खोज

सुनवल, १६ साउन ।  साउन महिनादेखि पुलबाट आउजाउ गर्ने पश्चिम नवलपरासीको सुस्ताबासीको सपना यसपटक पनि पुरा हुन सकेन् ।
पटक–पटक समय थप गर्दा समेत सुस्ता गाउँपालिकास्थित नारायणी नदीमा निर्माण भइरहेको नेपालकै लामो झोलुङ्गे पुलको काम पुरा नहुँदा स्थानीय बासी जोखिमपूर्ण डुंगाको यात्रा गर्न बाध्य छन् । यहि असार मसान्त सम्म पुल निर्माण सक्नका लागि २०७८ साल चैतमा सरकारले थप समय उपलब्ध गराएपनि निर्माण सम्पन्न भएको छैन् । २०७३ सालको पुसबाट सुरु भएको पुलको निर्माण कार्य तीन वर्ष भित्रै सकिनुपर्ने थियो तर पटक पटक म्याद थप गर्दा समेत पुलको काम पुरा हुन सकेको छैन् ।

नारायणीपारीका सुस्ताबासीको सपनाको रूपमा रहेको पुलको १० वटा मुख्य पिल्लरको काम सकेर त्यसमाथि स्टीलका टावर बनाउने काम अन्तिम चरणमा छ । नारायणीमा पानीको सतह बढेकाले नदिको दुवै किनारा तर्फ बाँकी काम भइरहेको सस्पेन्सन वृज डिभिजन कार्यालय ललितपुरका ईन्जिनियर गोपाल बहादुर थापाले जानकारी दिए । अन्तिम चरणमा रहेको पुल निर्माणको काम सक्न ठेकेदारलाई फेरि समय उपलब्ध गराउन लागिएको छ । चार महिना थप समय दिएर काम सक्ने योजना अनुरूप म्याद थपको प्रक्रिया सुरु भएको थापाले जानकारी दिए ।

१५ सय ७१ मिटर लम्बाइ र १ दशमलव ६ मिटर फराकिलो पुल निमार्णका लागि त्रिशूली आश्रय जेभी कन्ष्ट्रक्शनले २९ करोड ४० लाख रूपैयाँमा ठेक्का लिएको छ । डुंगाको जोखिमपूर्ण यात्रा गर्न बाध्य नारायणी पारीका सुस्ताबासी, पुल निर्माण भए सहजै आउजाउ गर्न सक्नेछन् । सुस्ताका स्थानीय मुन्सि हरिजनले पुल नभएकै कारण नेपाल तर्फ नारायणीपारीका सुस्ताबासीले सिधा सम्पर्क स्थापित गर्न नसक्दा सामान्य किनमेल औषधिमुलोका लागि पनि भारततर्फ जानुपर्ने बाध्यता रहेको बताए ।

पुल धेरै अगाडिनै बनेर सक्नुपर्ने हो हरिजनले भने पुल नबन्दा पाएको सास्ती बताएर सकिदैन । अहिले ईन्जीन जडान गरिएको डुंगाबाट आउजाउ हुन थालेपछि केही सहज भएपनि डुंगामा सिन्डकेट बढेको स्थानीयको गुनासो छ । डुंगाबाट आउजाउ गर्न धेरै कुर्नुपर्ने बाध्यताका कारण छिटो जानुपर्ने समयमा समस्या हुने गरेको स्थानीयले बताएका छन् ।

सुस्ता बचाउ अभियानका रविन्द्र जयसवालले पुलको काम विगतको वर्षको तुलनामा धेरै अगाडि बढेको बताए । ठेक्का लिएर काम नगरी ठेकेदार गायव हुँदा अहिले काममा ढिलाई भएको हो तर पछिल्लो समय कामले गति लिएको छ अब पुल बन्छ भन्नेमा ढुक्क छौं जयसवालले भने । भारतिय अतिक्रमणको चपेटामा पर्दै आएको नारायणी पारीको सुस्ता गाउँ पुग्न नेपालबाट जमिनको सम्पर्क छैन । पारी सुस्ता तीन तिर बाट नारायणी नदीले घेरिएको छ भने एकातर्फ भारतसंगको सीमाना छ ।