खोज

भैरहवा, ५ चैत । भैरहवा भन्सार कार्यालयले राजस्व संकलनमा लिएको लक्ष्य भेट्टाउन नै मुस्कील देखिएको छ । २०८१ साल साउन महिना नयाँ आर्थिक वर्ष सुरुवात भएपछि भन्सार राजस्वको लक्ष्य भन्दा संकलन कम रहेको छ । भन्सारमा आयात कम हुँदा भन्सार कार्यालयले लक्ष्य भेट्याउन नसकेको हो । साउन महिनामा ८ अरब २९ करोडको लक्ष्य लिएकोमा ६ अरब ४९ करोड राजस्व संकलन भएको छ । यो जम्मा ७८.३० प्रतिशत भएको भन्सार कार्यालयले जनाएको छ ।

त्यसैगरी भदौ महिनामा भन्सार कार्यालयले १० अरब २६ करोड राजस्व संकलनको लक्ष्य लिएकोमा जम्मा ६ अर्ब ८६ करोड जम्मा ६६.८९ प्रतिशत राजस्व संकलन भएको छ । असोज महिनामा १२ अरब ३३ करोड भन्सार कार्यालयले राजस्व संकलनको लक्ष्य लिएकोमा ९ अरब ०.४ करोड, ७३.३२ प्रतिशत संकलन भएको छ । कार्तिक महिनामा १० अरब ६८ करोड लक्ष्य लिएकोमा जम्मा ४ अरब ४९ करोड जम्मा ४२.०९ प्रतिशत राजस्व संकलन भएको तथ्यांक रहेको छ ।
मंसिर महिनामा १० अरब ८७ करोड लक्ष्य लिएकोमा ६ अरब ०.६ करोड राजस्व संकलन भएको छ । यो जम्मा ५५.७७ प्रतिशत हो । पुस महिनामा भन्सार कार्यालयले १० अर्ब ६८ करोड राजस्व संकलनको लक्ष्य लिएकोमा ६ अरब १९ करोड जम्मा ५७.९४ प्रतिशत राजस्व संकलन भएको पाइएको छ । माघ महिनामा १० अरब ४८ करोड राजस्व संकलनको लक्ष्य लिएकोमा ६ अरब ४० करोड, जम्मा ६१.०७ प्रतिशत राजस्व संकलन भएको छ । त्यसैगरी फागुन महिनामा १० अरब ९९ करोड राजस्व संकलन गर्ने लक्ष्य लिएकोमा ६ अरब ७९ करोड राजस्व संकलन भएको छ । यो जम्मा ६१ प्रतिशत हो ।

भैरहवा भन्सार कार्यालयका प्रमुख भन्सार अधिकृत नारद गौतमले गत वर्षको तथ्यांक विश्लेषण गर्दा यस वर्षमा आयातित माल वस्तुको परिणामहरू त्यसबाट प्राप्त हुने राजस्व सबै बिश्लेषण गर्दा नाकाबाट आयात हुने सामान घटेका कारण लक्ष्य अनुसार राजस्व संकलन हुन नसकेको बताए । यस नाकाबाट जाँच पास हुने विशेष बस्तुहरू मोटरसाइकलहरू, जिपहरू, कारहरू, भ्यानहरू, मार्बलहरू, टायल्सहरू, डिजेल पेट्रोल लगायतका सामानको आयात घटेकाले राजस्व संकलन घटेको गौतमले बताए ।

आयात आषातितरूपले बढ्न नसकेको कारणले नै घटेको अवस्था छ केही चोरी तस्करीका कारण पनि भन्सार राजस्व घटेको छ । गौतम भन्छन्, “समग्रमा जाँच पास भएर जाने सामानहरू चोरी पैठारी भएर जाने प्रकृतिका छैनन । विशेषगरी कार, जीप, भ्यान, मार्वल टायल्स, पेट्रोल, डिजेल चोरी पैठारी भएर जाँदैनन । कम मात्रामा सामान आएकाले राजस्व संकलन नै कम भएको हो ।” भन्सार कार्यालयले लक्ष्य बमोजिम राजस्व संकलनका लागि सीमा नाकामा कडाई गर्ने, निरन्तर गस्ती गर्ने, आन्तरिक कामहरू गर्ने र भन्सार जाँच पासलाई सरलीकरण गर्ने शिघ्र सेवा दिने लगायतका काम गरेको गौतमले बताए । आगामीदिनमा लक्ष्य अनुसार राजस्व संकलन हुने कार्यालयको अपेक्षा रहेको उनको भनाइ थियो ।
भन्सार एजेन्ट महासंघका वरिष्ठ उपाध्यक्ष प्राचिन थैवले भन्सारमा लक्ष्य अनुसार राजस्व संकलन नहुनु कोरोना पिरियडपछि आर्थिक मन्दीका कारण यो अवस्था सम्म आएको बताउँछन् । नेपाल भन्सार एजेन्ट संघ सिद्धार्थनगरका अध्यक्ष मधु पन्थीले भन्सार कार्यालय, उद्योगी ब्यावसायी र भन्सार एजेन्ट संघ बीच समन्वय गरी सरकारले लिएका नीति नियम अनुसार राजस्व बुझाउन सहकार्य हुने बताउँछन् ।
भन्सारमा १२ सय ५३ र उप शीर्षक ९७ भाग भएकाले जाँच तथा सफ्टवेरका काममा समेत एजेन्टले उद्योगी, ब्यवसायीहरूलाई सहजीकरण गर्ने पन्थीको भनाई छ ।

राष्ट्रिय भन्सार एजेन्ट परिषद रूपन्देहीका अध्यक्ष सुर्य नारायण अर्यालले राज्यले लिएको नीतिमा राजस्व बृद्धि गर्ने, राजस्व उठ्ने र राजस्व नउठ्नेमा मुख्यतयाः तीनवटा कुराले भूमिका खेल्ने बताउँछन् । पहिलो राज्यको नीतिले, दोस्रो उद्यागीको मनोबल र उपभोक्ताको उपभोग्य तरिकाले निर्धारण गर्ने अर्यालले बताउँछन् । हामीसंग उपभोक्ता ब्यावसायी र राज्यको नीति एकै तरिकाले राज्यको नीति एकै तरिकाले लक्ष्य प्राप्तीका लागि बढी समन्वय गरेमा प्रभाव पर्न सक्ने अर्यालको भनाइ छ । अर्थतन्त्रलाई चलायमान बनाउने पिँढी देश बाहिर भएको अर्याल बताउँछन् । बाहिरबाट रेमिट्यान्स आएपनि लक्जरियसमा मात्रै बढी खर्च भएको छ भन्सार उठेपनि अर्थतन्त्रलाई टेवा नदिने अध्यक्ष अर्यालले बताए । युवा पलायन रोक्नुपर्यो अहिले ब्यवसायी असुरक्षित महसुस गरेको अवस्था छ र पनि सबै स्वच्छ ब्यवसायी छैनन् अर्यालले भने, गलत मनसायले ब्यापार गर्ने गरेका छन् । त्रिपक्षीय सहयोग भएमा बल्ल अर्थतन्त्र सहि ठाउँमा आउँछ अर्यालले भने ।

भैरहवा भन्सार कार्यालयका सुचना अधिकारी नरेन्द्र चौधरीले फागुन महिनामा लक्ष्यको ६१ प्रतिशत भन्सारले लक्ष्य हासिल गरेको बताउँछन् । भन्सार कार्यालयबाट सामानहरूको कम आयात हुँदा लक्ष्य पुर्याउन नसकिएको चौधरीले बताए । भैरहवा भन्सार कार्यालयमा टप टेन राजश्व संकलन हुने सामानहरू गाडी, मोटरसाइकल, पेट्रोल, टायल, मार्बल, एलपी ग्याँस, डेलिभरी भ्यान, इलेक्ट्रीक भ्यान लगायतका सामग्रीहरूबाट राजश्वमा योगदान हुने गरेको बताए । त्यसैगरी भैरहवा भन्सार कार्यालयमा ४०÷४५ जना भन्सार एजेन्ट भएको बताउँदै चौधरीले ब्यापारीले सहजकिरणका लागि भन्सार एजेन्ट मार्फत सामान आयात गर्ने बताए ।