा एकीकृत समाजवादी, लोकतान्त्रिक समाजवादी पार्टी र नागरिक उन्मुक्ति पार्टीका स्वतन्त्र उम्मेदवार १÷१ स्थानमा अघि रहेका छन् । गुल्मी १ को मतगणना शुरु हुंदैछ ।

बुधबार बिहान ९ बजेसम्मको अपडेट अनुसार

नवलपरासी पश्चिम –१ मा काँग्रेसका विनोद चौधरी अगाडि छन् । दोस्रोमा राष्ट्रिय स्वतन्त्र पार्टीका महेन्द्रसेन ठकुरी छन् । जनता प्रगतिशील पार्टीका हृदयेश त्रिपाठी तेस्रो स्थानमा छन् । तर यहां कांग्रेसका चौधरी र सेनबीच अघि पछि हुने लुकामारी जस्तै छ । यहांको नतिजा कस्को पक्षमा आउंछ सहजै भन्न सकिने अवस्था छैन ।

नवलपरासी २ मा राप्रपाका धु्रब बहादुर प्रधानले अग्रता लिएका छन् । प्रधानको जित निश्चित जस्तै छ ।

रुपन्देही–१ मा नेकपा एमालेका सचिव छविलाल विश्वकर्माले अग्रता लिएका छन् । सत्ता गठबन्धनका घनश्याम भुसाल दोस्रो र नागरिक उन्मुक्ति पार्टीका धनिराम चौधरी तेस्रो स्थानमा छन् ।

रुपन्देही–२ मा नेकपा एमालेका उपाध्यक्ष विष्णु पौडेलले अग्रता लिएका छन् । यहां राष्ट्रिय स्वतन्त्र पार्टीका गणेश पौडेल दोस्रो र सत्ता गठबन्धनका उम्मेदवार जनमुक्ति पार्टीका केशवबहादुर थापा तेस्रो स्थानमा छन् ।

रुपन्देही–३ मा गृहमन्त्री समेत रहेका कांग्रेसका नेता बालकृष्ण खाँणले अग्रता लिएका छन् । राष्ट्रिय प्रजातन्त्र पार्टी राप्रपाका दिपक बोहोरा दोस्रो स्थानमा छन् ।

रुपन्देही–४ मा लोकतान्त्रिक समाजवादी पार्टी लोसपाका सर्वेन्द्रनाथ शुक्लाले अग्रता लिएका छन् । उनको जित करिब निश्चित जस्तै छ । नेपाली काँग्रेसका प्रमोद यादव दोस्रोमा छन् ।

रुपन्देही–५ मा नेकपा एमालेका बासुदेव घिमिरेले अग्रता लिएका छन् । ५ हजारको मतान्तरले अगाडि रहेकाले घिमिरेको जित निश्चित जस्तै छ । नेपाली काँग्रेसका भरत शाह दोस्रो स्थानमा छन् ।

कपिलवस्तु–१ मा एमालेका बलराम अधिकारीले अग्रता कायम राखेका छन् । माओवादी केन्द्रका चक्रपाणी खनाल दोस्रो स्थानमा छन् ।

कपिलवस्तु–२ मा नेपाली काँग्रेसका सुरेन्द्रराज आचार्यले अग्रता लिएका छन् । एमालेका बृजेशकुमार गुप्ता दोस्रो छन् ।

कपिलवस्तु–३ मा नेकपा एमालेका मँगलप्रसाद गुप्ताले अग्रता लिएका छन् । नेपाली काँग्रेसका अभिषेक प्रताप शाह दोस्रो स्थानमा छन् ।

दाङ–१ मा नेकपा एकीकृत समाजवादीका मेटमणी चौधरीले अग्रता कायम राखेका छन् । एमालेकी शान्ता चौधरी दोस्रो स्थानमा छन् । यहां मेटमणिले जित्ने संभावना बलियो छ ।

दाङ–२ मा नेकपा माओवादी केन्द्रकी रेखा शर्माले अग्रता कायम राखेकी छन् । एमालेका महासचिव तथा लुम्बिनी प्रदेशका पूर्व मुख्यमन्त्री शंकर पोखरेल दोस्रो छन् ।

दाङ–३ मा नेपाली काँग्रेसका दिपक गिरीले अग्रता लिएका छन् । नेकपा एमालेकी कोमल वली दोस्रो स्थानमा छन् ।

बाँके–१ मा नेकपा एमालेका सुर्यप्रसाद ढकालले अग्रता लिएका छन् । नेकपा माओवादीका महेश्वरजंग गहतराज दोस्रो स्थानमा छन् ।

बाँके–२ मा राष्ट्रिय प्रजातन्त्र पार्टी राप्रपाका धवल शमशेर राणा निर्वाचित भइसकेका छन् । जसपका मोहम्मद इस्तियाक राई दोस्रो भए ।

बाँके–३ मा नेपाली काँग्रेसले अग्रता लिएको छ । एमालेका किस्मतकुमार कक्षपति दोस्रो छन् । कक्षपतिले शुरुवातमा अग्रता लिएका थिए ।

बर्दिया–१ मा नेपाली काँग्रेसका संजय गुप्ताले अग्रता लिएका छन् । नागरिक उन्मुक्ति पार्टीका ठाकुरसिंह थारु दोस्रोमा छन् ।

बर्दिया–२ मा नागरिक उन्मुक्ति पार्टीबाट स्वतन्त्र उम्मेदवार बनेका लालविर चौधरीले अग्रता लिएका छन् । प्राविधिक कारणले स्वतन्त्र उम्मेदवारी दर्ता गरेपनि उनी नागरिक उन्मुक्ति पार्टीका रेशम चौधरीका बुवा हुन् । दोस्रो स्थानमा माओवादी केन्द्रका सुरेस पन्त छन् ।

प्यूठानमा नेकपा एमालेका सूर्य थापाले अग्रता लिएका छन् । राष्ट्रिय जनमोर्चाकी दुर्गा पौडेल दोस्रो स्थानमा छन् ।

गुल्मी १ मा मतगणना शुरु हुंदैछ । यहां एमालेका उपमहासचिव प्रदीप ज्ञवाली र कांग्रेसका चन्द्र भण्डारीबीच प्रतिस्पर्धा छ ।

गुल्मी–२ मा नेकपा एमालेका सचिव गोकर्ण विष्टले अग्रता लिएका छन् । एकीकृत समाजवादीकी रामकुमारी झांक्रीलाई पराजित गर्दै विष्टको जित निश्चित जस्तै छ ।

अर्घाखाँचीमा नेकपा एमालेका टोपबहादुर रायमाझीले अग्रता कायम राखेका छन् । नेपाली काँग्रेसकी पुष्पा भुसाल दोस्रो स्थानमा छन् । यहां  रायमाझीको जित निश्चित जस्तै छ ।

पाल्पा–१ मा नेकपा एमालेका नारायण आचार्यले अग्रता कायम राखेका छन् । नेपाली काँग्रेसका ज्ञानबहादुर गाहा दोस्रोमा छन् । एमालेका आचार्यको जित निश्चित जस्तै छ ।

पाल्पा–२ मा नेकपा एमालेका ठाकुर गैरेले अग्रता लिएका छन् । नेकपा एकीकृत समाजवादीका सोमप्रसाद पाण्डेय दोस्रो स्थानमा छन् ।

रुकुम पूर्वमा नेकपा माओवादी केन्द्रका नेता पूर्णबहादुर घर्तीले अग्रता लिएका छन् । एमालेका कैलाशकुमार मल्ल दोस्रो स्थानमा छन् । यहां माओवादीका घर्तीले जित्ने निश्चित छ ।

रोल्पामा नेकपा माओवादी केन्द्रका नेता वर्षमान पुनः अघि छन् । नेकपा एमालेका पुर्ण बुढामगर दोस्रो स्थानमा छन् । यहां माओवादीका पुनले जित्ने निश्चित छ ।