खोज

पार्टी प्यालेस, होटल तथा रेष्टुराँहरूमा यो बर्षको तीजको रौनक सुरु भैसकेको छ । अचेल रातीसम्म तीजको दर खाने र नाचगान गर्ने नाममा हुने जमघटले पार्टी प्यालेस, रेष्टुरन्ट र बारहरू भरिभराउ हुन थालेका छन् । तीजको अवसरमा बजारमा चहलपहल बढ्दै छ । तीज लगायतका चाडपर्व आउँदा हरेक नेपाली महिलामा खुसी र उमंग छाउनु स्वाभाविक हो । चाडपर्वमा रमाउने नेपाली परम्परा हो । चाडपर्वले खुसी नै लिएर आउँछन । अहिले बजारमा तीजकै लागि भन्दै विभिन्न कलाकारले तीज गीत सार्वजनिक गरेका छन । तर ती तीज गीत सवैका लागि प्रिय छैनन् । उच्छृंखल तीज गतिले मौलिक तीज गीत लोप हुने अवस्था उत्पन्न भएको छ ।

पछिल्लोसमय बजारमा तीज गीतको नाममा बजिरहेका गीतले तीजको मर्म बोल्दैनन् । संस्कृति र परम्परा अनुसार मनाइने तीज लोप हुँदै गएको छ । मनपरि तरिकाका छाडा तीज गीतले गर्दा तीजको परम्परामाथि नै धब्बा लागिरहेको छ । तीज मनाउन भेला भएका महिलाहरू बियरको चुस्कीमा समेत रमाउने गरेको सुन्दा तीजले साँच्चै आफ्नो मौलिकता गुमाउँदै गएको हो कि भन्ने चिन्ता लाग्नु स्वाभाविक छ । तीज आउनु महिना दिन अघिदेखि नै रेडियो, टीभी र युट्युबमा तीजका नाममा उच्छृंखल गीतले बजारमा ध्वनी प्रदुषण गर्दै आएका छन् । वास्तवमा तीजको मौलिक मर्म बोकेका गीत लोप हुँदै गएका छन । यो चिन्ताको बिषय हो ।

तीजका गीतमा चेलीको मर्म, दुःख, सुख, खुशी, उमंग र दिदी बहिनीहरूको पीडा र बेदना अभिब्यक्त हुनुपर्दछ । तर, अहिले घर परिवारले संगै बसेर सुन्न पनि नसकिने तीजका गीत सार्वजनिक भएका छन् । तीजको नाममा एक अर्काको देखासिकीले पनि विकृति बढेको छ । गीतमा शिष्टता नै छैन, नारीको बेदना पनि छैन । तीजले मौलिकता जोगाउनु पर्दछ । अर्कोतर्फ तीजको नाममा भड्किलो फेसन प्रस्तुती र गरगहना प्रदर्शन किमार्थ सुहाउने बिषय होइन् । यस प्रकारका गतिविधिले तीजको मर्म र भावनामाथि ठेस पु¥याएको छ । धेरै पहिले सधै काममा ब्यस्त हुने महिलाहरूले यही बेलामा आफ्ना कथा व्यथा पोख्ने गर्दथे । अहिले समय परिवर्तन भएको छ । दिदी बहिनीहरू अहिलेपनि सामूहिक रूपमा जम्मा त हुन्छन् । तीजका गीत पनि गाउँछन तर ती गीतमा मौलिकता छैनन् । दुःख सुखको जीवन्तता छैन् । तीज मनाउने शैलीमा समय अनुसार परिवर्तन आउनु स्वाभाविक हो तर समाजले पचाउनै नसक्ने गरि तीजले मौलिकता गुमाउँदै जानु दुःखद कुरा हो । अर्को चिन्ताको कुरा के हो भने तीजकै लागि महिला दिदी बहिनीहरू किनमेलमा ब्यस्त हुँदैछन् । तर, हरेक बर्ष तीज आउँदै गर्दा उपभोक्ताको ढाडै सेकिने गरि महंगीले पनि सिमा पार गर्ने गरेको छ । ठिक यही बेला हरेक बर्ष महंगीले आफ्नो रूप देखाउने गरेको छ ।

महिला दिदी बहिनीहरूले आफूलाई चाहिने सरसामान किन्नै नसकिने अवस्था आउँछ । ब्यवसायीहरूले पनि यस्तै बेलामा महंगी बढाउँछन् । महंगीका कारण बजार जानै नसक्ने अवस्थाको अन्त्य गर्ने बिषयमा सरकारको ध्यान जानु जरुरी छ । चाडपर्व नेपालीजनका लागि खुसी बनून । नेपाली महिला दिदी बहिनीहरूमाझ तिजको रौनक सुरु भैसकेको बेला यो चाडले खुसी लिएर आओस् । महिला दिदी बहिनीहरूको आँखामा आँशु होइन, हाँसो भरियोस् । यो बर्षको तीज भड्किलो होइन उमंगमय बनोस् । अनेक दुःख, बेदना र पीडा भुलेर केही दिनका लागि भएपनि हाँसो खुसीमा रमाउने बाताबरण बनोस् ।