खोज

बुटवल,१ फागुन । माओवादीको सशष्त्र द्वन्द्वका क्रममा राज्यद्वरा वेपत्ता पारिएका र मारिएका व्यक्तिका परिवारलाई न्याय दिनुपर्ने सरोकारवालाले माग गरेका छन् । २८औं जनयुद्ध दिवसको अवसरमा नेत्रविक्रम चन्द नेतृत्वको नेकपाले बुटवलमा गरेको अन्तरक्रियामा विभिन्न दलका नेताहरुले सशष्त्र द्वन्द्वको जगमा नेपालमा राजतन्त्रको अन्तय भई संघीय लोकतान्त्रिक गणतन्त्र सथापना भएपनि युद्धमा मारिएका र वेपत्ताको परिवारका माग सम्बोधन गर्न सरकारले नसकेको बताए ।
संविधानसभा सदस्य सावित्रा दुराले सशष्त्र युद्धको बेला राज्यद्वारा वेपत्ता व्यक्तिहरुको सार्वजनिक गर्न माग गरेकी छन् । युद्धका क्रममा एक हजार ९६ जना वेपत्ता भएको पार्टीमा तथ्यांक रहेको उनले दावी गरिन् । आफ्ना पति अखिल क्रान्तिकारीका तत्कालीन महासचिव पुर्ण पौडेल २०५९ साल बैसाख १३ गतेदेखि वेपत्ता भएको उल्लेख गर्दै उनले दुराले वेपत्ताहरुको अवस्था सार्वजनिक नहुंदा परिवारजन पीडामा बांच्न वाध्य भएको बताइन ।
‘राज्यले वेपत्ताको कि सास दिनुपर्‍यो कि लाश दिनुपर्‍यो’–दुराले भने–‘एकजना हैन दुईजना हैन झण्डै एघार सय जना नागरिक वेपत्ता छन्, यति ठूलो संख्यामा देशका नागरिक वेपत्ता हुंदा उनीहरुका परिवारप्रति सरकार संवेदनशील हुनुपर्दैन ?’
नेतृ दुराले वेपत्ता व्यक्तिका परिवारहरु जिविकोपार्जन,शिक्षा दिक्षा र रोजगारी जस्ता वहुआयामिक समस्याबाट गुज्रिन वाध्य भएको बताइन ।
सशष्त्र युद्धका कमाण्डर पुष्पकमल दाहाल प्रचण्ड प्रधानमन्त्री भएपनि उनी नङग्रा विनाको बाघ जस्तै खोक्रो भएको टिप्पणी गर्दै उनी नेतृत्वको सरकारले वेपत्ता र शहीद परिवारका समस्या समाधानमा चासो नराखेको बताइन ।
माओवादी केन्द्र संसदीय भासबाट बाहिर आएर सबै पुर्व माओवादीहरु एक भएर वैज्ञानिक समाजवादी शासन व्यवस्था स्थापनाबाट मात्र नागरिकका समस्या समाधान हुने बताइन ।
नेपाली सेनाबाट पति मारिएकी बुटवलकी जया पौडेलले माओवादी युद्धमा मारिएकालाई सरकारले राष्ट्रिय शहीद घोषणा गरी सम्मान दिनुपर्ने बताइन् ।
सरकारले दिएको १० लाखले युद्धमा ज्यान गुमाएकाको परिवारको जिविकोपार्जन हुन नसक्ने उनले गुनसो गरिन् । ‘सरकारले शहीद परिवारको जिविकोपार्जन, रोजगारी र बच्चाहरुको शिक्षादिक्षामा कुनै चासो दिएको छैन’–उनले भनिन् ।
कार्यक्रममा नेकपा पोलिटब्युरो सदस्य एवं पुर्व लुम्बिनी इन्चार्ज बसन्त श्रेष्ठ,रुपन्देही यन्चार्ज शरद वल,िमाओवादी केन्द्रका रुपन्देही संयोजक निर्मल जीसी, नेकपा एमालेका नेता डा. बालकृष्ण चापागाई, ,पत्रकार महासंघ रुपन्देहीका उपाध्यक्ष विश्वास ढकाल, लेखक दिल साहनी लगायतले बोल्दै माओवादी सशष्त्र युद्धमा ज्यान गुमाउने र वेपत्ता हुनेहरुका परिवारको जिविकोपार्जन, रोजगारी लगायतका विषयमा सरकार संवेदनशील हुनुपर्नेमा जोड दिए ।