खोज

नेकपाका अध्यक्ष पुष्पकमल दाहालले ५ नम्बर प्रदेशकोे नाम लुम्बिनी राख्दा कसैको बिमती नहुने बताएका छन् । कपिलवस्तुको जीतपुरमा आयोजित १० औं कपिलवस्तु महोत्सवको समुद्घाटन गर्दै दाहालले ५ नम्बर प्रदेशको नाम लुम्बिनी र त्यसको राजधानी तिलौराकोट राख्न पार्टीमा आफूले प्रस्ताव लैजाने उनले प्रतिवद्धता व्यक्त गरे । प्रदेशको नामाकरणमा आफू एक्लैले निर्णय गर्न नसक्ने बताएपनि दाहालले ‘सबै जातजाति धर्म सम्प्रदायलाई लुम्बिनी राख्दा समस्या नपर्ने बताए । पूर्व प्रधानमन्त्री समेत रहेका पुष्पकमल दाहालले विश्वमा नेपाललाई नचिन्लान तर बुद्ध जन्मस्थल लुम्बिनीलाई सबैले चिन्छन्, त्यही भएर पनि प्रदेशको गौरब विश्वमै चिनाउन पनि लुम्बिनी नाम राख्नु पर्ने धारणा राखे । ‘लुम्बिनी, कपिलवस्तु र रामग्रामलाई विश्व शान्तिको सहर बनाउने परिकल्पना आफूले अघि सारेको बताउँदै तीन ठाउँ समेट्ने गरि प्रदेश राजधानी बनाउँदा कसैको आपत्ती नहुने जिकिर गरे ।

कृषिमा आमुल सुधार बिना मुलुकको बिकास असम्भव रहेको कृषि तथा पशुपंक्षी बिकास मन्त्री चक्रपाणी खनाल (बलदेव) ले बताए ।  उद्घाटनको कार्यक्रममा नेपाली काँग्रेसका केन्द्रिय सदस्य तथा संघिय सांसद अतहर कमालले प्रदेशको नाम लुम्बिनी राख्न तथा दाङ्ग र रूपन्देहीको तानातानका बिच बुद्धस्थल तिलौराकोटलाई राजधानी तोक्न माग गरे । कृषिजन्य व्यवसाय तथा उत्पादनको प्रवर्धन, पर्यटन र संस्कृति प्रवर्धन गर्ने उद्देश्यले महोत्सव गरिएको छ । महोत्सवमा आठौं कपिलवस्तु डान्स आईडल, स्थानीय कला संस्कृतीको प्रवर्धन, ख्याति प्राप्त राष्ट्रिय कलाकारको दैनिक प्रस्तुति, विशेष बालउद्यान सहितको मनोरञ्जन पार्क आकर्षक रहेको छ । मंसिर १८ देखि पुस १ गते सम्म संचालन हुने महोत्सवमा ३ सय ५० वटा स्टल रहेका छन् । करिब ४ लाख दर्शकले महोत्सव अवलोकन गरेर १२ करोड बढिको कारोवार हुने आयोजकको अपेक्षा रहेको छ ।