खोज

 काठमाडौं, २४ मंसिर ।

प्रधानमन्त्री सुशीला कार्कीले विश्वविद्यालयमा प्रधानमन्त्रीलाई कुलपति नहुने व्यवस्था गर्न आफू लागेको बताएकी छिन् ।

बुधबार धुलिखेलमा आयोजित काठमाडौं विश्वविद्यालयको ३१औँ दीक्षान्त समारोहमा बोल्दै उनले विश्वविद्यालयमा हुने राजनीतिकरण अन्त्य गर्न सरकारले प्रधानमन्त्रीलाई कुलपति बनाउने व्यवस्थामा परिमार्जन गर्ने योजना बनाएको जानकारी दिइन् ।

सो विश्वविद्यालयका कुलपति समेत रहेकी प्रधानमन्त्री कार्कीले प्रधानमन्त्रीलाई कुलपति नराख्ने गरी ऐनमा संशोधन गर्न सरकारले शिक्षा, विज्ञान तथा प्रविधि मन्त्री महावीर पुनको नेतृत्वमा शिक्षाविद्, विश्वविद्यालयका कुलपति, उपकुलपति र अन्य सरोकारवालासँग गम्भीर परामर्श गरिरहेको जानकारी पनि दिइन् ।

प्रधानमन्त्री कार्कीले भनिन्, ‘पछिल्लो केही समयदेखि प्रधानमन्त्री नै विश्वविद्यालयको कुलपति हुने व्यवस्थालाई परिमार्जन गर्नुपर्ने आवश्यकता देखिएको छ ।

शिक्षामन्त्री महावीर पुनजीले शिक्षाविद्, विश्वविद्यालयका कुलपति, उपकुलपति लगायत उच्च नेतृत्व र अन्य सरोकारवालासँग यस विषयमा गम्भीर परामर्श र गृहकार्य गरिरहनुभएको छ । ऐनमा संशोधन गरेर प्राज्ञिक व्यक्ति कुलपति हुने व्यवस्था गर्नेतर्फ हामी लागेका छौं ।’

प्रधानमन्त्री कार्कीले यस परिमार्जनले नेपालको उच्च शिक्षामा राजनीतिकरणको परम्परा अन्त्य गर्ने विश्वास व्यक्त गर्दै भनिन्, ‘नेपालको उच्च शिक्षालाई सुधार गर्न काठमाडौं विश्वविद्यालयले गरेका सकारात्मक पहल र ढाँचालाई अन्य विश्वविद्यालयले समेत अनुशरण गर्नुपर्छ ।’

त्यस अवसरमा प्रधानमन्त्री कार्कीले काठमाडौं विश्वविद्यालयको योगदानको प्रशंसा गर्दै अन्य विश्वविद्यालयहरुलाई पनि त्यसको अनुशरण गर्दै अघि बढ्न आग्रह गरिन् ।