खोज

तराइसित सीमाना जोडिएको शीतगंगा नगरपालिकालाई पशुपालनबाट नगरावसीलाई स्वरोजगार बनाउने अभियानमा नगरपालिकाले विभिन्न कार्यक्रम सञ्चालन गरेको छ । पशुपालनलाई व्यावसायीक र आधुनिकीकरण गर्दै किसानलाई पशुपालनबाटै मनग्य आम्दानी गराउने नगरपालिका लागि परेको छ ।

सन्धिखर्क–गोरुसिंगे सड्क खण्ड अन्तरगत रजियामा अहिले दैनिक १ सय ३० लिटर दूध संकलन हुन्छ । दूध ठाडा, अमराई चक्ला लगायतका बजारमा बिक्री हुन्छ । दूध उत्पादन गर्ने कृषकलाई नगरपालिकाले वडा कार्यालय मार्फत उत्पादनमा आधारित अनुदान उपलब्ध गराएपछि किसानमा बेग्लै उत्साह थपिएको छ । सबै किसानलाई सहकारीमा आबद्ध बनाएर सरकारी मार्फत अनुदानको व्यवस्था गरिएको छ । एक लिटर दूध उत्पादन गरेर बिक्री गर्ने किसानलाई लिटरमा दुई रुपैया अनुदान दिएको छ । किसान उन्नत जातको गाई र भैसी पालेर दूध धेरै बेच्न दौडधुपमा छन् । एउटा उन्नत जातको गाई र भैसी पालेर महिनामा दस देखि बीस हजार रुपैया आम्दानी गरेपछि किसान दंग छन् ।

पथ्थरकोट देखि ठाडा, सितापुर देखि सुवर्णखालसम्मका किसानलाई दूध उत्पादन गर्न विभिन्न उत्प्रेरणा जगाउन कार्यक्रम सञ्चालन गरेको छ । किसानलाई उत्पादनमा आधारित अनुदान, पशुपालन सम्बन्धी विभिन्न तालिम, प्राविधिक सहयोग, रोग लाग्न नदिने उपाय लगायतका गतिविधि नगरपालिकाले सञ्चालन गरेको छ । दूध बिक्री नहोला भन्ने छैन, जति उत्पादन गरेपछि स्थानीय बजार र तराई तथा बुटवलको बजारसम्म दूधको माग अत्यधिक छ, शीतगंगा नगरपालिका प्रमुख सुर्यप्रसाद अधिकारीले भने ।

दूग्ध उत्पादन संस्था, डेरी उद्योगबाट गाडी ल्याएरै शीतगंगाबाट दूध लैजाने गरी योजनाबद्ध रुपमा पशुपालनमा काम भैरहेको उनले बताए । अहिले सिद्धाराको हर्रेबर्रेसम्म डबल कटिङ सड्क सञ्चालनमा छ । बाह्रै महिना गाडी चल्छन् । दैनिक गाडी चल्ने भएपछि गाडीले बजारमा दूध ल्याइदिन्छ । सितापुर–सुवर्णखाल सड्कको स्तरोन्नती गरी बाह्रै महिना नियमित गाडी चल्ने व्यवस्थाको लागि सड्क निर्मँणका काम भैरहेको छ । जलुके, जुकेना, सिमलपानीका अधिकांश बस्तीमा गाडी नियमित चल्ने गरी सड्कको स्तरोन्नतीको काम अगाडी बढेको अधिकारीले बताए । सडक राम्रो भएपछि बाहै्र महिना गाडी चल्छन् । दूध धेरै उत्पादन गरेर नगरले दूध बोक्ने गाडीको व्यवस्था गरी किसानले उत्पादन गरेको दूध बजारमा पुराउन सहयोग गर्ने योजना उनले सुनाए ।

नगरभित्रका सबै किसानलाई व्यावसायीक भैसी र गाई पाल्न लगाएर दूध बेचेर आम्दानी गर्न पशुपालन सम्बन्धी कार्यक्रम जनस्तरसम्म पुराएको नगर उपप्रमुख टीकाबहादुर रेश्मीले बताए । सिमलपानीको पावर, विक्रमसोतामा दूध उत्पादन गर्न किसानलाई उत्प्रेरणा गरिएको छ । अहिले नगरको सितापुर देखि पथ्थरकोटसम्म हाइवे सड्क भएकाले त्यस आसपासका किसानलाई दूध उत्पादन गर्न विभिन्न कार्यक्तम सञ्चालन गरिएको छ । अहिले रजियामा उत्पादित दूधले ठाडा, अमराई चक्ला लगायतका बजारलाई दूधले धानेको छ । नगरभित्रै अझै धेरै माग छ । तराई र बुटवलबाट नजिक भएकाले र हाइवे सड्क भएकाले वर्षामा पनि दूधको गाडी चल्न सजिलो छ । पशुपालनमा शीतगंगा उर्वरभूमी हो । घास, वन, जंगल प्रशस्त भएकाले किसानलाई पशुपालेर दूध बेचेर घरखर्च चलाउन सकिन्छ । मनग्य आम्दानी हुन थालेपछि पढेलेखेका युवा समेत उन्नत जातको गाई र भैसीपालेर दूध बेच्न थालेको नगर उपप्रमुख रेश्मीले बताए ।