खोज

चन्द्रौटा, २४ मंसिर।

नेपाली कांग्रेस कपिलवस्तु–३ मा प्रतिनिधिसभा उम्मेदवार सिफारिस प्रक्रियालाई लिएर तीव्र असन्तोष चुलिएको छ। पूर्व सांसद अभिषेक प्रताप शाह नेतृत्वको समूहले क्षेत्रीय समितिद्वारा ‘एकल नाम’ सिफारिस गरिएको भन्दै जिल्ला कार्यसमितिमा औपचारिक ध्यानाकर्षणपत्र बुझाएको हो।

शाहको हस्ताक्षर रहेको पत्रमा प्रतिनिधिसभा सदस्यका लागि बिरेन्द्र कुमार कनौडियाको मात्र नाम एकल रूपमा केन्द्रमा पठाइनुले लोकतान्त्रिक प्रक्रिया कुण्ठित भएको आरोप लगाइएको छ। २०७४ मा निर्वाचित र २०७९ को निर्वाचनमा निकटतम प्रतिस्पर्धीका रूपमा आफू योग्य उम्मेदवार भएको दाबी गर्दै शाहले आफ्नो नाम समेत समावेश गर्न अपिल गरेका छन्।

गत २२ गते बसेको क्षेत्रीय बैठकमा शाह र कनौडिया दुवैको नाम केन्द्रमा पठाउने प्राथमिक प्रस्ताव भए पनि अन्तिममा कनौडियाको मात्र नाम सिफारिस गर्ने निर्णय ‘जबरजस्ती पारित’ गरिएको स्रोत बताउँछ। स्रोतका अनुसार तल्लो तहका कार्यकर्ता र स्थानीय जनभावनालाई बेवास्ता गर्दै शाहको नाम कटौती गरेर कनौडियालाई प्राथमिकता दिने निर्णय लिइएको हो।

यस निर्णयपछि पार्टीको भित्री वृतमै असन्तोष उग्रिएको छ। प्रदेशसभा (क) का क्षेत्रीय सभापति गोविन्द बहादुर खत्रीले जारी गरेको प्रेस विज्ञप्तिमा सो निर्णय कार्यकर्ताको भावना विपरीत भएको उल्लेख गर्दै शाहको नाम पनि अनिवार्य रूपमा समावेश गर्नुपर्ने माग गरिएको छ।

सभापति खत्रीले भने— “पार्टी कसैको निजी सम्पत्ति होइन। कार्यकर्ताको भावना र संगठनात्मक विधिअनुसार निर्णय हुनु जरुरी छ। तर यहाँ एकलौटी रूपमा निर्णय गरिएकाले हामीले अभिषेक प्रताप शाहको नाम समेत सिफारिस गरेका छौँ।”

आगामी फागुन २१ को निर्वाचन नजिकिँदै जाँदा कांग्रेसभित्रको यो विवादले कपिलवस्तु–३ मा आन्तरिक शक्ति–सन्तुलन नयाँ मोड लिएको छ।