खोज

लमही,३ कार्तिक । नेपाली कांग्रेसका प्रभावशाली नेता खुमबहादुर खड्काको निधन पछि उनको विरासत थाम्नका लागि उत्तराधिकारीका रुपमा छोरा अनुराग खड्का राजनीतिको फ्रन्ट लाइनमा उभिएका छन । नेपाली राजनीतिमा छुट्टै छवि बनाएका नेता खुमबहादुर खड्काका एक्ला छोरा अनुराग यतिबेला बाबुको सपना सकार पार्न भन्दै आसन्न प्रदेश सभा सदस्यको निर्वाचनमा दाङ – १ ‘ख’ बाट सत्ता गठबन्धनको उम्मेदवा रबनेका छन् । उनले नेकपा एमालेका प्रत्यासी कुलबहादुर केसीसंग प्रतिस्पर्धा गर्दैछन् ।
खुमबहादुर पक्षधरको उनका छोरालाई दोस्रो खुमबहादुरका रुपमा देख्न चाहेको जिल्लामा चर्चा छ । छोरा अनुराग पनि बाबु जस्तै साहसी, तुरुन्तै डिसिजन गर्न सक्ने र चतुर बनोस भन्ने शुभ चिन्तकहरुको चाहना छ ।
योगेन्द्र चौधरी, कृष्ण किशोर घिमिरे, सुशिला चौधरी र अनुराग खड्का प्रतिनिधि सभा सदस्य तर्फ दाङ – १ बाट सिफारिसमा परेका थिए । दाङ – १ मा प्रतिनिधि सभा सदस्य तर्फको भागबण्डा एकीकृत समाजवादीलाई परेपछि योगेन्द्र चौधरीले समानुपातिक रोजे, अनुरागले प्रदेशमा झर्ने मनस्थिति बनाएपछि उनि निकट नेताहरुले प्रदेशको लागि लविङ्ग गरेका थिए भने अन्य नेताहरु पछि हटेका थिए ।
दाङ– १ कांग्रेसका स्वर्र्गीय नेता खुमबहादुर खड्काले प्रायः चुनाव जित्दै आएको क्षेत्र हो । अहिले यो क्षेत्र एकीकृत समाजवादीलाई परेको छ ।
कुनै बेला नेपाली राजनीतिमा प्रभाव जमाएका कुशल राजनीतिज्ञ खुमबहादुरको बिरासत जोगाउने अभिभारा यतिबेला छोरा अनुरागको भागमा परेको छ । थारु र यादव समुदायको बाक्लो बस्ती रहेको दाङ – १ मा खुमबहादुर नरहे पनि उनका पक्षधर अनुरागले टिकट पाएपछि खुसी देखिन्छन । त्यसो त खुमबहादुरमाथि विपक्षीहरुले भ्रष्ट र सत्ताको आडमा गुण्डागर्दी र आतंक मच्चाउने नेताका रुपमा आरोप लगाउने पनि गर्दथे ।
अनुराग बाबुको निधन पछि नेपाल फर्किएर राजनीतिमा इन्ट्री गरेका हुन् ।