खोज

प्यूठान नगरपालिकाको प्रशासनिक भवनसम्म पुग्ने बाटो कालोपत्रे गर्न थालिएको छ । विजुवार मित्रमणीचोकदेखि झिमरुक खेलकुद मैदान हुँदै कार्यालय भवनसम्म कालोपत्रेको काम शुरु भएको हो । कालोपत्रे निर्माणका लागि एक करोड १७ लाख ८२ हजार रूपैयाँ विनियोजन गरिएको छ । नगरपालिकाका अनुसार ६ सय मिटर सडक कालोपत्रे हुनेछ । कालोपत्रे गर्ने जिम्मा भिजन निर्माण सेवा झिमरुक गाउँपालिका ओखरकोटले लिएको छ । मित्रमणीचोकदेखि करिव डेढसय मिटरसम्म यसअघि आरसीसी गरिएकाले उक्त स्थानमा सामान्य कालेपत्रे (कार्पेटिङ) मात्र राखिएको नगरपालिकाका इञ्जिनियर विरेन्द्र कुवँरले जानकारी दिए ।
चालु आर्थिक वर्षमा थप ७५ लाख रूपैयाँ बजेट विनियोजन गरिएको नगरप्रमुख अर्जुनकुमार कक्षपतीले जानकारी दिए । ‘आगामी मंसिरसम्म नगरपालिकाको नयाँ भवनबाट काम थाल्ने योजना छ’,उनले भने,‘त्यसबेलासम्म सडक कालोपत्रे सकिन्छ ।’ नगरपालिकाको आफ्नै भवन नहुँदा दैनिक प्रशासनिक कामकाजमा असहज भइरहेको छ । विषयगत शाखाहरू प्रभावकारी रूपमा संचालन हुन सकेका छैनन् । साँघुरो कोठामा शाखाहरू संचालित छन् । सेवाग्राहीलाई समेत सहज रूपमा सेवा लिन कठिन भइरहेको छ । मित्रमणीचोकबाट कार्यालयसम्म पुग्ने सडक नगरक्षेत्रकै नमुना बनाउने योजनामा रहेको नगरप्रमुख कक्षपतीले बताए । उनका अनुसार सडक छेउछेउमा विभिन्न प्रजातीका विरुवाहरू वृक्षारोपण गरेर हरियाली बनाइने छ । यसले नगरको पहिचानमा ‘इट्टा’ थप्ने आशा नगरपालिकाले गरको छ ।
भवन निर्माणको करिव ९० प्रतिशत काम सकिएको नेशनल/आँशु/मल्लरानी जेभीका प्रतिनिधी एवं निर्माण व्यवसायी संघ प्यूठानका अध्यक्ष पशुपती नारायण नकर्मीले जानकारी दिए । उनका अनुसार चार करोड ४८ लाख रूपैयाँ लागतमा भवन निर्माण गरिएको हो । हलसहित २२ वटा कोठा निर्माण गरिएको नकर्मीले बताए । ६ सय ८६ दशमलव १६ वर्ग मिटर क्षेत्रफल जग्गामा निर्माण गरिएको भवन भूकम्प प्रतिरोधात्मक भएको उनको भनाई छ । भवन निर्माणका लागि खलंगा थापाडाँडाका स्थानीयले निःशुल्क जग्गा उपलव्ध गराएका छन् ।