खोज

गुल्मी, २८ चैत । गुल्मीका किसानहरू यतिबेला व्यवसायिक रूपमा आलुखेती गरेर मनग्ये आम्दानी गर्न थालेका छन । जिल्लाको मुसिकोट नगरपालिका, रुरुक्षेत्र, मदाने, सत्यवती र मालीका गाउँपालिकाका किसानहरू व्यवसायिक रूपमा आलु उत्पादनमा आत्मनिर्भर बनेका छन ।
जिल्लाको रुरुक्षेत्र गाउँपालिका ५ स्थीत बम्घाको टाहाटिममा स्मार्ट कृषि गाउँ कार्यक्रम मार्फत व्यवसायिक रूपमा आलु उत्पादन गरिँदै आएको छ । त्यस क्षेत्रमा ६० घर परिवार आलु र तरकारी पकेट समूह बनाएर स्मार्ट कृषि गाउँ कार्यक्रममा आवद्ध बनेका छन ।

यहाँका किसानहरूले पाँच हेक्टर जमिनमा आलु खेती गरेर वार्षिक ९० मेट्रिकटन भन्दमा बढी आलु उत्पादन गर्दै आएको स्थानीय कृषक मेघराज गिरीले जानकारी दिएका छन । बम्घा टाहाटिमकी राधिका गिरीले खेत र बारी गरेर पाँच रोपनी क्षेत्रफलमा आलु खेती गरेकी छन । गिरीको खेत र बारीमा गरेर यस पटक २० क्वीन्टल भन्दा बढी आलु फलेको छ । आलुसँगै उनले खेतमा धान, मकै, सिमी र काउली पनि उत्पादन गर्दै आएकी छन । टाहाटिमका कृषकहरू यतिबेला खेतमा आलु खन्न व्यस्त छन । गत वर्षको तुलनामा यस पटक आलुले राम्रै बजार पाएको स्थानीय कृषक मेघलाल गिरीले बताए । टाहाटिममा अहिले स्थानीय बजारमा प्रतिकिलो ४० रूपैंयाँमा धमाधम आलु बिक्री भैरहेको छ ।
लुम्बिनी प्रदेश सरकार मार्फत कृषि ज्ञान केन्द्र गुल्मीद्वारा टाहाटिममा स्मार्ट कृषि गाउँ कार्यक्रम सञ्चालन भैरहेको छ । बम्घाको टाहाटिममा दुई बर्ष अघिदेखि स्मार्ट कृषि गाउँ कार्यक्रम शुरु भएको स्मार्ट कृषि गाउँ कार्यक्रम बम्घाका अध्यक्ष चेत नारायण श्रेष्ठले जानकारी दिए । कृषि ज्ञान केन्द्रले बीउ, मल, बिषादी, मेसिन, सिँचाइ र वीउ संकलन केन्द्रसम्म पुराउन ढुवानी लगायतका क्षेत्रमा सहयोग गर्दै आएको कृषि ज्ञानकेन्द्र गुल्मीका प्रमुख नवराज भण्डारीले बताए ।

बम्घाको टाहाटिमका कृषकहरू पुर्खौदेखि आलु खेति गर्दै आईरहेका छन । आलु खेतीका लागि उर्वर भूमि भएका कारण त्यस क्षेत्रमा अन्य खेतीको तुलनामा मनग्ये रूपमा आलु उत्पादन हुने गर्दछ । पछिल्लो समयमा अधिकांश ठाउँमा आलु उत्पादक कृषकहरूलाई आलुमा लाग्ने कमिलो र डढेलो रोगका कारण पिरोली रहन्छ । बम्घामा भने कमिलो भन्दा समय समयमा डढेलोको प्रकोप बढी देखिने गरेको बताईएको छ ।
कृषि ज्ञान केन्द्रले जिल्लाको मुसिकोट नगरपालिका १ अन्तर्गत भर्माचौर, सत्यबती गाउँपालिकाको साहघाट, मदाने गाउँपालिका ६ अन्तर्गत सिम र मालिका गाउँपालिकाको अर्खाबाङ्मा आलुको पकेट क्षेत्र बनाई व्यवसायिक रूपमा आलु र आलुको बीऊ उत्पादन गर्दै आईरहेको छ ।