खोज

बुलिङटार गाउँपालिकामा पहिरोले घर पुरिदा २ जनाको मृत्यु भएको छ । बुलिङटार गाउँपालिका वडा नं. २ डाडाँझेरी टाँडीमा एक घर पहिरोले पुरीदा २ जनाको मृत्यु भएको हो ।

जिल्लाको पहाडी बिकट गाउँ डाडाँझेरीमा मंगलबार विहान पहिरोले घर पुरिदा ६१ बर्षीय शेरबहादुर सार्की र उनकी श्रीमति ५७ वर्षिया खिलमाया सार्कीको मृत्यु भएको जिल्ला प्रहरी कार्यालय नवलपुरका प्रहरी उपरीक्षक दिपक रेग्मीले जानकारी दिए ।

राती करीब तीन बजे तिर घर माथिबाट आएको ठुलो पहिरोमा परेर सार्की दम्पत्ती नै हराईरहेका थिए । स्थानीयले बिहानै देखि खोजताश गर्ने क्रममा घरमा पुरिएको अबस्थामा सार्की दम्पत्तीको शब फेला परेको प्रहरीले जनाएको छ । घर संगै पहिरोले सार्की दम्पत्ती, बाख्रा, कुखुरा, सबै पहिरोले पुरेको छोरा धनबीर सार्कीले बताए । पानी धेरै परेका कारण पहिरो आएको र घर नै पहिरोले बगाएको गाउँपालिका वडा नं. २ का वडाध्यक्ष प्रेमबहादुर थापा मगरले बताए । प्रमुख जिल्ला अधिकारी पिताम्बर घिमिरिले घटनास्थलमा प्रहरी परिचालन समेत गरिएको जानकारी दिए ।

यस्तै जिल्लाको बिनयी त्रिबेणी गाउँपालिका ४ मा पिकअप भ्यानलाई खोलामा आएको बाढिले बगाएको छ । जिल्ला प्रहरी कार्यालय नवलपुरले जानकारी दिदै गाउँपालीका ४ को भित्री सडक खण्डमा दुम्किवासबाट पितरीतर्फ जादै गरेको लु २ च ६१७१ नं. को पिकअप भ्यानलाई सोहि स्थानमा रहेको खहरे खोलामा आएको बाढीले बगाएको हो । पिकअप भ्यान बगाउदा मानबिय क्षति भने नभएको प्रहरीले जनाएको छ ।