खोज

बुटवल, ३ भदौ ।

नेकपा एमालेकी सचिव पद्मा अर्यालले एमालेको लुम्बिनी प्रदेश अधिवेशनले सिंगो पार्टीपंक्ति र जनतामा नयाँ सन्देश प्रवाह गर्ने बताएकी छन् ।

लुम्बिनी प्रदेशका विभिन्न जिल्लाहरुको वस्तुस्थिति बुझेर बुटवल आएकी एमाले लुम्बिनी प्रदेशकी इन्चार्ज अर्यालले एमालेले लुम्बिनीबाट प्रदेश अधिवशनको सुरुवात गरेकाले यसले सिंगो मुलुकलाई र पार्टीपंक्तिलाई दिने सन्देश नमूना र ऐतिहासिक हुने बताइन् । एमालेको तयारी बैठकपछि सञ्चारकर्मीसँग कुराकानी गर्दै अर्यालले भनिन्, “यो अधिवेशन अरु प्रदेशका लागि पनि नमूना र ऐतिहासिक हुनेछ ।

“एमाले अवका हरेक कार्यक्रममा आसनग्रहण नगराउने र वक्तालाई मात्र मन्चमा उपस्थित गराउने निर्णय गरेको, यो निर्णयको कार्यान्वयन लुम्बिनीबाटै हुन्छ”–अर्यालले भनिन्–“प्रदेश अधिवेशनमा पार्टी अध्यक्षसहित आधा दर्जन भन्दा बढी पदाधिकारी सहभागी हुनुहुन्छ, उहाँहरु सबै प्रतिनिधिको रोहमै बस्नुहुन्छ ।”

उनले प्रदेश अधिवेशनमा वर्षायाम र गर्मीको समयलाई मध्यनजर गर्दै धेरै जनसहभागिता जुटाउनेतर्फ पहल नगरिने तर रुपन्देही, नवलपरासी र कपिपलवस्तुबाट भने जनसहभागिता रहने बताइन् । “अधिवेशनबाट मूल नेतृत्व सकेसम्म सर्वसम्मत बनाउने कोशिष रहने भन्दै उनले यदि सर्वसम्मत हुन सकेन भने स्वस्थ प्रतिष्पर्धा गरी लोकतान्त्रिक विधिबाट नेतृत्व चयन गरिने बताइन् । “चुनावबाट कार्यकर्ताको मन दुईतर्फ विभाजित नहोस् भन्ने कुरालाई वचार गर्दै सकेसम्म सर्वसम्मत नेतृत्व चयनको प्रयास रहन्छ, यद्यपि त्यसमा पार्टीले कुनै जवर्जस्ती गर्दैन, नेतृत्वका लागि इच्छुकले लोकतान्त्रिक विधि अनुसार स्वस्थ प्रतिष्पर्धा पनि गर्न सक्नुहुन्छ ।

उनले अधिवेशनले लुम्बिनीमा पार्टीले लिने कार्यदिशा, सांगठनिक अनुशासन र पार्टीपंक्तिलाई परिचालन गरी जनतासँग एकाकार गर्ने कुरामा नयाँ मागैनिर्देश गर्ने पनि बताइन् ।

एमालेको लुम्बिनी प्रदेश अधिवेशन यही भदौ १६ र १७ गते बुटवलमा हुँदैछ । प्रदेश अधिवेशनका लागि मूल व्यवस्थापन समिति र त्यस मातहत विभिन्न उपसमितिहरु निर्माण गरिएका छन् । उपसमितिका तयारी बैठकहरु समेत सम्पन्न भैसकेको प्रदेश इन्चार्ज अर्यालले जानकारी दिइन् । प्रदेश अधिवेशनका लागि एमालेले यही भदौ ९ गते १०९ वटै पालिकाबाट प्रतिनिधि चयन गर्दैछ । एमालेको लुम्बिनी प्रदेशमा ८५ हजारले पार्टी सदस्यता नवीकरण गरेका छन् । एक सय सदस्य बराबर एकजना र महिलाको हकमा ७५ बराबर एकजना पर्ने गरी प्रतिनिधि छनौट गरिंदैछ । यसरी छानिएका करिव एकहजार जना प्रतिनिधिले अधिवेशनमा सहभागिता जनाउने छन् ।